‘आई कुठे काय करते’ मालिकेत होणार ‘या’ सुप्रसिद्ध अभिनेत्रीची एण्ट्री
'या' अभिनेत्रीच्या एण्ट्रीने अरुंधती-आशुतोषच्या नात्यात येणार नवं वळण; मालिकेत मोठा ट्विस्ट
मुंबई: स्टार प्रवाह वाहिनीवरील ‘आई कुठे काय करते’ या मालिकेने दमदार कथानकामुळे आणि कलाकारांच्या उत्तम अभिनयामुळे प्रेक्षकांची मनं जिंकली आहेत. या मालिकेचं कथानक आता अतिशय उत्कंठावर्धक वळणावर येऊन पोहोचलं आहे. आशुतोषच्या वाढदिवसी अरुंधती त्याच्याबाबत मोठा निर्णय घेणार होती. मात्र अनुष्काच्या एण्ट्रीने अरुंधतीला तिच्या निर्णयावर पुन्हा एकदा विचार करावा लागणार आहे. अनुष्का ही आशुतोषची खूप जुनी मैत्रीण आहे. बऱ्याच वर्षांनंतर या दोघांची पुन्हा भेट होणार आहे. त्यामुळे तिच्या एण्ट्रीने मालिकेत मोठा ट्विस्ट येणार हे नक्की.
या मालिकेत अनुष्काची भूमिका सुप्रसिद्ध अभिनेत्री स्वरांगी मराठे साकारणार आहे. या भूमिकेबद्दल स्वरांगी म्हणाली, “मी या मालिकेची खूप मोठी चाहती आहे. खऱ्या आयुष्यात मी दोन मुलांची आई असल्यामुळे ‘आई काय करू शकते’ याचा अनुभव मी घेतच आहे. त्यामुळे मला जेव्हा अनुष्काच्या भूमिकेसाठी विचारलं गेलं, तेव्हा मी क्षणाचाही विलंब न करता होकार दिला.”
View this post on Instagram
“कुटुंबीयांची साथ असेल तर कोणतीही गोष्ट अवघड नसते. तू सध्या काय करतेय हा प्रश्न मला गेल्या कित्येक दिवसांपासून विचारला जायचा. आता मी अभिमानाने सांगू इच्छिते की मी लोकप्रिय मालिका ‘आई कुठे काय करते’मध्ये अनुष्का ही भूमिका साकारतेय.”
स्वरांगीच्या शूटिंगच्या पहिल्याच दिवशी यश म्हणजेच अभिनेता अभिषेक देशमुखने तिची सेटवर सर्वांची ओळख करून दिली. सेटवर खूपच सकारात्मक वातावरण असल्याचं स्वरांगीने यावेळी सांगितलं.
अनुष्काच्या एण्ट्रीने अरुंधती आणि आशुतोषच्या नात्यात कोणतं वळण येणार हे पाहणं औत्सुक्याचं ठरणार आहे. ही मालिका सोमवार ते शनिवार संध्याकाळी 7.30 वाजता स्टार प्रवाह वाहिनीवर प्रेक्षकांच्या भेटीला येते.
