MC Stan | लाइव्ह कॉन्सर्टमध्ये घडलेली घटना पाहून एमसी स्टॅनने मध्येच थांबवलं गाणं अन्..
पुण्याचा प्रसिद्ध रॅपर एमसी स्टॅन ऊर्फ अल्ताफ शेख हा नुकताच ‘बिग बॉस 16’चा विजेता ठरला. या शोचं विजेतेपद पटकावल्यानंतर एमसी स्टॅनच्या लोकप्रियतेत तुफान वाढ झाली आहे.
हैदराबाद : ‘बिग बॉस 16’चं विजेतेपद पटकावलेला रॅपर एमसी स्टॅन सध्या देशभरात लाइव्ह कॉन्सर्टद्वारे परफॉर्म करत आहे. एमसी स्टॅनचा खूप मोठा चाहतावर्ग आहे आणि बिग बॉस जिंकल्यानंतर त्यात आणखी वाढ झाली आहे. बिग बॉसच्या घरातून बाहेर पडताच त्याने ‘इंडिया टूर’ची घोषणा केली. नुकतंच त्याने हैदराबादमध्ये लाइव्ह परफॉर्म केलं. मात्र या कॉन्सर्टदरम्यान अशी गोष्ट घडली, ज्यानंतर चाहते एमसी स्टॅनचं कौतुक करत आहेत. कॉन्सर्टदरम्यान एक चाहता पडल्यानंतर त्याची मदत करण्यासाठी स्टॅनने परफॉर्म करणं मध्येच थांबवलं. त्याच्या याच चांगुलपणाचं कौतुक चाहते करत आहेत.
रेडिटवर शेअर केलेल्या एका व्हिडीओमध्ये एमसी स्टॅन परफॉर्म करताना मधेच थांबल्याचं पहायला मिळत आहेत. चाहत्याला लागल्याचं कळताच त्याने विनंती केली, “सावकाश मित्रांनो.. एक जण खाली पडला आहे, असं वागू नका. म्युझिक थांबवा. हैदराबादकरांनो, असं करू नका. एक व्यक्ती दुसऱ्या व्यक्तीवर पडली आहे. तुम्ही ठीक आहात का?”
“मला शेवटपर्यंत परफॉर्म करायचं आहे. मी पुन्हा हेच सांगतोय. नाहीतर मला पोलीस मधेच थांबवतील आणि इथून जाण्यास सांगतील. त्यामुळे तुम्ही गोंधळ घालू नका”, असं तो म्हणतो. मात्र गर्दी वाढतच गेल्याने परिस्थिती नियंत्रणाबाहेर जाऊ नये यासाठी पोलिसांनी त्याचं कॉन्सर्ट लवकर बंद करण्यास सांगितलं.
It’s not every day that you get to Witness a Moment like this the aerial Drone view of MC Stan’s Hyderabad Concert is truly very Special ??
With the massive 15K fans Vibing
Along to every beat giving it all To their Favorite rapper @MCStanOfficial.#MCStan #BB16 #BiggBoss16 pic.twitter.com/erWwp70WDX— ?? ???? ???????? ??⛓️ (@ItsTeamMCStan) March 11, 2023
हैदराबादमधील या लाइव्ह कॉन्सर्टमध्ये एमसी स्टॅनने जवळपास दीड तास परफॉर्म केलं. काही नेटकऱ्यांनी एमसी स्टॅनच्या वागणुकीचं कौतुक करत असतानाच ट्रेविस स्कॉटच्या कॉन्सर्टची आठवण केली. 2021 मध्ये ट्रेविस स्कॉटच्या कॉन्सर्टदरम्यान चेंगराचेंगरीमुळे 10 जणांनी आपले प्राण गमावले होते. चाहते मदतीसाठी ओरडत असतानाही या अमेरिकन रॅपरने त्याचं गाणं सुरूच ठेवलं होतं. चेंगराचेंगरी होत असतानाही शो सुरूच होता.
पुण्याचा प्रसिद्ध रॅपर एमसी स्टॅन ऊर्फ अल्ताफ शेख हा नुकताच ‘बिग बॉस 16’चा विजेता ठरला. या शोचं विजेतेपद पटकावल्यानंतर एमसी स्टॅनच्या लोकप्रियतेत तुफान वाढ झाली आहे. ‘तडीपार’ आणि ‘इन्सान थे’ हे एसमी स्टॅनचे दोन बॅक टू बॅक अल्बम्स हिट झाले आणि त्यामुळे त्याला प्रचंड लोकप्रियता मिळाली. देसी हिप-हॉपमध्ये त्याने स्वत:ची वेगळी ओळख मिळाली. बिग बॉसमध्ये एमसी स्टॅनचा स्वभाव चाहत्यांना जवळून पाहता आला.
