तुनिशा शर्मा हिला पैशांची चणचण? या मैत्रिणीकडून घेतले होते उधार पैसे
शीजान खान याच्या बहिणींनी तुनिशाच्या आईवर अनेक आरोप केले.
मुंबई : टीव्ही अभिनेत्री तुनिशा शर्मा आत्महत्या प्रकरणात दररोज धक्कादायक खुलासे होताना दिसत आहेत. तुनिशाच्या आत्महत्येनंतर तिच्या आईने शीजान खान याच्यावर गंभीर आरोप केले. शीजान हा सध्या न्यायालयीन कोठडीमध्ये आहे. पोलिसांनी शीजान खान याचा फोनही जप्त केला आहे. तुनिशा शर्मा हिच्या आईने शीजान खान याच्यावर लावलेल्या गंभीर आरोपांनंतर शीजान खान याच्या कुटुंबियांनी देखील तुनिशा शर्मा हिच्या आईवर गंभीर आरोप केले आहेत. 23 डिसेंबरला मालिकेच्या सेटवर गळफास घेत तुनिशाने आत्महत्या केली.
शीजान खान याच्या बहिणींनी सांगितले होते की, तुनिशाला तिची आई कंट्रोल करत होती. इतकेच नाहीतर तिचे आणि तिच्या आईचे संबंध अजिबात चांगले नव्हते. शीजान खान याच्या बहिणींनी तुनिशाच्या आईवर अनेक आरोप केले.
आता तुनिशा हिच्या मैत्रिणीने तुनिशाबद्दल एक मोठा खुलासा केला आहे. सोनिया सिंह हिने म्हटले आहे की, तुनिशाकडे कायमच पैशांची चणचण असायची, तिच्याकडे पैसे नसायचे.
गेल्या महिन्यात तुनिशाने माझ्याकडून 3 हजार मागितले होते. मी तिला विचारले की, काय झाले…यावर तुनिशा म्हणाली होती की, माझ्याकडे पैसे नाहीयेत. सोनिया म्हणाली, तुनिशाला जेंव्हा केंव्हा वेळ मिळायचा त्यावेळी ती मला फोन कायमच करायची.
14 डिसेंबरला देखील तुनिशा हिने सोनियाला तिच्या आणि शीजान खान याच्या रिलेशनमध्ये काय सुरू आहे याची माहिती दिली होती. शीजानला काही दिवस स्पेस पाहिजे असल्याचे तुनिशाने सोनियाला सांगितले होते.
सोनियाने पुढे म्हटले की, 23 डिसेंबरला मला तुनिशाचा फोन आला होता. यावेळी तुनिशाने मला म्हटले होते की, माझ्या आईचा तुला फोन आला तर सांग मी तुझ्यासोबत आहे. यावेळी मला काहीच समजले नव्हते की, तुनिशाने तिच्या आईला खोटे बोलण्यास मला का सांगितले होते.