महाविकास आघाडीकडून लाडक्या भावांना मोठं गिफ्ट, दर महिन्याला इतके हजार मिळणार, उद्धव ठाकरेंची घोषणा
"आपण मुलांना कौशल्य विकास देणार. मुलींप्रमाणेच मुलांनाही मोफत शिक्षण देणार आहे. रोजगार मिळेपर्यंत काय करायचं हे पंचसूत्रीत आहे. प्रत्येक बेरोजगार तरुणाला दर महिन्याला ४ हजार रुपयांची मदत करणार", अशी मोठी घोषणा उद्धव ठाकरे यांनी यावेळी केली.
महायुती सरकारने विधानसभा निवडणुकीला काही महिने बाकी असताना लाडकी बहीण योजना आणि लाडकी भाऊ योजना जाहीर केली. या योजनांच्या माध्यमातून राज्यातील लाभार्थी महिलांना दर महिन्याला 1500 रुपये आणि लाडक्या भावांना इंटर्नशिपच्या माध्यमातून 10 हजार रुपये देण्यात येत आहेत. आता याच दोन योजनांच्या पार्श्वभूमीवर महाविकास आघाडीकडूनही आज आश्वासनांचा अक्षरश: पाऊस पाडण्यात आला. महाविकास आघाडीचं सरकार राज्यात आल्यास सर्व बेरोजगार महिलांना मोठं गिफ्ट मिळणार आहे. माजी मुख्यमंत्री उद्धव ठाकरे यांनी याबाबतची घोषणा केली. महाविकास आघाडीचं सरकार राज्यात आल्यास सरकार सर्व बेरोजगार तरुणांना दर महिन्याला 4 हजार रुपयांची आर्थिक मदत करेल, अंस आश्वासन उद्धव ठाकरे यांनी दिलं.
“आपण जे करतो ते खुलेआम. काळोखात काही करत नाही. आम्ही दोन लाखांपर्यंतचं कर्ज माफ केलं आहे. जे करतो तेच करतो. जे बोलत नाही ते करत नाही. आपण मुलांना कौशल्य विकास देणार. मुलींप्रमाणेच मुलांनाही मोफत शिक्षण देणार आहे. रोजगार मिळेपर्यंत काय करायचं हे पंचसूत्रीत आहे. प्रत्येक बेरोजगार तरुणाला… बेरोजगारीची व्याख्या ठरवावी लागणार आहे. बेरोजगार तरुणांना दर महिन्याला ४ हजार रुपयांची मदत करणार आहे”, अशी घोषणा उद्धव ठाकरे यांनी केली.
‘बेरोजगार आपलं भविष्य’
“युवकांना का नाही आर्थिक मदत करायची? बेरोजगार आपलं भविष्य आहे. यांच्यामुळे तरुण नासत आहे. त्यांना उभारी देणार कोण. आपल्याला त्यांना उभारी देणार आहोत. संविधानाची प्रत राहुल गांधींनी दाखवलं. मी वर्षाताईला म्हटलं मलाही दे. खूप छान आहे, संविधान. वाचवायचं आहे संविधान. अजून पूर्ण वाचलेलं नाही. महाराष्ट्रातील निवडणूक त्यासाठीच आहे. संविधान बचाव फेक नरेटिव्ह वाटत असेल तर अदानीच्या घशात मुंबई घालण्याचे जे जीआर निघाले ते फेक आहे काय. अदानीच्या घशात जागा दिल्या जात आहे. मुंबई अदानीमय केली जात आहे. आमचं सरकार आल्यावर चुकीच्या निविदा काढल्या, ज्या सवलती अदानीला देऊन मुंबई नासवली जाते ते कंत्राट रद्द करू. आम्ही धारावीकरांना सुविधा दिल्याशिवाय घर दिल्याशिवाय राहणार नाही”, असं उद्धव ठाकरे म्हणाले.
