Box Office | ‘सत्यप्रेम की कथा’ येताच ‘आदिपुरुष’च्या कमाईत मोठी घसरण; कार्तिक-कियाराची जोडी पुन्हा ठरणार हिट?

Satyaprem Ki Katha

Image Credit source: Instagram

मुंबई : अभिनेता कार्तिक आर्यन आणि कियारा अडवाणी यांच्या मुख्य भूमिका असलेला ‘सत्यप्रेम की कथा’ हा चित्रपट ‘बकरी ईद’ आणि ‘आषाढी एकादशी’च्या मुहूर्तावर गुरुवारी थिएटरमध्ये प्रदर्शित झाला. हा चित्रपट प्रदर्शित होताच ‘आदिपुरुष’ आणि ‘जरा हटके जरा बचके’ या चित्रपटांचा बॉक्स ऑफिसवरील खेळ जवळपास खल्लास झाला आहे. तगड्या बजेटचा ‘आदिपुरुष’ हा चित्रपट फक्त सुरुवातीच्या दिवसांत गाजला. मात्र प्रेक्षकांच्या नकारात्मक प्रतिक्रियांनंतर त्याची कमाई ढासळू लागली. आता नवीन चित्रपट प्रदर्शित झाल्यानंतर ओम राऊत दिग्दर्शित ‘आदिपुरुष’ या चित्रपटाच्या कमाईला मोठा फटका बसला आहे.

‘आदिपुरुष’ची कमाई

दुसरीकडे विकी कौशल आणि सारा अली खान यांचा ‘जरा हटके जरा बचके’ हा चित्रपट कमी बजेटमध्ये बनला आहे. मात्र या चित्रपटाने ‘आदिपुरुष’पेक्षाही दमदार कामगिरी केली आहे. सध्या ‘आदिपुरुष’ला प्रदर्शित होऊन 14 दिवस आणि ‘जरा हटके जरा बचके’ला प्रदर्शित होऊन 28 दिवस झाले आहेत. चौदाव्या दिवशी ‘आदिपुरुष’ने फक्त 90 लाख रुपयांचा गल्ला जमवला आहे. याचसोबत चित्रपटाची आतापर्यंतची एकूण कमाई 281.98 कोटी रुपये इतकी झाली.

सारा-विकीची कमाल

‘जरा हटके जरा बचके’ या चित्रपटात पहिल्यांदाच सारा आणि विकीने एकत्र काम केलं. या नव्या जोडीला प्रेक्षकांकडून भरभरून प्रेम मिळालं. कमी बजेटमध्ये बनलेल्या या चित्रपटाने बॉक्स ऑफिसवर चांगली कमाई केली. प्रदर्शनाच्या 28 व्या दिवशी या चित्रपटाने 50 लाख रुपये कमावले आहेत. तर या चित्रपटाची आतापर्यंतची कमाई 82.31 कोटी रुपये झाली आहे.

कार्तिक आणि कियाराच्या ‘सत्यप्रेम की कथा’ या चित्रपटाने पहिल्या दिवशी 9 कोटी रुपये कमावले आहेत. कार्तिक आणि कियाराच्या ‘भुलभुलैय्या 2’ या चित्रपटाच्या पहिल्या दिवसाच्या कमाईपेक्षा हा आकडा थोडा कमी आहे. ‘भुलभुलैय्या 2’ने प्रदर्शनाच्या दिवशी 14.11 कोटी रुपयांची कमाई केली होती. तर कार्तिकच्या ‘शहजादा’ या चित्रपटापेक्षा ‘सत्यप्रेम की कथा’ने चांगली कमाई केली आहे. ‘शहजादा’ने पहिल्या दिवशी 6 कोटी रुपयांचा गल्ला जमवला होता.