तुमच्या एसीने ८ तासात किती वीज वापरली? जाणून घेतल्यावर थक्क व्हाल !

जर तुम्ही रोज ८ तास एसी वापरत असाल, तर बिलाची वाढ पाहून तुम्हाला धक्का बसेल. आता, हेच गणित समजून घेत, बिल कमी करण्यासाठी कोणती स्मार्ट टिप्स आहेत, हे जाणून घ्या!

साक्षी कणसे | Updated on: Apr 27, 2025 | 6:49 PM

उन्हाळ्याचा तडाखा वाढला की घराघरात एअर कंडिशनर चालू होतात. उन्हामुळेही आणि आरामासाठीही एसीचे महत्त्व वाढते, पण महिन्याच्या शेवटी येणारे वीज बिल पाहून अनेकांचा चेहरा पडतो. कारण एसीमुळे वीजचा वापर खूप वाढतो, आणि बिलही अधिक येतं. तुम्हाला कधी प्रश्न पडला आहे का, की तुमचा एसी रोज ८ तास चालवल्यास किती वीज वापरतो आणि त्याचा तुमच्या वीज बिलावर काय परिणाम होतो?

एसी किती वीज वापरतो?

एसीचे वीज वापरणे हे काही गोष्टींवर अवलंबून असते. एसीची क्षमता, त्याचा प्रकार (इन्व्हर्टर किंवा नॉन-इन्व्हर्टर), आणि स्टार रेटिंग यावर वीज वापर ठरतो. समजा तुमच्याकडे १.५ टनचा एसी आहे आणि तुम्ही तो रोज ८ तास चालवता. अशा परिस्थितीत, हा एसी दिवसाला साधारणतः १२ युनिट वीज वापरतो. एका महिन्यात, ८ तास रोज चालवल्यास, तुमचा वीज वापर ३६० युनिटपर्यंत पोहोचू शकतो. आणि जर वीज दर ₹८ प्रति युनिट असेल, तर फक्त एसीसाठी तुमचं वीज बिल ₹२,८८० येऊ शकतं.

वाढलेल्या बिलावर नियंत्रण कसं ठेवाल?

तुम्ही एसी वापरत असताना वीज बिल नियंत्रणात ठेवण्यासाठी काही सोप्या टिप्स अनुसरण करू शकता. उदाहरणार्थ, इन्व्हर्टर एसी वापरणं हे अधिक फायदेशीर ठरू शकतं, कारण ते वीज बचत करतात. तरी, नवीन एसी घेताना नेहमी ५-स्टार रेटिंग असलेला एसी निवडा, कारण अधिक स्टार असलेला एसी वीज बचतीच्या बाबतीत अधिक प्रभावी असतो.

हे सुद्धा वाचा

तापमान काय ठेवाल?

एसीचा तापमान सुद्धा वीज वापरावर प्रभाव टाकतो. एसी नेहमी २४°C ते २६°C दरम्यान ठेवणे अधिक योग्य ठरते. यामुळे तुमचं घर आरामदायक ठरते आणि वीज खर्चही कमी होतो. जर तुम्ही एसी १८°C किंवा २०°C वर सेट केला, तर कॉम्प्रेसरवर अधिक ताण येतो, आणि वीज जास्त खर्च होतो.

एसीच्या वीज वापरावर होणारे खर्च: एक साधं गणित

समजा तुमच्याकडे १.५ टन एसी आहे आणि तुम्ही तो रोज ८ तास चालवता. एका तासात १५०० वॅट (१.५ किलोवॅट) वीज वापरणारा एसी ८ तासांमध्ये १२,००० वॅट-तास वापरतो, जो १२ युनिट्स बनवतो. त्यानुसार, महिन्याच्या शेवटी तुमचा वीज खर्च ३६० युनिट्स (₹२,८८०) होऊ शकतो.