‘कौतुकास पात्र असलेला एकमेव स्टारकिड’; वडिलांच्या अनुपस्थितीत सोनू सूदच्या मुलाने केलेल्या कामाचं कौतुक

Sonu Sood son Ishan Sood

Image Credit source: Instagram

मुंबई : कोरोना महामारी आणि लॉकडाऊनच्या काळात अभिनेता सोनू सूदने गरजूंची खूप मदत केली. मदतीचा हा ओघ त्याने नंतरही कायम ठेवला. सोनूच्या घराबाहेर दररोज मदत मागणाऱ्यांची रांग लागते आणि तो स्वत: त्यांची वैयक्तिक भेट घेऊन तक्रारी ऐकतो. असंख्य गरजूंची मदत करणारा सोनू सूद ‘देवदूत’ म्हणून ओळखू लागला. कोणताही गाजावाजा न करता त्याने मदतीचं हे कार्य सुरू ठेवलं आहे. आता त्याचा मुलगा ईशान सूद हा वडिलांच्या पावलावर पाऊल ठेवत लोकांची मदत करताना दिसून येत आहे. वडिलांच्या अनुपस्थितीत तो त्यांच्या मदतकार्याची जबाबदारी उचलत आहे. ईशानचा हा व्हिडीओ सध्या सोशल मीडियावर व्हायरल होत आहे. त्यावर नेटकऱ्यांकडून कौतुकाचा वर्षाव होत आहे.

या व्हायरल व्हिडीओमध्ये ईशान सूद हा त्याच्या घराबाहेर जमलेल्या लोकांच्या तक्रारी ऐकताना दिसत आहे. त्याच्या आजूबाजूला लोकांनी घोळका केला आहे आणि त्याच्याकडे मदतीची मागणी करताना दिसत आहेत. लोकांच्या गर्दीत तो शांतपणे त्यांच्या समस्या ऐकतोय आणि त्यांच्याशी बोलतोय. या व्हिडीओवर सोनू सूदचे चाहते कमेंट करत ईशानचं तोंडभरून कौतुक करत आहेत.

‘बॉलिवूड अभिनेत्याचा हा असा एकमेव मुलगा आहे ज्याचं कितीही कौतुक केलं तरी कमीच आहे. सोनू सूद आणि त्याच्या कुटुंबीयांवर आम्हाला खूप अभिमान आहे. पालकांचे संस्कार हेच असतात. बॉलिवूडमधील इतर स्टारकिड्स अर्धनग्न कपडे घालून पार्ट्यांमध्ये जाण्यात व्यस्त आहेत आणि दुसरीकडे ईशान वडिलांचं परोपकाराचं काम पुढे नेत आहे’, असं एकाने लिहिलंय. तर ‘हे कुटुंब नेहमीच इतर सर्व मोठ्या सेलिब्रिटींपेक्षा आणि श्रीमंतांपेक्षाही वर राहील. त्यांचं कामच त्यांची ओळख आहे’, असं दुसऱ्या युजरने म्हटलंय. ‘लहान वयात हा मुलगा खूप छान काम करतोय. देव त्याचं आणि त्याच्या कुटुंबीयांचं भलं करो’, असंही नेटकऱ्यांनी लिहिलं आहे.

पहा व्हिडीओ

सोनू सूदने गर्लफ्रेंड सोनालीशी 1996 मध्ये लग्न केलं. या दोघांना ईशान आणि अयान ही दोन मुलं आहेत. ईशानच्या वाढदिवशी सोनूने त्याला महागडी कार भेट दिल्याची मध्यंतरी चर्चा होती. मात्र सोनूने या चर्चांना फेटाळलं होतं.