Subhedar | बॉक्स ऑफिसवर ‘सुभेदार’चा बोलबाला; पाच दिवसांत कमावले इतके कोटी रुपये
केवळ कमाईच्या बाबतीत नाही तर IMDb रेटिंगच्या बाबतही या चित्रपटाने बाजी मारली आहे. IMDb रेटिंगच्या शर्यतीत दिग्पालच्या 'सुभेदार'ने अजय देवगणच्या ‘तान्हाजी : द अनसंग वॉरियर’ला मागे टाकलं आहे.
मुंबई | 30 ऑगस्ट 2023 : बॉक्स ऑफिसवर सध्या ‘गदर 2’ आणि ‘ड्रीम गर्ल 2’ या दोन बॉलिवूड चित्रपटांची जोरदार चर्चा सुरू आहे. कारण गेल्या काही दिवसांत या दोन्ही चित्रपटांनी दमदार कमाई केली आहे. या दोन बॉलिवूड चित्रपटांच्या शर्यतीत ‘सुभेदार’ हा मराठमोळा चित्रपट उल्लेखनीय कामगिरी करताना दिसतोय. 25 ऑगस्ट रोजी प्रदर्शित झालेल्या या चित्रपटाने गेल्या पाच दिवसांत कोट्यवधींची कमाई केली आहे. मोजके शोज आणि बॉलिवूड चित्रपटांकडून तगडी टक्कर असतानाही ‘सुभेदार’ने केलेली कमाई कौतुकास्पद आहे. दिग्पाल लांजेकर दिग्दर्शित या चित्रपटात कलाकारांची मौठी फौज आहे. यामध्ये अजय पूरकरने तान्हाजी मालुसरेंची मुख्य भूमिका साकारली आहे. याशिवाय चित्रपटात स्मिता शेवाळे, चिन्मय मांडलेकर, मृणाल कुलकर्णी, शिवानी रांगोळे, समीर धर्माधिकारी, मृण्मयी देशपांडे, आस्ताद काळे यांच्या महत्त्वपूर्ण भूमिका आहेत.
‘सुभेदार’ने आतापर्यंत जवळपास 6.48 कोटी रुपयांचा गल्ला जमवला आहे. पहिल्या दोन दिवसांत या चित्रपटाने एक कोटी रुपयांपेक्षा अधिक कमाई केली. तर रविवार कमाईचा आकडा 2 कोटींवर पोहोचला.
सुभेदारची आतापर्यंतची कमाई
शुक्रवार- 1.15 कोटी रुपये शनिवार- 1.69 कोटी रुपये रविवार- 2.22 कोटी रुपये सोमवार- 0.72 कोटी रुपये मंगळवार- 0.70 कोटी रुपये एकूण- 6.48 कोटी रुपये
‘सुभेदार’ने अजय देवगणच्या ‘तान्हाजी’ला टाकलं मागे
केवळ कमाईच्या बाबतीत नाही तर IMDb रेटिंगच्या बाबतही या चित्रपटाने बाजी मारली आहे. IMDb रेटिंगच्या शर्यतीत दिग्पालच्या ‘सुभेदार’ने अजय देवगणच्या ‘तान्हाजी : द अनसंग वॉरियर’ला मागे टाकलं आहे. अजय देवगणच्या चित्रपटाला 7.5 IMDb रेटिंग आहे. तर ‘सुभेदार’ला 9.7 रेटिंग मिळाली आहे. अजयचा ‘तान्हाजी’ हा चित्रपटसुद्धा तान्हाजी मालुसरे यांच्यावर आधारित होता. ओम राऊत दिग्दर्शित हा चित्रपट 2020 मध्ये प्रदर्शित झाला होता.
View this post on Instagram
आयएमडीबी म्हणजेच इंटरनेट मुव्ही डेटाबेस. IMDb हा ऑनलाइन डेटाबेस प्लॅटफॉर्म असून त्यावर चित्रपट पाहणारे रसिकप्रेक्षक आपल्या रेटिंगद्वारे एखाद्या कलाकृतीचा दर्जा ठरवतात. 10 हे सर्वाधिक रेटिंग असून चित्रपट, मालिका, वेब सीरिज, व्हिडीओ गेम्स अशा विविध गोष्टींना इथं रेटिंग देता येतं. आयएमडीबीचं रेटिंग जितकं अधिक तितका तो चित्रपट, मालिका किंवा वेब सीरिज लोकांना भावल्याची पोचपावती असते.
