PHOTO: मराठवाड्यात एसटी कर्मचाऱ्यांचं आंदोलन चिघळलं, औरंगाबादेत डेपोत अर्धनग्र आंदोलन
राज्यभरात सुरु असलेल्या एसटी कर्मचाऱ्यांच्या आंदोलनाचे पडसाद मराठवाड्यातील औरंगाबादसह, जालना, बीड, उस्मानाबाद, लातूर, हिंगोली जिल्ह्यातही दिसून येत आहेत.
राज्यभरातील एसटी कर्मचाऱ्यांनी पुकारलेलं आंदोलन आता चांगलंच चिघळलं आहे. या संपात सहभागी झालेल्या औरंगाबाद आगारातील सर्व कर्मचाऱ्यांनी अर्धनग्न अवस्थेत आंदोलन सुरु केलं आहे. मंगळवारी सकाळपासूनच कर्मचाऱ्यांनी आपल्या मागण्या मान्य करण्यासाठी तीव्र निदर्शनं सुरु केली आहेत.
कर्मचाऱ्यांच्या संपामुळे मराठवाड्यातील 47 आगारातील तब्बल 4 हजार बसची सेवा ठप्प झाली आहे. त्यामुळे एसटी महामंडळाचा दररोज सरासरी 1 कोटी 50 लाख रुपयांचा महसूल बुडत आहे.
ऐन दिवाळीत संप असल्यामुळे प्रवाशांची तारांबळ उडत आहे. ग्रामीण भागातून खासगी वाहनांनी लोक बस स्थानकात पोहोचत आहे, मात्र बसच बंद असल्यामुळे खासगी वाहनांनी प्रवाशांना जावे लागत आहे. जालना जिल्ह्यात 1700 कर्मचारी संपावर गेल्यामुळे दोन दिवसांपासून 287 बस बंद आहेत. यामुळे जिल्ह्याला 36 लाख रुपयांचा फटका बसला आहे.
बीडः बसचालक आणि वाहकांचा संप सलग चौथ्या दिवशीही सुरु असल्याने बीडमधील प्रवाशांचेही हाल झाले. दिवसभरात विभागातील 1085 फेऱ्या रद्द झाल्याने 51 लाख रुपयांचे उत्पन्न बुडाले. बस बंद असल्याने प्रवाशांनी खासगी वाहतुकीचा आधार घेतला. मात्र संपाच्या संधीचा फायदा घेत खासगी वाहतूकदारांनी मनमानी करत तिप्पट ते चौपट भाडे आकारले. सणानिमित्त गावी गेलेल्या प्रवाशांना मात्र यामुळे मोठा मनःस्ताप सहन करावा लागला.
हिंगोलीतही 1 नोव्हेंबर पासून एसटी महामंडळातील चालक, वाहक आणि यांत्रिक विभागातील कर्चमाऱ्यांनी लढा विलिनीकरणाचा हे आंदोलन सुरु केले आहे. जोपर्यंत एसटी महामंडळाचे राज्य शासनात विलीनीकरण होत नाही, तोपर्यंत संप मागे घेतला जाणार नाही, अशी भूमिका आंदोलकांनी घेतली आहे.
bus