Samantha | समंथाने विजय देवरकोंडाच्या चाहत्यांची हात जोडून का मागितली माफी?
समंथाला मायोसिटीस या ऑटोइम्युन आजाराचं निदान झालं असून त्यावर ती उपचार घेत आहे. यादरम्यान समंथाची सोशल मीडियावर एक पोस्ट चर्चेत आली आहे. या पोस्टमध्ये तिने साऊथ सुपरस्टार विजय देवरकोंडाच्या चाहत्यांची माफी मागितली आहे.
हैदराबाद: अभिनेत्री समंथा रुथ प्रभू गेल्या काही दिवसांपासून तिच्या आजारपणामुळे चर्चेत आहे. समंथाला मायोसिटीस या ऑटोइम्युन आजाराचं निदान झालं असून त्यावर ती उपचार घेत आहे. यादरम्यान समंथाची सोशल मीडियावर एक पोस्ट चर्चेत आली आहे. या पोस्टमध्ये तिने साऊथ सुपरस्टार विजय देवरकोंडाच्या चाहत्यांची माफी मागितली आहे. समंथा आणि विजय एकत्र ‘खुशी’ या चित्रपटात काम करताना दिसणार आहेत. मात्र आजारणामुळे या चित्रपटाचं शूटिंग शेड्युल सतत पुढे ढकललं जात आहे.
गेल्या वर्षी मे महिन्यात खुशी या चित्रपटाची घोषणा झाली होती. या चित्रपटातून प्रेक्षकांना कौटुंबिक कथा अनुभवायला मिळणार असल्याचं समंथाने म्हटलं होतं. काश्मिरमध्ये या चित्रपटाच्या पहिल्या शेड्युलचं शूटिंग पार पडलं. मात्र समंथाच्या आजारपणामुळे नंतरचं शूटिंग रखडलं. मायोसिटीसचा उपचार घेण्यासाठी समंथा काही दिवस परदेशी गेली होती. तेव्हासुद्धा तिला तिचं शूटिंग पुढे ढकलावं लागलं होतं.
बुधवारी एका चाहत्याने ट्विटरवर समंथाला ‘खुशी’ या चित्रपटाविषयी प्रश्न विचारला. या चित्रपटाचं शूटिंग कधी सुरू होईल असं तिला विचारण्यात आलं. त्यावर समंथाने लिहिलं, ‘खुशीचं शूटिंग लवकरच सुरू होईल. विजय देवरकोंडाच्या चाहत्यांची मी मनापासून माफी मागते.’
#Kushi will resume very soon .. my apologies to @TheDeverakonda fans ?@ShivaNirvana @MythriOfficial https://t.co/jW6cm9H4Qc
— Samantha (@Samanthaprabhu2) February 1, 2023
समंथाच्या या माफीनंतर चाहत्यांनी तिला तिच्या तब्येतीची काळजी घेण्याचं आवाहन केलं, ‘आधी तू तुझ्या तब्येतीची काळजी घे’, असं एकाने लिहिलं. तर ‘तू खूप समजुतदार अभिनेत्री आहेस’, असं दुसऱ्या युजरने म्हटलं आहे.
काही दिवसांपूर्वीच समंथाचा ‘यशोदा’ हा चित्रपट प्रदर्शित झाला होता. यामध्ये तिने सरोगेट आईची भूमिका साकारली होती. या चित्रपटाने दहा दिवसांत 33 कोटी रुपयांचा गल्ला जमवला होता. यशोदा चित्रपटाच्या प्रमोशनदरम्यान समंथा तिच्या आरोग्याविषयी मोकळेपणे व्यक्त झाली होती.
