फक्त लोकसभाच नाही तर विधानसभाही, भाजपची मोठी रणनीती, घडामोडी वाढणार

मुंबई | 16 ऑगस्ट 2023 : भाजपच्या गोटात प्रचंड घडामोडी घडत आहेत. विशेष म्हणजे फक्त राज्य पातळीवरच नाही तर केंद्र पातळीवर प्रचंड घडामोडी घडत आहेत. महाराष्ट्रात भाजपचं मिशल लोकसभा निश्चित झालंय. महाराष्ट्राचे भाजपचे प्रदेशाध्यक्ष चंद्रशेखर बावनकुळे हे स्वत: आता मतदारसंघांचा दौरा करणार आहेत. ते 27 दिवसांचा दौरा करणार आहेत. त्यांच्या दौऱ्याला 20 ऑगस्टपासून सुरुवात होईल. त्यांच्या दौऱ्याच्या पहिल्या टप्प्यात 27 लोकसभा मतदारसंघाचा दौरा असणार आहे. तसेच ते पहिल्या टप्प्प्यात विदर्भ आणि मराठवाड्यातील मतदारसंघांचा दौरा करतील.

चंद्रशेखर बावनकुळे या दौऱ्यात बुथप्रमुख, प्रमुख कार्यकर्ते, पदाधिकारी, आमदार, खासदार यांच्या बैठकांचं आयोजन करण्यात येणार आहे. एका लोकसभा मतदारसंघासाठी बावनकुळे प्रत्येकी एक दिवस देणार आहेत. विशेष म्हणजे भाजपच्या गोटात राष्ट्रीय पातळीवर देखील अनेक हालचाली घडत आहेत. लोकसभा निवडणुकांसाठी महाराष्ट्राच भाजपचे प्रयत्न सुरु असतानाच देशातील चार राज्यांच्या विधानसभा निवडणुकीसाठी देखील भाजपची रणनीती निश्चित झालीय.

महाराष्ट्रातील भाजपचे 40 आमदार ट्रेनिंगसाठी जाणार

महाराष्ट्रातील भाजप आमदार 19 ऑगस्टला भोपाळला जाणार आहेत. महाराष्ट्रातील 40 आमदार ट्रेनिंगसाठी भोपाळला जाणार आहेत. निवडणूक पूर्व सर्व्हेसाठी आमदारांना ट्रेनिंग दिलं जाणार आहे. ज्या राज्यात निवडणूक होणार त्या राज्यात सर्व्हेसाठी पाठवलं जाणार आहे. भाजपला हिमाचल प्रदेश आणि कर्नाटक या दोन राज्यांमध्ये विधानसभा निवडणुकीत मोठा फटका बसला. त्यामुळे भाजप पक्ष सतर्क झालाय. राजस्थान, मध्यप्रदेश, तेलंगणा आणि छत्तीसगढ या राज्यांमध्ये विधानसभा निवडणूक आगामी काळामध्ये होणार आहे. त्या दृष्टीने भाजपकडून महत्त्वाची रणनीती आखण्यात आली आहे.

विविध राज्यांचे एकूण 250 आमदार असणार आहे. महाराष्ट्र, उत्तर प्रदेश, बिहार आणि गुजरात या चार राज्यांतील आमदार असणार आहेत. यामध्ये महाराष्ट्रातील 40 आमदार असणार आहेत. प्रत्येक आमदाराकडे एक मतदारसंघ दिला जाणार आहे. वेगवेगळ्या मतदारसंघाचा सर्व्हे केला जाणार आहे. कोणत्या मतदारसंघात कुठला उमेदवार देता येईल, तसेच नागरिकांच्या काय समस्या आहेत याचा अभ्यास प्रत्येक आमदार करणार आहे. विशेष म्हणजे ज्या राज्यात निवडणूक आहे त्या राज्याचे भाजप आमदार सर्व्हेत सहभागी राहणार नाहीत तर इतर राज्याचे भाजप आमदार सर्व्हे करणार आहेत.