Eknath Shinde | मुख्यमंत्री एकनाथ शिंदे पोहोचले राज ठाकरे यांच्या घरी, पाहा खास फोटो
महाराष्ट्राचे मुख्यमंत्री एकनाथ शिंदे आज गणपत्ती बाप्पाच्या दर्शनासाठी मनसे अध्यक्ष राज ठाकरे यांच्या निवासस्थानी दाखल झाले. राज्यातील गेल्या काही दिवसांपासूनच्या घडामोडी पाहता राज ठाकरे आणि एकनाथ शिंदे यांच्या आजच्या भेटीला जास्त महत्त्व आहे.
मुंबई | 20 सप्टेंबर 2023 : मुख्यमंत्री एकनाथ शिंदे यांनी आज मनसे अध्यक्ष राज ठाकरे यांच्या 'शिवतीर्थ' या निवासस्थानी दाखल होत, त्यांच्या घरच्या गणपती बाप्पाचं दर्शन घेतलं. एकनाथ शिंदे आज दुपारी राज ठाकरे यांच्या निवासस्थानी दाखल झाले. यावेळी दोन्ही नेत्यांमध्ये चर्चा देखील झाली. पण यावेळी कोणतीही राजकीय चर्चा झाली नाही, असं स्वत: मुख्यमंत्र्यांनी स्पष्ट केलं आहे. राज ठाकरे यांच्या घरच्या बाप्पाचं दर्शन घेतल्यानंतर मुख्यमंत्र्यांनी प्रसारमाध्यमांना प्रतिक्रिया दिली.
"राज ठाकरे यांच्या घरी गणपतीचे दर्शन घेतले. ते आमच्या घरी येतात. आम्ही त्यांच्या घरी जातो. आम्ही दिवाळीतही एकमेकांच्या घरी जातो. आजच्या भेटीत कुठली राजकीय चर्चा नाही. गणेशोत्सवात सर्व मंडळांना भेटी देत आहे. आता काही जण बाहेर पडले आहेत. ते दर्शन घेत आहेत. सगळ्यांना कामाला लावलं आहे", अशी प्रतिक्रिया राज ठाकरे यांनी दिली.
"टीका करणाऱ्यांना गणपती बाप्पा सद्बुद्धी देवो. विरोधक पंतप्रधान नरेंद्र मोदी यांच्यावर टीका करता-करता देशावरही टीका करत आहेत. बळीराजाला शेतकऱ्यांना चांगले दिवस येऊ हीच बाप्पाकडे प्रार्थना", असं राज ठाकरे यावेळी म्हणाले.
शिवसेना पक्षात फूट पडल्यानंतर आणि एकनाथ शिंदे यांनी बंड पुकारल्यानंतर राज ठाकरे यांनी ठाकरे गटाचे प्रमुख उद्धव ठाकरेंवर टीका केली होती. त्यानंतर राज ठाकरे आणि एकनाथ शिंदे यांच्या सतत भेटीगाठी होत गेल्या.
राज ठाकरे यांच्या भेटीसाठी भाजप नेते देखील त्यांच्या शिवतीर्थ निवासस्थानी येत असतात. नुकतंच राज्याच्या उपमुख्यमंत्री देवेंद्र फडणवीस यांनी राज ठाकरे यांच्या घरच्या बाप्पाचं दर्शन घेतलं. यावेळी त्यांच्या पत्नी अमृता फडणवीस या देखील आल्या होत्या.
राज ठाकरे आपल्या कुटुंबासह काल प्रसिद्ध उद्योगपती मुकेश अंबानी यांच्या निवासस्थानी गेले होते. राज ठाकरे यांनी मुकेश अंबानी यांच्या घरच्या बाप्पाचं दर्शन घेतलं. यावेळी अंबानी यांच्या घरी जगभरातील ख्यातनाम व्यक्तीमत्व आले होते.