Aurangabad | धुळे-सोलापूर हायवेचे 24 एप्रिल रोजी लोकार्पण, मंत्री नितीन गडकरी येणार, आणखी कोणत्या कामांना मुहूर्त?
औरंगाबादमधील महत्त्वाचा मार्ग म्हणजे धुळे-सोलापूर हायवे (Dhule Solapur Highway). औरंगाबादमार्गे जाणाऱ्या धुळे-सोलापूर हायवेचे लोकार्पण केंद्रीय मंत्री नितीन गडकरी (Nitin Gadkari) यांच्या हस्ते येत्या 24 एप्रिल रोजी होणार आहे.
औरंगाबाद: नागपूर-मुंबई समृद्धी महामार्गाच्या पहिल्या टप्प्याचे लोकर्पण येत्या 2 मे रोजी होणार असल्याचं नगरविकास मंत्री एकनाथ शिंदे (Eknath Shinde) यांनी सांगितलं. औरंगाबादमधील समृद्धी महामार्गाची पाहणीदेखील त्यांनी केली. औरंगाबादमधील दुसरा महत्त्वाचा मार्ग म्हणजे धुळे-सोलापूर हायवे (Dhule Solapur Highway). औरंगाबादमार्गे जाणाऱ्या धुळे-सोलापूर हायवेचे लोकार्पण केंद्रीय मंत्री नितीन गडकरी (Nitin Gadkari) यांच्या हस्ते येत्या 24 एप्रिल रोजी होणार आहे. शहरातील जाबिंदा ल़न्स किंवा एसएफएस मैदानावर हा सोहळा रंगणार आहे. केंद्रीय अर्थ राज्यमंत्री डॉ. भागवत कराड यांनी ही माहिती दिली. सोलापूर ते औरंगाबादमार्गे धुळे हा एन एच 211 अंतर्गत शहराबाहेरून जाणारा महामार्ग वाहुतकीसाठी खुला झाला असून त्याचा लोकार्पण सोहळा नितीन गडकरी यांच्या हस्ते होईल. एनएच 211 सह चार पूर्ण झालेल्या रस्त्यांचे लोकार्पण आणि जिल्ह्यातील इतर महत्त्वाच्या कामांचे भूमीपूजनदेखील नितीन गडकरी करतील. अनेक दिवसानंतर भाजपचे ज्येष्ठ नेते नितीन गडकरी शहरात येणार असल्याने त्यांच्या या दौऱ्याची जय्यत तयारी सध्या औरंगाबादेत सुरु आहे.
बीड बायपास वरील ताण कमी
नव्याने तयार झालेल्या धुळे सोलापूर हायवेमुळे शहरातून जाणाऱ्या बीड बायपासवरील जड वाहतूकीचा ताण पूर्णपणे कमी झाला आहे. 21 डिसेंबर रोजी हा महामार्ग पूर्ण झाला. औरंगाबादमधून जाणाऱ्या या महामार्गावरील 30 किमीच्या अंतरात 1 पूल आहे. तर 2 पूल नव्याने बांधले आहेत. 10 ठिकाणी सर्व्हिस रोड आहेत. 8 अंडरपास आहेत. 4 पादचारी मार्ग, जनावरांसाठी 1 मार्ग, 2 जंक्शन्स आहेत. यात कुठेही ओव्हर ब्रिज नाही.
कोणत्या कामांचे भूमीपूजन?
-औरंगाबाद ते पैठण या राष्ट्रीय महामार्गाचे चौपदरीकरण कामाचे भूमीपूजन होईल. 1670 कोटी रुपयांतून हा प्रकल्प साकारला जाईल.
– दौलताबाद टी पॉइंट ते माळीवाडा ते रंगारी देवगावमार्गे शिऊर दुपदरी रस्त्याचे डांबरीकरण, 185 कोटींतून हा प्रकल्प साकारला जाईल.
– कसाबखेडा ते देवगाव रंगारी रस्त्याचे दुपदरीकरातून डांबरीकरण, 31 कोटींतून हा रस्ता साकारला जाईल.
– चिखली दाभाडीमार्गे तळेगाव ते पाल फाटा दुपदरी रस्त्याचे सिमेंट काँक्रिटीकरण, 350 कोटींतून हा प्रकल्प साकारला जाईल.
अखंड उड्डाणपूलाचे काय?
चिकलठाणा ते वाळूज या अखंड उड्डाणपूलाचे काय होते, याकडेही औरंगाबादकरांच्या नजरा लागल्या आहेत. मात्र अद्याप या प्रकल्पाचा डीपीआर तयार झालेला नाही, अशी माहिती डॉ. भागवत कराड यांनी दिली. केंद्रीय नगरविकास खात्याने त्या पुलावरूनच मेट्रो मार्गासाठी तत्त्वतः मान्यता दिली. यासाठी साडेसात कोटींतून संयुक्त डीपीआर होत असून 30 लाख रुपये संस्थेला दिल्याचे डॉ. कराड यांनी सांगितले.
इतर बातम्या-