प्रसिद्ध अभिनेत्रीने रस्त्यावर मागितली भिक्षा; आलिशान जगणं सोडून स्वीकारला संन्यास
झोपडीत राहून, मंदिरात भजन गाऊन जगतेय जीवन
मुंबई- प्रसिद्ध टेलिव्हिजन अभिनेत्री नुपूर अलंकार (Nupur Alankar) यांनी आलिशान लाइफस्टाइल सोडून संन्यास स्वीकारला आहे. याविषयीचे अपडेट्स त्या सोशल मीडियाद्वारे चाहत्यांना सांगत असतात. आईच्या निधनानंतर नुपूर यांनी जगण्याचा वेगळा मार्ग स्वीकारला आहे. संन्यासीच्या आयुष्यात भिक्षेचं (Bhiksha) फार महत्त्व असतं. नुपूर यांनी आयुष्यात पहिल्यांदाच भिक्षा मागितली आहे. या भिक्षेत त्यांना काय काय मिळालं, ते त्यांनी इन्स्टाग्रामवर सांगितलं आहे.
नुपूर यांनी इन्स्टाग्रामवर एक व्हिडीओ पोस्ट केला आहे, ज्यामध्ये त्या रस्त्यावर भिक्षा मागताना दिसत आहेत. आतापर्यंत सहा जणांकडून भिक्षा मिळाल्याचं त्यांनी सांगितलं आहे. भिक्षेत लोकांनी काय दिलं, याचा फोटोसुद्धा त्यांनी इन्स्टाग्रामवर पोस्ट केला. नुपूर यांना एका दिवसात 11 जणांकडून भिक्षा मागायची आहे.
View this post on Instagram
“आज भिक्षाटनचा पहिलाच दिवस आहे. संन्यासमध्ये भिक्षाटनचा अर्थ भीक मागणे असा होतो. एका संन्यासीनेच मला सकाळचा पहिला विना साखरेचा चहा दिला. त्यानंतर मला एका व्यक्तीने 21 रुपये भिक्षा म्हणून दिले”, असं त्या म्हणाल्या.
नुपूर यांच्या या फोटो आणि व्हिडीओवर चाहत्यांकडून विविध कमेंट्स येत आहेत. संन्यासी मार्ग अवलंबला असला तरी चाहत्यांपासून कनेक्शन तोडलं नाही, ही गोष्ट आवडल्याचं काही युजर्स म्हणाले. तर नुपूर यांच्या जगण्याचा नवीन मार्ग पाहून काही नेटकरी प्रभावित झाले आहेत.
View this post on Instagram
ग्लॅमरच्या विश्वात आल्यानंतर आलिशान जगणं सोडणं सोपं नसतं. अशा परिस्थितीत नुपूर यांनी काही गोष्टींचा त्याग करत हे नवीन आयुष्य स्वीकारल्याचं चाहत्यांना आवडलंय. नुपूर यांनी 27 वर्षे टेलिव्हिजन इंडस्ट्रीत काम केलं होतं. आईच्या निधनानंतर सांसारिक मोहमायातून मुक्त झाल्याचं त्यांनी म्हटलं. आता उर्वरित आयुष्य त्यांना देवाच्या भक्तीत व्यतीत करायचं आहे.
