Tiger 3 Teaser | जब तक टाइगर मरा नहीं, तब तक.. टायगर 3 चा जबरदस्त टीझर पाहिलात का?

Tiger 3

Image Credit source: Youtube

मुंबई | 27 सप्टेंबर 2023 : सलमान खान आणि कतरिना कैफ यांच्या आगामी ‘टायगर 3’ या चित्रपटाची प्रेक्षकांमध्ये प्रचंड उत्सुकता आहे. येत्या दिवाळीच्या मुहूर्तावर हा चित्रपट प्रेक्षकांच्या भेटीला येणार आहे. त्यापूर्वी ‘टायगर 3’चा दमदार टीझर प्रदर्शित झाला आहे. या चित्रपटाच्या निमित्ताने सलमान आणि कतरिनाची लोकप्रिय जोडी पुन्हा एकदा मोठ्या पडद्यावर एकत्र झळकणार आहे. त्यामुळे दोघांचे चाहते फार उत्सुक आहेत. ‘टायगर’ आणि ‘टायगर 2’ या दोन्ही चित्रपटांना प्रेक्षकांकडून दमदार प्रतिसाद मिळाला होता. त्यामुळे या जोडीला पुन्हा एकदा एकत्र पाहण्याची उत्सुकता चाहत्यांमध्ये होती. ‘टायगर 3’च्या टीझरची सुरुवात सलमान खानच्या आवाजाने होते.

‘माझं नाव अविनाश सिंह राठोड आहे. पण तुम्हा सर्वांसाठी मी टायगर आहे’, अशा डायलॉगने या टीझरची सुरुवात होते. त्याचसोबतच सलमानचा दमदार लूक समोर येतो. या टीझरमध्ये टायगरच्या भूमिकेतील सलमान पुढे म्हणतो की, “मी 20 वर्षे सर्वकाही पणाला लावून देशाची सुरक्षा केली. त्याबदल्यात मी आजवर काहीच मागितलं नाही, पण आता मागतोय. आज तुम्हा सर्वांना असं सांगितलं जातंय की टायगर तुमचा शत्रू आहे. टायगर देशद्रोही आहे. टायगर शत्रू नंबर वन आहे. त्यामुळे 20 वर्षांच्या देशसेवेनंतर मी माझा कॅरेक्टर सर्टिफिकेट मागतोय. माझ्या मुलाला मी नाही तर इंडिया सांगणार की त्याचा बाप कोण होता? गद्दार की देशभक्त.” जवळपास दीड मिनिटाचा हा टीझर चित्रपटाच्या कथेविषयी प्रचंड उत्सुकता निर्माण करतो.

पहा टीझर

टायगर 3 या चित्रपटाचा टीझर प्रदर्शित होण्याआधी सलमान खानने मंगळवारी रात्री त्याच्या सोशल मीडिया अकाऊंटवर एक फोटो पोस्ट केला होता. या फोटोमध्ये सलमानचे फक्त डोळे दिसत होते. ‘एक संदेश देतो.. उद्या.. टायगरचा मेसेज उद्या सकाळी 11 वाजता’, असं त्याने या फोटोच्या कॅप्शनमध्ये लिहिलं होतं. हा बहुप्रतिक्षित आणि बहुचर्चित चित्रपट दिवाळीच्या मुहूर्तावर हिंदी, तमिळ आणि तेलुगू भाषांमध्ये प्रदर्शित होणार आहे.