CM Uddhav Thackeray: खऱ्या हिंदुत्वाचा हुंकार ऐकायला यायलाच पाहिजे, भगवे झेंडे अन् शिवसेनेची डरकाळी; सभेचा टीझर पाहाल तर…

खऱ्या हिंदुत्वाचा हुंकार ऐकायला यायलाच पाहिजे, भगवे झेंडे अन् शिवसेनेची डरकाळी

Image Credit source: tv9 marathi

मुंबई: मनसे अध्यक्षव राज ठाकरे (raj thackeray) यांनी राज्यात सलग तीन सभा घेऊन राज्यातील वातावरण ढवळून काढलं. भोंग्यांचा मुद्दा हातात घेऊन राज ठाकरे यांनी आपली प्रखर हिंदुत्ववादी अशी प्रतिमा निर्माण करून शिवसेनेला एक प्रकारे शह दिला आहे. तर दुसरीकडे ग्रामीण भागात मजबूत पकड असलेल्या राष्ट्रवादीलाही त्यांनी डिवचले आहे. शरद पवार (sharad pawar) हे जातीयवादी असल्याचं सांगत त्यांनी राष्ट्रवादीचा इमला डळमळीत करण्याचा प्रयत्न केला आहे. गेल्या महिन्याभरापासून राज यांनी आपल्या भोवतीच राजकारण फिरतं ठेवलं आहे. त्यातच राज ठाकरे यांनी अयोध्येला जाण्याची घोषणाही केली आहे. त्यामुळे शिवसेनेच्या तंबूत एकच खळबळ उडाली आहे. त्यामुळे आता शिवसेनाही मनसेला जशास तसे उत्तर देण्याच्या तयारीत आहे. येत्या 14 तारखेला शिवसेनेची मुंबईत विराट सभा होणार आहे. स्वत: मुख्यमंत्री उद्धव ठाकरे (cm uddhav thackeray) हे या सभेला संबोधित करणार आहेत. या सभेपूर्वीच शिवसेनेने एक दणदणीत आणि खणखणीत टीझर लॉन्च केला आहे. त्यामुळे शिवसेनेची सभा खणखणीत होणार असल्याचं स्पष्ट होत आहे.

सभा कधी आणि कुठे?

शिवसेनेने गेल्या काही दिवसांपूर्वी शिवसंपर्क अभियान सुरू केलं होतं. त्याचाच एक भाग म्हणून ही सभा होत आहे. येत्या 14 मे रोजी सायंकाळी 7 वाजता मुंबईतील बीकेसीवर ही सभा होणार आहे. या सभेला मुख्यमंत्री उद्धव ठाकरे संबोधित करणार आहेत. त्याशिवाय शिवसेनेच्या काही नेत्यांचीही या सभेत भाषणे होणार आहेत. या सभेच्या माध्यमातून शिवसेना निवडणुकीचं रणशिंग फुंकणार असून जाहीर शक्तीप्रदर्शनही करणार असल्याचं सांगितलं जात आहे.

टीझर काय सांगतो?

शिवसेनेने त्यांच्या ट्विटर अकाऊंटवर अवघ्या 15 सेंकदाचा टीझर जारी केला आहे. या टीझरला आतापर्यंत चार हजार लोकांनी पाहिलं आहे. तर 151 लोकांनी रिट्विट केला आहे. या टीझरच्या सुरुवातीलाच शिवसेनाप्रमुख बाळासाहेब ठाकरे यांचे भाषण दिसते. मी शिवसेनाप्रमुख जरूर, पण तुमची ताकद माझ्यासोबत आहे. म्हणूनच मी शिवसेनाप्रमुख आहे, असं शिवसेनाप्रमुख बोलताना दिसत आहेत. शिवसेना प्रमुखांच्या सभेतील या विधानानंतर कोण आला रे कोण आला, शिवसेनेचा वाघ आला, अशा घोषणा ऐकू येतात. ढोलाच्या दणदणाटावर या घोषणा ऐकायला मिळतात. त्यानंतर साहेबांवर श्रद्धा असणाऱ्या प्रत्येक शिवसैनिकाने खऱ्या हिंदुत्वाचा हुंकार ऐकायला यायलाच पाहिजे, असं निवेदक सांगतो. शेवटी सभेची तारीख आणि वेळही दाखवली जाते. या व्हिडीओत तुंडूंब गर्दीने भरलेली शिवसेनाप्रमुखांची सभा, त्यांचं भाषण आणि उद्धव ठाकरे यांची सभा दाखवण्यात आली आहे. त्याशिवाय भगवा झेंडा आणि भगवे झेंडे घेऊन येणारे शिवसैनिकही दिसत आहे. थोडक्यात हा टीझर शिवसेनेने अत्यंत कडक केला आहे.

मुंबईत वातावरण निर्मिती

दरम्यान, उद्धव ठाकरेंच्या 14 मे रोजी मुंबईत होणाऱ्या जाहीर सभेनिमित्ताने मुंबईत पक्षाकडून वातावरण निर्मिती करण्यास सुरूवात झाली आहे. मुंबईत ठिकठिकाणी या जाहीर सभेची भव्य होर्डिंग्ज लावण्यात आली आहेत. होर्डिंग्जवरील घोषवाक्यांतून भाजप आणि मनसेवर निशाणा साधला आहे. खऱ्या हिंदुत्वाचा हुंकार ऐकायला …..यायलाच पाहिजे, असं या होर्डिंग्जवर ठळक अक्षरात लिहिलं आहे.