Maharashtra Assembly Session 17 July 2023 : विधानसभेचं कामकाज दिवसभरासाठी तहकूब

विधानसभेचं कामकाज दिवसभरासाठी तहकूब करण्यात आलं आहे. संसद आणि विधिमंडळातील दिवंगत सदस्यांना श्रद्धांजली वाहून आज दिवसभराचं कामकाज तहकूब करण्यात आलं आहे.

पावसाळी अधिवेशनाच्या पहिल्याच दिवशी विरोधक आक्रमक झाले होते. विरोधकांनी आक्रमक होत सरकार विरोधात घोषणाबाजी केली. तसेच शेतकऱ्यांच्या प्रश्नाला सभागृहात वाचा फोडत सभात्याग केला. यावेळी विरोधकांनी जोरदार घोषणाबाजी केल्याने सभागृहात काहीवेळ गोंधळ झाला होता.

सासूमुळे वाटणी झाली आणि सासू वाट्याला आली, 50 खोके, एकदम ओके… अशी जोरदार घोषणाबाजी विरोधकांनी आज केली. आज पावसाळी अधिवेशनाच्या पहिल्या दिवशी महाविकास आघाडीच्या आमदारांनी विधिमंडळाच्या पायऱ्यांवर सरकार विरोधात आक्रमक पवित्रा घेतला. घटनाबाह्य कलंकित सरकारचा धिक्कार, असो अशा आशयाचे बॅनर यावेळी झळकविण्यात आले होते.

शेतकऱ्यांवर दुबार पेरणीचं संकट आल्यास सरकार शेतकऱ्यांच्या पाठिशी राहील. बोगस बियाणा संदर्भात कडक कारवाई करू. सकारकडून शेतकऱ्यांना 10 हजार कोटीचीं मदत देण्यात आलीय, अशी माहिती उपमुख्यमंत्री देवेंद्र फडणवीस यांनी दिली.

अधिवेशनाच्या पहिल्याच दिवशी शेतकऱ्यांच्या प्रश्नाला प्राधान्य देण्यात आलं आहे. काँग्रेसचे नेते बाळासाहेब थोरात यांनी या प्रश्नाकडे सभागृहाचं लक्ष वेधलं. राज्यात अत्यंत कमी प्रमाणात पेरण्या झाल्या आहेत. शेतकऱ्यांच्या प्रश्नांकडे सरकारचं लक्ष नसल्याचं थोरात यांनी सांगितलं.

मुख्यमंत्री एकनाथ शिंदे यांनी विधानसभेत नव्या मंत्र्यांचा परिचय करून देण्यात आला. राष्ट्रवादीच्या सर्वच्या सर्व नऊ मंत्र्यांचा परिचय करून देण्यात आला. विधिमंडळाचं कामकाज सुरू होताच मुख्यमंत्री बोलायला उभे राहिले होते.

बच्चू कडू आणि मुख्यमंत्री एकनाथ शिंदे एकाच गाडीतून वर्षा ते विधान भवनच्या दिशेने रवाना झाले होते. मंत्री पदाच्या नाराजीनंतर मुख्यमंत्र्यांशी भेट घेणार असल्याचं आमदार बच्चू कडूंनी सांगितले होते. मी मुख्यमंत्र्यांसोबत गाडीत बसून जरी आलो असतो तरी आमची मंत्री पदाबाबत कुठलीही चर्चा झाली नाही, असं बच्चू कडू यांनी सांगितलं. नाराज नसल्याचंही ते म्हणाले.

राज्याच्या पावसाळी अधिवेशनाला सुरुवात झाली आहे. अधिवेशनाच्या पहिल्याच दिवशी विरोधकांनी विधिमंडळाच्या पायऱ्यावर उभं राहून जोरदार निदर्शने केली. काँग्रेस आणि ठाकरे गटाचे आमदार यावेळी उपस्थित होते. मात्र, आमच्याकडे 19 आमदारांचं बळ आहे म्हणणाऱ्या शरद पवार यांच्या गटाचा एकही आमदार पायऱ्यावर उपस्थित नव्हता, त्यामुळे आश्चर्य व्यक्त केलं जात आहे.