Yevla Election Results 2024: येवल्याचा गड कोण राखणार? छगन भुजबळांसमोर माणिकराव शिंदेंचं कडवं आव्हान
येवला विधानसभा मतदारसंघाची निवडणूक छगन भुजबळांसाठी सोपी राहिलेली नाही. त्यांना राष्ट्रवादी काँग्रेसकडून (शरद पवार गट) माणिकराव शिंदे यांंचं कडवं आव्हान आहे. या निवडणुकीत जनतेचा कौल कोणाला आहे, हे पाहणं महत्त्वाचं ठरणार आहे.
विधानसभा निवडणुकीत राज्यातील महत्त्वाच्या मतदारसंघांवर सर्वांची नजर आहे. त्यामध्ये नाशिक जिल्ह्यातील येवला विधानसभेचाही समावेश होते. महायुती सरकारमधील मंत्री आणि राष्ट्रवादी काँग्रेसचे (अजित पवार गट) नेते छगन भुजबळ यांचा हा मतदारसंघ आहे. येवला विधानसभा मतदारसंघ हा भुजबळांचा बालेकिल्ला मानला जातो. महायुतीत अजित पवार यांच्याकडून छगन भुजबळांना पुन्हा एकदा उमेदवारी देण्यात आली आहे. त्यांच्याविरोधात महाविकास आघाडीकडून शरद पवार गटाने माणिकराव शिंदे यांना निवडणुकीच्या रिंगणार उतरवलं आहे. येवला विधानसभेचा गड कोण राखणार, याकडे संपूर्ण महाराष्ट्राचं लक्ष लागलं आहे.
गेल्या दोन दशकांपासून भुजबळ येवल्याचं प्रतिनिधित्व करत आहेत. पण मराठा समाजातील अस्वस्थता, शेतकरी वर्गाची नाराजी, सलग दोन दशक प्रतिनिधित्व केल्याने जनतेच्या मनात निर्माण झालेली विरोधी भावना यांसारख्या कारणांमुळे त्यांच्यासाठी ही निवडणूक सोपी राहिलेली नाही. मुंबईत पराभूत झाल्यानंतर छगन भुजबळ 2004 मध्ये येवल्यात आले. तेव्हापासून ते सलग चार वेळा विजयी झाले. विकासाच्या मुद्द्यावर त्यांनी प्रत्येक निवडणूक सहजपणे जिंकली. इतकंच काय तर बेहिशेबी मालमत्ता बाळगल्याप्रकरण दोन वर्षे तुरुंगात राहिल्यानंतरही 2019 मधील निवडणुकीत भुजबळ यांनी मागील निवडणुकीपेक्षा अधिक मताधिक्य मिळवलं होतं. मराठा-ओबीसी आरक्षणाच्या संघर्षात त्यांची प्रतिमा बदलली. मनोज जरांगे पाटील आणि छगन भुजबळ हे एकमेकांसमोर आले. त्यामुळे मराठा आरक्षणाचे विरोधक अशी त्यांची रंगवलेली प्रतिमा या निवडणुकीत त्रासदायक ठरतेय.
छगन भुजबळ यांनी शरद पवारांना सोडून अजित पवारांना साथ दिल्याने दुखावलेल्या शरद पवारांनीही आपली पहिली जाहीर सभा येवल्यातच घेतली. मराठा समाजातील माणिकराव शिंदे यांना निवडणुकीच्या मैदानात उतरवत त्यांनी मत विभाजनावर भर दिला. सव्वा तीन लाख मतदार असणाऱ्या येवला मतदारसंघात एक लाख 30 हजारांहून अधिक मराठा तर 55 हजारहून अधिक ओबीसी मतदार असल्याचा अंदाज आहे. तर अनुसूचित जाती-जमाती घटकांचे 60 हजार, विमुक्त जाती आणि भटक्या जमाती 30 हजार, अल्पसंख्यांक समाजाचे 26 हजारहून अधिक मतदार असल्याचं सांगितलं जातंय.
महाराष्ट्र विधानसभा निवडणूक निकाल 2024 LIVE Counting
विधानसभा निवडणूक निकाल 2024 LIVE