Rubina Dilaik | कार अपघातानंतर रुबिनाने दिली हेल्थ अपडेट; म्हणाली ‘मोठा धक्का बसला असून..’

Rubina Dilaik

Image Credit source: Twitter

मुंबई : टेलिव्हिजनवरील लोकप्रिय अभिनेत्री आणि बिग बॉस या रिॲलिटी शोची विजेती रुबिना दिलैकच्या कारचा नुकताच अपघात झाला. या अपघातानंतर तिने ट्विट करत आरोग्याची माहिती दिली आहे. रुबिनाचा पती अभिनव शुक्लाने अपघातानंतर कारचे फोटो ट्विटरवर पोस्ट केले होते. त्याचसोबत रुबिनाच्या प्रकृतीची माहिती दिली होती. ‘अपघातामुळे माझ्या डोक्याला आणि पाठीला मार लागला आहे. घडलेल्या घटनेनंतर मला मोठा धक्का बसला आहे. मेडिकल टेस्ट केले असून सर्वकाही ठीक आहे. निष्काळजीपणा करणाऱ्या ट्रक ड्राइव्हरविरोधात कारवाई केली जात आहे. कारचंही नुकसान झालं आहे. रस्त्यावर सावधगिरी बाळगण्याचं आवाहन मी करते. नियम हे आपल्या सुरक्षिततेसाठीच असतात’, असं तिने लिहिलं आहे.

अभिनवने कारचे फोटो पोस्ट करत लिहिलं होतं, ‘हे आमच्यासोबत घडलंय आणि हे कोणासोबतही घडू शकतं. फोनवर बोलणाऱ्या ट्रॅफिकदरम्यान रस्ता ओलांडणाऱ्या मूर्खांपासून सावधान रहा. त्याहून मोठी गोष्ट म्हणजे लोकं तिथे हसत उभे होते. नेमकं काय घडलंय याची माहिती नंतर देतो. रुबिना कारमध्ये होती आणि ती आता ठीक आहे. तिला मेडिकल टेस्टसाठी घेऊन जातोय. मी मुंबई पोलिसांना अशा लोकांविरोधात कठोर कारवाई करण्याची विनंती करतो.’

रुबिना आणि अभिनवने 2018 मध्ये लग्न केलं. या दोघांनी बिग बॉसच्या 14 व्या पर्वात स्पर्धक म्हणून भाग घेतला होता. ऑक्टोबर 2020 ते फेब्रुवारी 2021 या कालावधीत हा शो सुरू होता. या सिझनची विजेती रुबिना ठरली होती. राहुल वैद्य, निक्की तांबोळी आणि अली गोणी यांचा पराभव करत रुबिनाने विजेतेपद पटकावलं होतं.