Ponniyin Selvan 1: थिएटरमध्ये व्हिडीओ शूट करणाऱ्यांनी ‘ही’ बातमी वाचाच; मद्रास हायकोर्टाचा मोठा निर्णय
'पोन्नियिन सेल्वन 1'चे निर्माते पोहोचले मद्रास हायकोर्टात
मुंबई- मणिरत्नम (Mani Ratnam) यांचा बहुप्रतिक्षित ‘पोन्नियिन सेल्वन- 1’ (Ponniyin Selvan 1) हा चित्रपट आज (30 सप्टेंबर) प्रदर्शित झाला. तब्बल 500 कोटींच्या बजेटमध्ये हा चित्रपट बनवण्यात आला आहे. 1955 मध्ये कल्की कृष्णमूर्ती यांनी लिहिलेल्या ‘पोन्नियिन सेल्वन’ या उपन्यासावर या चित्रपटाची कथा आधारित आहे. भारतातील सर्वांत महागड्या चित्रपटांपैकी ही एक आहे. या चित्रपटाला पहिल्या दिवशी बॉक्स ऑफिसवर प्रेक्षकांचा चांगला प्रतिसाद मिळतोय. अशातच कलेक्शनवर फटका बसू नये म्हणून निर्मात्यांनी कोर्टात धाव घेतली. पायरेटेड व्हर्जनविरोधात त्यांनी मद्रास कोर्टात धाव घेतली होती. त्यानंतर आता कोर्टाने PS-1 या चित्रपटाच्या पायरेटेड व्हर्जनच्या प्रदर्शनावर बंदी घातली आहे.
अनेकदा चित्रपटांना पायरसीचा फटका बसतो. प्रदर्शनाच्या दिवशीच मोठमोठे चित्रपटांचे पायरेटेड व्हर्जन लीक होतात. त्यामुळे कमाईवर त्याचा वाईट परिणाम होतो. याविरोधात पोन्नियिन सेल्वन- 1 च्या निर्मात्यांनी कोर्टात धाव घेतली होती. मद्रास हायकोर्टाने या चित्रपटाच्या पायरेटेड व्हर्जनच्या रिलीजवर बंदी घातली आहे. तब्बल 2 हजारांहून अधिक वेबसाइट्सवर कोर्टाने बंदी घातली आहे.
निर्मात्यांनी चाहत्यांनीही विनंती केली की त्यांनी थिएटरमध्ये कोणताही व्हिडीओ शूट करू नये. पीएस- 1 या चित्रपटात चियान विक्रम, कार्ती, जयम रवी, ऐश्वर्या राय बच्चन, त्रिषा कृष्णन, शोभिता धुलिपाला, प्रकाश राज यांच्या भूमिका आहेत. मणिरत्नम यांनी दोन भागांमध्ये हा चित्रपट बनवला आहे. ए. आर. रेहमान यांनी या चित्रपटाला संगीत दिलं आहे.
दिग्दर्शक मणिरत्नम यांचा हा ड्रीम प्रोजेक्ट आहे. पोन्नियिन सेल्वनच्या डिजिटल स्ट्रीमिंगचे अधिकार ॲमेझॉन प्राइम व्हिडीओला मोठ्या किंमतीत विकले गेले आहेत. त्यामुळे प्रदर्शनाच्या आधीच निर्मात्यांचा मोठा नफा झाला आहे. या चित्रपटासाठी हा करार खूप मोठा मानला जात आहे.
