‘आम्ही काय आता खुरपणीला जायचं का?’, अजित पवार यांचा दिव्यांगांना सवाल

उपमुख्यमंत्री अजित पवार यांचा एक व्हिडीओ सध्या सोशल मीडियावर व्हायरल होत आहे. या व्हिडीओत अजित पवार दिव्यांगांना आम्ही काय खुरपणीला जायचं का? असा सवाल करताना दिसत आहेत. अजित पवार यांच्याकडे काही दिव्यांग बांधव आपल्या मागण्यांचं निवेदन घेऊन गेले होते. यावेळी अजित पवार यांनी त्यांचं निवेदन वाचत “आम्ही काय आता खुरपणीला जायचं का?” असा सवाल केला. अजित पवार यांच्याकडे दिव्यांगांनी आम्हाला 2 टक्के राजकीय आरक्षण द्या, अशी मागणी करणारं निवेदन दिलं होतं. यावेळी अजित पवारांनी निवेदन वाजताना संबंधित वक्तव्य केलं. तसेच जनतेचा पाठिंबा असेल तर दिव्यांग लोकप्रतिनिधी सुद्धा वाढू शकतात, असंदेखील अजित पवार यावेळी म्हणाले.

अमरावती विधानसभा मतदारसंघातील विविध विकास कामाच्या भूमिपूजनासाठी उपमुख्यमंत्री अजित पवार आज अमरावतीच्या दौऱ्यावर आहेत. या दौऱ्यादरम्यान अमरावतीच्या निजोयन भवन येथे अजित पवार यांच्यासमोर प्रहार अपंग क्रांती संघटनेच्या कार्यकर्त्यांनी आणि अपंगांनी आपल्या मागण्या अजित पवार यांच्यासमोर ठेवल्या. या मागणीच्या निवेदनात निवडणुकीत दिव्यागांना 2 टक्के राजकीय आरक्षण हे दिले पाहिजे, अशी मागणी होती. यावेळी अजित पवार यांनी आम्ही मग खुरपणी करायला जायचं का? असा प्रश्न उपस्थित केला.

“दिव्यांगाना राजकीय आरक्षण? काय चाललंय यार? आम्ही काय आता खुरपणीला जायचं काय? तुम्ही स्वत: राजकारणात उतरु शकता. जनतेचा तुम्हाला पाठिंबा असेल तर शंभर टक्के तुम्ही लोकप्रतिनिधी बनू शकता”, असं अजित पवार म्हणाले. अजित पवार हे स्पष्टवक्ते आहेत. ते जे काही असेल ते स्पष्टपणे आणि तोंडावर बोलतात. त्यांचा रोखठोक स्वभाव हा सर्वश्रूत आहे. अजित पवार यांचा आज दिव्यांगांसोबत बोलतानाचा हा क्षण कॅमेऱ्यात अचूकपणे कैद झाला आहे.