Salman Khan | सलमान खानचा बॉडीगार्ड शेराने चाहत्याला दिला धक्का; व्हिडीओ पाहून भडकले नेटकरी
या व्हिडीओवर नेटकऱ्यांकडून विविध प्रतिक्रिया येत आहेत. 'गँगस्टर लॉरेन्स बिश्नोईची भीती असेल' असं एकाने लिहिलंय. तर 'अशा लोकांना इतका भाव का देता', असा सवाल दुसऱ्या युजरने केला.
मुंबई : अभिनेता सलमान खान बुधवारी मुंबई विमानतळावर पोहोचला. दुबईत ईद साजरी केल्यानंतर तो मुंबईत परतला होता. यावेळी एअरपोर्टवर सलमानची एक झलक पाहण्यासाठी चाहत्यांनी गर्दी केली होती. त्याचा व्हिडीओ सध्या सोशल मीडियावर व्हायरल होत आहे. यामध्ये सलमानच्या आजूबाजूला चाहत्यांचा गराडा पहायला मिळत आहे. गर्दीत अनेक चाहते सलमानशी हात मिळवण्याचा प्रयत्न करतात. वारंवार नकार दिल्यानंतरही एक चाहता सलमानसमोर हात पुढे करतो, तेव्हा त्याच्या बाजूला असलेला बॉडीगार्ड शेरा त्या चाहत्याला धक्का देतो. शेरा आणि सलमानचा हा व्हिडीओ सध्या सोशल मीडियावर चर्चेत आहे.
या व्हिडीओवर नेटकऱ्यांकडून विविध प्रतिक्रिया येत आहेत. ‘गँगस्टर लॉरेन्स बिश्नोईची भीती असेल’ असं एकाने लिहिलंय. तर ‘अशा लोकांना इतका भाव का देता’, असा सवाल दुसऱ्या युजरने केला. ‘चाहत्याला दिलेली ही किती वाईट वागणूक आहे’, असंही एका नेटकऱ्याने म्हटलंय. कुख्यात गुंड लॉरेन्स बिश्नोईच्या गँगकडून जीवे मारण्याची धमकी मिळाल्यानंतर सलमानची सुरक्षा वाढवण्यात आली आहे. सलमानला आता वाय प्लस दर्जाची सुरक्षा आहे. काही दिवसांपूर्वीच त्याने बुलेटप्रूफ कारसुद्धा खरेदी केली होती.
पहा व्हिडीओ
शेरा हा सलमानचा अत्यंत जवळचा बॉडीगार्ड आहे. तो स्वत: कोणत्या सेलिब्रिटीपेक्षा कमी नाही. सलमान आणि शेराची पहिली भेट ही गायक व्हिगफिल्डच्या शोमध्ये झाली होती. त्यानंतर 1995 मध्ये सलमान केनू रिव्ह्सच्या पार्टीत पुन्हा एकदा शेराला भेटला होता. तिथे सोहैल खानने शेराला सलमानचा बॉडीगार्ड होण्याची मागणी केली होती. 1998 मध्ये शेराने सलमानच्या चंदीगडमधल्या शोसाठी पहिल्यांदा बॉडीगार्ड म्हणून काम केलं होतं. तेव्हापासून तो सलमानच्या सेवेत कायम रूजू आहे.
एका मुलाखतीत शेरा म्हणाला होता की सलमान मालिक त्याच्यासाठी सर्वकाही आहे. “मी त्यांच्यासाठी माझा जीवसुद्धा देऊ शकतो. तो माझा देव आहे. जोपर्यंत मी जिवंत आहे, तोपर्यंत मी भाईसोबतच राहीन”, असं तो म्हणाला. सलमान शेराचा मुलगा अभीरला बॉलिवूडमध्ये लाँच करणार असल्याचंही म्हटलं जातंय.
