Ajit Pawar | ‘सडण्याची आणि रडण्याची वेळ अजित पवारांवर आली असावी’, ‘या’ नेत्याने वापरले जिव्हारी लागणारे शब्द

मुंबई (गजानन उमाटे) : “सरकारची भूमिका उदासीन आहे.. obc च्या मतांवर निवडून यायचे आणि त्यांचे प्रश्न सोडवायचे नाही अशीच सरकारची भूमिका आहे. शिंदे सरकारने obc चे कोणतेही प्रश्न सोडवले नाहीत. obc विखुरलेला आहे, तो एक होऊ शकत नाही, असे विचार करून सरकार obc बद्दल काहीही करत नाही” अशी टीका राज्याचे विरोधी पक्षनेते विजय वडेट्टीवार यांनी केली. “अजित दादा कधी खुश राहिले? ते नेहमीच नाराज असतात. मनाप्रमाणे झालं, तर खूश. मनाविरुद्ध झाले, तर नाराज. हम करे सो कायदा, आम्ही तसे वागू अशी त्यांची भूमिका आहे. तीन पक्षांच्या सरकारमध्ये त्यांना वाटतं निधी मिळत नाही, अरे तिजोरीची चावी तुमच्याकडे आहे, तरी निधीसाठी का रडता? आता तुमची धमक दाखवा? असं आव्हान विजय वडेट्टीवार यांनी अजित पवारांना दिलं.

“महाविकास आघाडीमध्ये धाक दाखवून सर्व तिजोरी साफ करत होता. तीच धमक आता दादांनी दाखवावी. निधी मिळत नाही, म्हणून रडण्यापेक्षा दुसऱ्याला रडवण्याची हिंमत आहे का? निधी मिळत नाही असे सांगून रडण्यापेक्षा दुसऱ्याना रडवण्याची हिंमत आहे का? हे दादांनी आता दाखवावे. संजय राऊत म्हणतात त्या प्रमाणे ते दिल्लीचे चरणदास झाले आहेत. आता ते दादागिरी दाखवू शकत नाहीत” असं विजय वडेट्टीवार म्हणाले.

‘आता असं सांगू नका की तक्रार करता करता ते तिथे रडले सुद्धा’

“दिल्लीत त्यांनी तक्रार केली. आता असं सांगू नका की तक्रार करता करता ते तिथे रडले सुद्धा. तक्रारी पुरताच दादांना मर्यादित ठेवा, आता रडण्याची स्थिती अजित पवारांवर आली असेल, कारण भारतीय जनता पक्षमध्ये जाणाऱ्यांना रडवून रडवून सोडतात. त्यामुळे सडण्याची आणि रडण्याची वेळ अजित पवारांवर आली असावी” असं विजय वडेट्टीवार म्हणाले.

‘अजित पवारांना भाजपच्या तिकिटावरच लढावं लागेल’

“पुढच्या वेळेस अजित पवारांना भाजपच्या तिकिटावरच लढावं लागेल असं मला एकंदरीत दिसते आहे. कमळावर लढल्याशिवाय त्यांना पर्याय नाही.. मी पूर्णपणे खात्रीने सांगू शकतो अजित पवार गटाला कमळाबाईचा आशीर्वाद असेच होणार” असं विजय वडेट्टीवार म्हणाले.