मावळ खोऱ्यातून महायुतीत वादळ? तिन्ही विधानसभेत महायुतीत ठिणगी

जस-जश्या निवडणुका जवळ येतायत., तसं-तसं अजित पवारांचा गट महायुतीत राहणार की नाही, हा प्रश्न अजून गडद होतो आहे. पुणे जिल्ह्यातील मावळ, पिंपरी आणि चिंचवड या तिन्ही विधानसभेत महायुतीत ठिणगी पडली आहे. बावनकुळे-अजित पवारांच्या दाव्यानुसार जी जागा ज्याच्याकडे त्याला ती मिळणार आहे. त्यानुसार या घडीला मावळ, पिंपरीचे आमदार अजित पवार गटाचे तर चिंचवडचे आमदार भाजपचे आहेत. मावळातून दादा गटाचे सुनिल शेळके आमदार आहेत. या जागेवर भाजपच्या बाळा बेगडेंनी दावा सांगितला आहे. पिंपरीत अजित पवार गटाचे अण्णा बनसोडे आमदार आहेत. तिथं आपण अजित पवार गटाचा प्रचार करणार नसल्याचा ठराव स्थानिक भाजपनं मांडला आहे.

चिंचवडमध्ये अश्विनी जगताप भाजपच्या आमदार आहेत. तिथं अजित पवार गटाच्या नाना काटेंनी काम सुरु केलंय. पण मावळातून यंदा स्थानिक भाजप शरद पवारांच्या राष्ट्रवादीच्या उमेदवाराचं काम करणार असल्याचा दावा अजित पवार गटाच्या सुनिल शेळके यांनी केला आहे. तर पिंपरीत अजित पवारांचा प्रचार न करण्याचा ठरावच स्थानिक भाजपनं पुढे केला आहे.

जर महायुतीत पिंपरीची जागा अजित पवार गटाला गेली तर प्रचार न करण्याचा निर्णय स्थानिक भाजपनं घेतला आहे. जर चिंचवडची जागा भाजपनं अश्विनी जगतापांना दिली नाही तर त्या दुसरा विचार करु शकतात, अशी चर्चा सुरु आहे. चिंचवडमध्ये अजित पवार गटानं संधी न दिल्यास मविआचा पर्याय उपलब्ध असल्याचा दावा नाना काटे करत आहेत. आणि मावळात तर स्थानिक भाजपचेच लोक शरद पवार गटाचा प्रचार करणार असल्याचा आरोप अजित पवार गटाच्या सुनिल शेळकेंनी केला आहे.

पुणे जिल्हा अजित पवारांसह भाजपसाठी सुद्दा महत्वाचा आहे. कारण, एकट्या पुणे जिल्ह्यात 21 आमदार निवडून येतात. त्यापैकी 2019 ला राष्ट्रवादीनं 10 तर भाजपनं 9 आमदार जिंकले होते. फुटीनंतर अजितदादांकडे 9 तर शरद पवारांकडे एक आमदार आहेत. मात्र महायुतीचे प्रमुख नेते एकजुटीची वज्रमूठ आवळत असले तरी पुणे जिल्ह्यातल्या काही मतदारसंघात स्थानिकांच्या मुठी मात्र एकमेकांच्या विरोधात आवळल्या जात आहेत.