Ranbir Alia | ‘रणबीरचं वागणं आलियाला आवडलं नाही हे स्पष्ट दिसतंय’; एअरपोर्टवरील व्हिडीओ व्हायरल
रणबीर आणि आलिया सध्या त्यांच्या आगामी 'रामायण' या चित्रपटामुळेही चर्चेत आहेत. नितेश तिवारी आणि मधू मंटेना यांच्या 'रामायण' या चित्रपटात रणबीर श्रीराम तर आलिया सीतेच्या भूमिकेत दिसणार असल्याचं म्हटलं जात आहे.
मुंबई : अभिनेत्री आलिया भट्ट आणि रणबीर कपूर यांचा मुंबई एअरपोर्टवरील एक व्हिडीओ सध्या सोशल मीडियावर चर्चेत आहे. हा व्हिडीओ त्यांच्या एअरपोर्ट लूकमुळे नाही तर दुसऱ्याच एका कारणामुळे नेटकऱ्यांच्या निशाण्यावर आला आहे. आपल्या आगामी ‘अॅनिमल’ या चित्रपटाच्या शूटिंगनंतर रणबीर पत्नी आलियासोबत दुबईला सुट्ट्यांचा आनंद घेण्यासाठी गेला होता. गुरुवारी रात्री हे दोघं एअरपोर्टवर दिसले, मात्र यावेळी रणबीरच्या वागणुकीमुळे आलिया थोडीशी वैतागलेली पहायला मिळाली. पापाराझींनी या दोघांचा व्हिडीओ सोशल मीडियावर पोस्ट केला. त्यावर नेटकऱ्यांकडून विविध प्रतिक्रिया येण्यास सुरुवात झाली.
सोशल मीडियावरील या व्हिडीओमध्ये आलिया आणि रणबीर पापाराझींसमोर येऊन फोटोसाठी पोझ देतात. मात्र रणबीर जेव्हा आलियाच्या खांद्यावर हात टाकतो, तेव्हा ती अनकम्फर्टेबल झालेली पहायला मिळते. यावरूनच नेटकऱ्यांनी कमेंट करण्यास सुरुवात केली आहे. आलियाच्या चेहऱ्यावरील बदललेले हावभाव पाहून नेटकऱ्यांनी दोघांमधील भांडणाचा अंदाज व्यक्त केला. ‘ज्या पद्धतीने रणबीरने आलियाच्या खांद्यावर हात ठेवला, तिला ते अजिबात आवडलं नाही हे स्पष्ट दिसतंय’, असं एकाने लिहिलं. तर ‘आलियाच्या चेहऱ्यावरून स्पष्ट कळतंय की ती अनकम्फर्टेबल आहे’, असं दुसऱ्याने म्हटलं.
रणबीर आणि आलिया सध्या त्यांच्या आगामी ‘रामायण’ या चित्रपटामुळेही चर्चेत आहेत. नितेश तिवारी आणि मधू मंटेना यांच्या ‘रामायण’ या चित्रपटात रणबीर श्रीराम तर आलिया सीतेच्या भूमिकेत दिसणार असल्याचं म्हटलं जात आहे. या चित्रपटाची शूटिंग डिसेंबरपासून सुरू होणार आहे. याशिवाय आलियाचा पहिला हॉलिवूड चित्रपट लवकरच प्रेक्षकांच्या भेटीला येणार आहे.
पहा व्हिडीओ
करण जोहरने त्याच्या ‘स्टुडंट ऑफ द इअर’ या चित्रपटातून आलिया भट्टला लाँच केलं होतं. त्यानंतर तिने ‘हायवे’, ‘टू स्टेट्स’, ‘डिअर जिंदगी’, ‘राजी’, ‘गंगुबाई काठियावाडी’, ‘डार्लिंग्स’, ‘ब्रह्मास्त्र’ यांसारख्या चित्रपटांमध्ये भूमिका साकारल्या आहेत.
