आज स्वत:साठी उभा रहा..; ‘बिग बॉस मराठी 5’च्या सदस्यासाठी विशाखा सुभेदारची पोस्ट
बिग बॉस मराठीच्या पाचव्या सिझनमध्ये 16 स्पर्धक सहभागी झाले आहेत. त्यापैकी पुरुषोत्तमदादा पाटील हे पहिल्याच आठवड्यात घराबाहेर पडले. त्यानंतर अभिनेत्री विशाखा सुभेदारने बिग बॉसच्या घरातील एका सदस्यासाठी खास पोस्ट लिहिली आहे.
कलर्स मराठी वाहिनीवरील ‘बिग बॉस मराठी’चा पाचवा सिझन सध्या चांगलाच गाजतोय. अगदीच पहिल्याच एपिसोडपासून या शोने प्रेक्षकांना खिळवून ठेवलं आहे. बिग बॉसच्या घरात 16 स्पर्धक सहभागी झाले असून प्रत्येकाची पार्श्वभूमी वेगवेगळी आहे. अशातच सोशल मीडियाद्वारे काहींना चांगला पाठिंबा मिळतोय. अभिनेत्री विशाखा सुभेदारने ‘बिग बॉस मराठी 5’च्या घरातील एका सदस्यासाठी इन्स्टाग्रामवर खास पोस्ट लिहिली आहे. या पोस्टमधून तिने त्या सदस्याला मोलाचा सल्लासुद्धा दिला आहे. विशाखाने तिची ही पोस्ट पंढरीनाथ कांबळेसाठी लिहिली आहे. ‘मैत्री दिना’चं औचित्य साधत आधी तिने त्याला शुभेच्छा दिल्या आणि त्यानंतर त्याच्यासाठी खास संदेश लिहिला आहे.
विशाखा सुभेदारची पोस्ट-
‘हॅपी फ्रेंडशिप डे मित्रा.. तू तिथे त्यांच्यासारखा नसलास तरीही तू खूप खास आहेत, वेगळा आहेस, सज्जन आहेस. तारेवरची कसरत तुला कायमच जमलीय. तिथेही तू मैत्री कर आणि ती निभव.. तुझ्यातली प्लस पॉईंट्स दाखवून दे. गप्प बसू नकोस. यारों का यार हैं तू, तुझ्या माणसासाठी तू उभा असतोस मदतीला, आज स्वत:साठी उभा रहा मित्रा. तुला खूप बळ मिळो पॅडी कांबळे’, अशी पोस्ट तिने लिहिली आहे. विशाखाच्या या पोस्टवर नेटकऱ्यांकडून विविध प्रतिक्रिया येत आहेत. या प्रतिक्रियांमध्ये अनेकांनी विशाखाला बिग बॉसच्या घरात पाहण्याची इच्छा व्यक्त केली. तर काहींनी पंढरीनाथ कांबळेच विजेता ठरणार, असा विश्वास व्यक्त केला आहे.
View this post on Instagram
बिग बॉस मराठीच्या घरात दररोज एक नवीन वाद पहायला मिळतोय. पहिल्या दिवसापासून शांत असलेल्या सूरजचं जान्हवीसोबत कडाक्याचं भांडण झालं. त्यानंतर घरात दोन गट पडले आहेत. एकीकडे सूरज आणि जान्हवीचं भांडण पहायला मिळालं. तर दुसरीकडे पंढरीनाथ आणि घन:श्याम दराडे यांच्यातदेखील वादाची ठिणगी पडलेली पहायला मिळाली. पंढरीनाथ घन:श्यामला बोलतो, “तुला लाज नाही का वाटत? बिग बॉस आपल्याविरोधात बोलत आहे.” त्यावर घन:श्यामदेखील त्याला प्रत्युत्तर देतो.
