Maharashtra Breaking News LIVE : नालासोपाऱ्यात भरारी पथकाची मोठी कारवाई, नक्की काय झालं?

राहुल गांधी उद्या झारखंडमधील सिमडेगा आणि लोहरदगा येथे जाहीर सभा घेणार

राहुल गांधी 8 नोव्हेंबरला झारखंडच्या सिमडेगा आणि लोहरदगा येथे जाहीर सभा घेणार आहेत. राहुल गांधी 9 नोव्हेंबरला झारखंडमध्ये सभा आणि रोड शोही करू शकतात. मिळालेल्या माहितीनुसार, एक सभा डाल्टनगंज आणि दुसरी हजारीबागमध्ये होणार आहे, तर जमशेदपूरमध्ये त्यांचा रोड शोही प्रस्तावित आहे.

शाहरुख खानला धमकी देणारा आरोपी फैजान अटकेत

सूत्रांनी दिलेल्या माहितीनुसार, बॉलिवूड अभिनेता शाहरुख खानला धमकी देणाऱ्या व्यक्तीला ताब्यात घेण्यात आले आहे. फैजान नावाच्या व्यक्तीने शाहरुख खानला धमकी दिली. धमकी देणाऱ्या व्यक्तीचे ठिकाण छत्तीसगडमधील रायपूर होते. वांद्रे पोलिस ठाण्यात गुन्हा दाखल करण्यात आला आहे.

बाबा सिद्दीकी हत्येप्रकरणी मुंबई गुन्हे शाखेने आणखी दोन आरोपींना अटक केली

बाबा सिद्दीकी हत्या प्रकरणातील आणखी दोन आरोपींना मुंबई गुन्हे शाखेने अटक केली आहे. दोन्ही आरोपींना पुण्यातून अटक करण्यात आली आहे. आतापर्यंत एकूण 18 आरोपींना अटक करण्यात आली आहे. अटक करण्यात आलेला आरोपी प्रवीण लोणकरच्या संपर्कात होता. दोन्ही आरोपींना लपवण्यासाठी प्रवीण लोणकर याने 30 हून अधिक काडतुसे दिली होती.

ई-कॉमर्स कंपन्यांशी संबंधित सुमारे 20 ठिकाणी ईडीने छापे टाकले

ई-कॉमर्स कंपन्यांशी संबंधित सुमारे 20 ठिकाणी ईडीचे छापे पडत आहेत. दिल्ली, मुंबई, हैदराबादसह अनेक शहरांमध्ये छापेमारी सुरू आहे.

नालासोपाऱ्यात भरारी पथकाची मोठी कारवाई, नक्की काय झालं?

विधानसभा निवडणुकीच्या पार्श्वभूमीवर भरारी पथकाने नालासोपाऱ्यात मोठी कारवाई केली आहे. भरारी पथकाने साडेतीन कोटींची रोकड असलेली एटीएम व्हॅन ताब्यात घेतली आहे. भरारी पथकाने एटीएम गाडी नालासोपारा पोलीस ठाण्यात नेली आहे. तिथे आता सविस्तर चौकशी सुरु आहे. या रोकडेचा हिशोब मिळत नसल्याने पोलिसांकडून ही रक्कम निवडणुकीच्या वापरासाठी आली आहे का? या अनुषगांने चौकशी केली जात आहे.

मनसेचे अखिल चित्रे यांचा ठाकरे गटात प्रवेश

राजकीय वर्तुळातून मोठी बातमी समोर आली आहे. मनसेचे अखिल चित्रे यांनी ठाकरे गटात प्रवेश केला आहे. आदित्य ठाकरे यांच्या उपस्थितीत अखिल चित्रे यांनी ठाकरे गटात प्रवेश केलाय.

किशनचंद तनवाणी शिंदे गटात प्रवेश करण्याची शक्यता

किशनचंद तनवाणी शिंदे गटात प्रवेश करण्याची शक्यता आहे. तनवाणी 10 तारखेच्या आसपास शिंदे गटात जाणार असल्याची माहिती आहे. किशनचंद तनवाणी यांचा प्रवेश जवळजवळ निश्चित आहे. किशनचंद तनवाणी हे ठाकरे गटाचे जिल्हाप्रमुख होते. तनवाणी यांनी विधानसभा निवडणुकीतुन माघार घेतली होती.

अजित पवार प्रकाश आंबेडकरांच्या भेटीसाठी निवासस्थानी दाखल

अजित पवार प्रकाश आंबेडकरांच्या भेटीसाठी दाखल. काही दिवसांपूर्वीच प्रकाश आंबेडकरांवर अँजिओप्लास्टी करण्यात आली होती.

भोकर मध्ये भाजप विरुद्ध काँग्रेस नाही तर हुकूमशहा विरुद्ध लढत आहे – नाना पटोले

भोकर मध्ये भाजप विरुद्ध काँग्रेस नाही तर हुकूमशहा विरुद्ध लढत आहे असं वक्तव्य नाना पटोले यांनी केलं आहे.

काँग्रेसच्या जीवावर पद भोगली, आणि निवडणुकीच्या अगोदर भाजपात गेले. ज्या काँग्रेसने मोठं केलं त्या काँग्रेसला शिव्या घालतात, अशो चव्हाणांवर पटोलेंची टीका.

महिलांचा आर्थिक सामाजिक विकास होईल तेव्हाच देशाचा विकास – देवेंद्र फडणवीस

समाजातील घटकांचा विचार करणारे सरकार आहे.  महिलांचा आर्थिक सामाजिक विकास होईल तेव्हाच देशाचा विकास होईल.

महाराष्ट्रामध्ये 11 लाख महिला लखपती दीदी झाल्यात, लवकरच 25 लाख मग एक कोटी महिला लखपती करणार, देवेंद्र फडणवीसांचे आश्वासन

विधानसभा निवडणुकीच्या तोंडावर शिंदे गटाला मोठा धक्का,

विधानसभा निवडणुकीच्या तोंडावर शिंदे गटाला मोठा धक्का, वरळीतील शिंदे गटाच्या पदाधिकाऱ्याचा ठाकरे गटात प्रवेश

आंबेगावचे पाणी कर्जत जामखेडला घेऊन जाण्यावरुन राजकरण तापले..

रोहित पवारांच्या मदतीने देवदत्त निकम आंबेगावचे पाणी कर्जत जामखेडला घेऊन जाण्याचा घाट घालत असल्याचा गंभीर आरोप दिलीप वळसे पाटीलांचे पुतणे विवेक वळसे पाटलांनी केला आहे. आता विधानसभेच्या निवडणुकीत पाण्यावरुन राजकारण सुरु झालंय.

सदाभाऊ खोत यांच वक्तव्य ऐकल्यावर दु:ख झालं – छगन भुजबळ

सदाभाऊ खोत यांच वक्तव्य ऐकल्यावर दु:ख झालं.  महाराष्ट्रात अशी वक्तव्य करणं टाळलं पाहिजे असा सल्ला छगन भुजबळ यांनी दिला आहे.

पिंपरी-चिंचवड पोलिसांनी 34 लाखांची रक्कम केली हस्तगत

पिंपरी-चिंचवड पोलिसांनी 34 लाखांची रक्कम हस्तगत केली आहे. नाकाबंदीदरम्यान कॅश पिकअप डिलिव्हरी व्हॅनमधून पैसे हस्तगत करण्यात आले आहेत.

शाहरुख खान याला जीवे मारण्याची धमकी

सलमान खाननंतर शाहरुख खान याला ही जीवेमारण्याची धमकी आलेली आहे. रायपूर येथुन ही धमकी आलेली असल्याचे म्हटले जात आहे.

किनवटसाठी मविआने एक रुपयाही निधी दिला नाही- देवेंद्र फडणवीस

किनवटमध्ये महायुतीचे उमेदवार भीमराव केराम यांच्या फडणवीस यांची सभा सुरु, मविआने निधी दिला नाही, परंतू महायुती सरकार किनवटला पाणीदार करणार असे आश्वासन देवेंद्र फडणवीस यांनी दिले आहे.

मविआ कार्यकर्ते विक्रोळी पोलीस ठाण्यासमोर

विक्रोळी विधानसभेचे महाविकास आघाडीचे उमेदवार सुनील राऊत यांच्यावर  महायुतीच्या उमेदवार सुवर्णा करंजे यांनी आक्षेपार्ह्य विधान केल्याबद्दल विक्रोळी पोलीस ठाण्यात गुन्हा दाखल केला आहे. त्याला प्रतिउत्तर म्हणून आता महाविकास आघाडीचे कार्यकर्ते प्रचार रॅली घेऊन विक्रोळी पोलीस ठाण्यासमोर आले आणि तिथे पोलीस ठाण्याला घेराव घातला आहे.

उद्धव ठाकरे यांच्या जाहीर सभा

उद्धव ठाकरे 13 नोव्हेंबर रोजी सिंधुदुर्ग जिल्ह्यात येत आहे. सिंधुदुर्ग जिल्ह्यातील तिन्ही विधानसभा मतदार संघात उद्धव ठाकरे घेणार जाहीर सभा होणार आहे. सकाळी 11.30 वाजता सावंतवाडी, दुपारी 1.00 वाजता कणकवली संध्याकाळी 4.00 वाजता मालवण येथे जाहीर सभा होणार आहे.

मैत्रीपूर्ण लढती, महायुतीची आज बैठक

महायुतीची आज महत्वाची बैठक होणार आहे. या बैठकीत मैत्रीपूर्ण लढतीबाबत चर्चा करण्यात येणार आहे.

किनवट येथे देवेंद्र फडणवीस यांची सभा

किनवट विधानसभा मतदारसंघाचे आमदार भाजापाचे उमेदवार भिमराव केराम यांच्या प्रचारार्थ देवेंद्र फडणवीस यांची सभा होत आहे. या मतदारसंघात राष्ट्रवादी शरद पवार गटाकडून माजी आमदार प्रदीप नाईक यांना उमेदवारी दिली आहे.

शेखर गोरे यांना फडणवीस यांचे आश्वासन?

शिवसेना उद्धव बाळासाहेब ठाकरे गटाचे सातारा जिल्हा संपर्कप्रमुख शेखर गोरे यांनी घेतली उपमुख्यमंत्री देवेंद्र फडणवीस यांची भेट घेतली आहे. भेटीदरम्यान शेखर गोरे यांना आगामी काळामध्ये विधान परिषदेवर घेणार असल्याचा उपमुख्यमंत्री देवेंद्र फडणवीस यांनी शब्द दिल्याची माहिती सूत्रांनी दिली.

सगळ्यात चांगले उद्योग आमच्या काळामध्ये आले – सुभाष देसाई

“सगळ्यात चांगले उद्योग आमच्या काळामध्ये आले. महायुतीच्या काळामध्ये हे सगळे उद्योग बाहेर फेकले गेले. त्यामुळे आमचा थेट आरोप आहे की, उद्योगाच्या बाबतीत महायुतीची भूमिका योग्य नव्हती. उद्योग मंत्री ज्या पद्धतीने बोलत आहेत की कोणते उद्योग त्यांनी आणले. एअर बसचा उद्योग होता तो देखील बाहेरच्या राज्यामध्ये गेलेला आहे आणि त्यामुळे त्यांच्या बोलण्याला काही तथ्य नाही असं माझं स्पष्ट मत आहे” अशी टीका सुभाष देसाई यांनी केली.

मान खटाव विधानसभा मतदारसंघात मविआला धक्का

शिवसेना उद्धव बाळासाहेब ठाकरे गटाचे सातारा जिल्हा संपर्कप्रमुख शेखर गोरे यांनी घेतली उपमुख्यमंत्री देवेंद्र फडणवीस यांची भेट. भेटीदरम्यान शेखर गोरे यांना आगामी काळामध्ये विधान परिषदेवर घेणार असल्याचा उपमुख्यमंत्री देवेंद्र फडणवीस यांनी दिला शब्द सूत्रांची माहिती. आताच्या विधानसभा निवडणुकीमध्ये शेखर गोरे भाजपाचे उमेदवार आणि त्यांचे बंधू जयकुमार गोरे यांच्यासाठी प्रचारात राहणार सक्रिय. मान खटाव विधानसभा मतदारसंघात महाविकास आघाडीला हा मोठा धक्का.

पनवेलमध्ये शरद पवारांच्या पक्षाला झटका

पनवेल मतदार संघात आमदार प्रशांत ठाकूरांनी केलेल्या विकास कामांवर आणि त्यांच्या कार्यप्रणालीवर विश्वास ठेऊन राष्ट्रवादी कॉग्रेस (शरद पवार गट) पक्षातील पदाधिकाऱ्यांनी भारतीय जनता पार्टीत जाहीर पक्ष प्रवेश केला. त्यांचे माजी खासदार लोकनेते रामशेठ ठाकूर यांनी पक्षाची शाल देऊन पक्षात स्वागत केले आणि भाजप परिवारामध्ये सामिल झाल्याबद्दल त्यांचे अभिनंदन केले.

नाशिकमधील भाजपा उमेदवार राज ठाकरेंशी बोलणार

“नाशिक मध्य मतदारसंघात मनसेने उमेदवार दिलेला नाही. मनसेने माझ्या प्रचारात सक्रिय व्हावं. यासाठी मी स्वतः राज साहेबांशी बोलणार. अशोक मुर्तडक नाशिकचे माजी महापौर आणि आमचे सहकारी. मनसेची मला मतदारसंघात निश्चितपणे ताकद मिळेल असा विश्वास आहे” असं भाजपा उमेदवार देवयानी फरांदे म्हणाल्या. “ताईंचे आणि आमचे 30 वर्षांचे संबंध आहेत. राजकारणापलीकडे सुद्धा संबंध टिकवण्याची आपली परंपरा. मध्य मतदारसंघात मनसेने उमेदवार दिलेला नाही, ही देखील एक प्रकारे मदतच आहे. माझ्या मतदारसंघात 15 हजारांहून अधिक मतदान” असं अशोक मुर्तडक म्हणाले.

सदाभाऊ खोतसारख्या वाचाळविराला महायुतीच्या नेत्यांनी वेळीच आवरा- दिलीप मोहितेपाटील

“सदाभाऊ खोतसारख्या वाचाळविराला महायुतीच्या नेत्यांनी वेळीच आवरा,” अशा शब्दात अजित पवार गटाचे आमदार दिलीप मोहितेपाटलांनी थेट इशारा दिला आहे. “एखाद्या व्यक्तीच्या आजार, व्यंग, शरीरावर बोलणं योग्य नाही. सदाभाऊ खोत यांच्या विधानाचा अजित पवारांसह राष्ट्रवादीच्या सर्व नेत्यांनी तीव्र शब्दात निषेध केलाय. याचा अर्थ राष्ट्रवादी काँग्रेस एकत्र आहे असं नाही,” असं ते म्हणाले. आम्ही महायुतीचे घटक पक्ष असल्याचंही मोहितेपाटीलांनी यावेळी स्पष्ट केलं.

नाशिक- भाजप उमेदवार देवयानी फरांदे यांनी मनसेचे अशोक मुर्तडक यांची घेतली भेट

नाशिक- भाजप उमेदवार देवयानी फरांदे यांनी मनसेचे अशोक मुर्तडक यांची भेट घेतली. अशोक मुर्तडक नाशिकचे मनसेचे माजी महापौर आहेत. तर देवयानी फरांदे भाजपाच्या मध्य मतदार संघातील उमेदवार आहेत. मनसेने मध्य मतदार संघातून माघार घेतली आहे. मनसेची मदत घेण्यासाठी भेट घेतल्याचं देवयानी फरांदे यांच्याकडून स्पष्ट करण्यात आलं आहे. तर राजकारणापलीकडचे संबंध असल्याने भेट झाल्याचं अशोक मुर्तडक यांनी म्हटलंय.

17 नोव्हेंबरला शिवसैनिक शिवाजी पार्कवर येणारच- उद्धव ठाकरे

“17 नोव्हेंबरला शिवसैनिक शिवाजी पार्कवर येणारच. संघर्ष टाळायचा असेल तर शिवाजी पार्कवर परवानगी द्या. माहीममध्ये मला सभा घेण्याची आवश्यकता नाही,” असं उद्धव ठाकरे म्हणाले.

मुलांना मोफत शिक्षण देणार, कोळीवाड्यांचा प्रशस्तपणा कायम राखणार- उद्धव ठाकरे

“मुलांना मोफत शिक्षण देणार. आम्ही शेतकऱ्यांचं कर्ज माफ करून दाखवलं. कोळीवाड्यांचा प्रशस्तपणा कायम ठेवून आम्ही विकास करणार. मुलींप्रमाणे मुलांनाही मोफत शिक्षण देणार. जीवनावश्यक वस्तूंचं दर पाच वर्षे कायम ठेवणार,” अशी आश्वासनं ठाकरेंच्या वचननाम्यात देण्यात आली आहेत.

ठाकरे गटाच्या वचननाम्याचं प्रकाशन

“आमचा वचननामा दोन प्रकारात असेल. वचननाम्यावर क्यूआर कोडदेखील देण्यात आला आहे. आमच्या आणि मविआच्या वचननाम्यात फार असं काही वेगळं नाही. मविआचा सविस्तर जाहीरनामा काही दिवसांत समोर येईल. कोळीवाड्यांची ओळख आम्ही पुसू देणार नाही,” असं उद्धव ठाकरे म्हणाले.

सदाभाऊ खोत यांचं वक्तव्य म्हणजे विनाशकाले विपरित बुद्धी – अजित पवार

“सदाभाऊ खोत यांचं वक्तव्य म्हणजे विनाशकाले विपरित बुद्धी. खोत यांनी अत्यंत निंदनिय प्रकार केलाय. त्यांचं वक्तव्य निषेधार्ह आहे. भूमिका मांडा पण त्याला ताळमेळ हवा. विरोधकांवर बोलताना पातळी सोडू नये,” असं अजित पवार म्हणाले.

कोकणातील सहा जागांवर महाविकास आघाडी जिंकणार

रत्नागिरी-सिंधुदुर्ग या लोकसभा मतदारसंघातील सहाही जागा महाविकास आघाडीचे आमदार निवडून येतील असा दावा विनायक राऊत यांनी केला आहे. हमखास निवडून येणारे आमदार म्हणून मतदार प्रशांत यादव यांच्याकडे पाहत असल्याचे ते म्हणाले. उदय सामंत यांच्या सारख्या टीवल्या बावळ्यांची टीका करण्याची सवय असल्याची टीका त्यांनी केली.

भाजपने राज्यात विष पेरले -संजय राऊत

भाजपने राज्यात कायम विष पेरल्याचा आरोप संजय राऊत यांनी केला. मोदी ज्यांना कधी कधी राजकीय गुरू मानतात. त्यांच्यावर सदाभाऊ खोत अशा खालच्या पातळीवरील टीका करतात, त्यांना लाज वाटत नाही का? असा सवाल राऊत यांनी केला.

आज शरद पवार यांच्या तीन सभा

शरद पवार हे आज नागपूर येथे प्रचारासाठी दाखल झाले आहेत. त्यांच्या तीन सभा होणार आहेत. काल राहुल गांधी यांनी नागपूरमध्ये जातनिहाय जनगणना करण्याची आग्रही भूमिका घेतली होती. त्याला पूरकच भूमिका शरद पवार यांनी घेतली.

सलमान खानला धमकी देणाऱ्याला बंगळुरूमधून अटक

सलमान खान याला धमकी देणाऱ्या आरोपीला बंगळुरूमधून अटक केली आहे. बीकाराम बिष्णोई याने पाच कोटींच्या खंडणीसाठी ही धमकी दिली होती. वाहतूक शाखेच्या संपर्क क्रमांकावर ही धमकी देण्यात आली होती.

पूर्व विदर्भात आम्हाला केवळ एकच जागा – भास्कर जाधव

पूर्व विदर्भात एकूण 28 जागा आहेत. त्यात एकच जागा आमच्या पदरात पडली. तिथे पण काँग्रेसची बंडखोरी झाली. राजेंद्र मुळक यांनी बंडखोरी केल्याने वेदना झाल्याचे शिवसेना उद्धव ठाकरे गटाचे भास्कर जाधव यांनी सांगितले. त्यांनी या प्रकारावर नाराजी व्यक्त केली.

देवळालीमध्ये मैत्रीपूर्ण लढतीची शक्यता

शिवसेनेच्या देवळालीतील उमेदवार राजश्री अहिरराव यांनी मुख्यमंत्री एकनाथ शिंदे आणि श्रीकांत शिंदे यांची भेट घेतली आहे. उमेदवारी अर्ज मिळाल्यानंतर राजश्री अहिरराव नॉट रीचेबल राहिल्याने त्यांचा उमेदवारी अर्ज कायम राहिला आहे. याच मतदारसंघात राष्ट्रवादी अजित पवार गटाच्या सरोज अहिरे ह्या उमेदवार असताना राजश्री अहिरराव यांना शिंदे यांच्या शिवसेनेकडून उमेदवारी देण्यात आली होती. देवळाली विधानसभा मतदारसंघात राष्ट्रवादी अजित पवार गट विरुद्ध शिंदे शिवसेना यांच्यात मैत्रीपूर्ण लढत होण्याची शक्यता आहे.

अमर पाटील यांच्या प्रचाराचा शुभारंभ

दक्षिण सोलापुरातील शिवसेना ठाकरे गटाचे उमेदवार अमर पाटील यांच्या प्रचाराचा शुभारंभ झाला आहे. हत्तुर येथील सोमेश्वर मंदिरात नारळ वाढवून प्रचाराचा शुभारंभ झाला. महाविकास आघाडीचे उमेदवार अमर पाटील यांच्या प्रचार शुभारंभात काँग्रेसचे जिल्हाध्यक्ष धवलसिंह मोहिते पाटील उपस्थित होते. प्रचार शुभारंभाच्या सभेत अमर पाटील यांनी आमदार सुभाष देशमुख यांच्या कार्यपद्धतीवर टीका केली आहे. आमदार सुभाष देशमुख यांनी दहा वर्षात केवळ कागदावर विकासकामे केली. शेती पाणी तसेच बेरोजगारी हे मुद्दे दक्षिण सोलापूर तालुक्यात प्रामुख्याने पाहायला मिळत आहेत. त्यामुळे आता परिवर्तनाची वेळ आली असून मला संधी द्या, असं अमर पाटील म्हणालेत.

नाशिक पोलीस ॲक्शन मोडवर

विधानसभा निवडणुकीच्या पार्श्वभूमीवर नाशिक पोलीस ॲक्शन मोडवर आली आहे. निवडणुक शांततेत पार पडण्यासाठी शहरातील विविध भागातील गुन्हेगारी पार्श्वभूमी असणाऱ्या 20 जणांवर हद्दपारीची कारवाई करण्यात आली आहे. अंबड,सातपूर, नाशिक रोड, उपनगर आणि देवळाली कॅम्प परिसरातील 20 जणांवर हद्दपारीची कारवाई करण्यात आली आहे. हद्दपारीची कारवाई केलेल्यांवर विविध पोलीस ठाण्यात गुन्हे दाखल आहेत. निवडणुका शांततेत पार पाडण्यासाठी नाशिक पोलिसांकडून कारवाई करण्यात आली आहे.

वर्ध्याच्या भूगाव स्टील कंपनीत दुर्घटना १८ कामगार जखमी

वर्ध्याच्या भूगाव येथील एवोनिथ स्टील कंपनीत दुर्घटना घडली आहे. कंपनीतील स्लॅगपिट परिसरात कुलिंग प्रोसेस सुरू असताना फ्लॅश होऊन दुर्घटना घडल्याची माहिती आहे. दुर्घटनेत १८ कामगार जखमी, जखमीपैकी ३ कामगारांवर नागपूरमधील रूग्णालयात उपचार सुरु आहेत. १५ कामगार सावंगी येथील रूग्णालयात भरती आहेत. जखमी कामगारांची प्रकृती व्यवस्थित असल्याची माहिती आहे.

मान खटावमधील मविआतील वाद पुन्हा चव्हाट्यावर

साताऱ्याच्या मान खटाव विधानसभा मतदारसंघातील महाविकास आघाडीतील नेत्यांचा वाद पुन्हा चव्हाट्यावर आला आहे. प्रभाकर देशमुख यांना डावल्याने भर प्रचार सभेत कार्यकर्त्यांमध्ये वाद आहे. शरद पवार गटाचे नेते प्रभाकर देशमुख आणि अभय जगताप यांच्या कार्यकर्त्यांमध्ये बाचाबाची झाली आहे. महाविकास आघाडीचे शरद पवार गटाचे उमेदवार प्रभाकर घार्गे यांच्या उमेदवारी बाबत मान खटाव मधील नेत्यांमध्ये वाद आहे.