Nashik Accident| माहिती सहायक पाटील यांचा अपघाती मृत्यू; कर्तव्यनिष्ठ अधिकाऱ्याच्या निधनाने जिल्ह्यात हळहळ
मालेगावच्या कोरोना संकटात मनोहर पाटील यांनी खूप चांगले काम केले. जिल्ह्यातील माध्यम सृष्टीला सदैव संस्मरणात राहील, असेच त्यांचे काम होते. नुकताच राज्याचे माहिती जनसंपर्क सचिव यांच्या हस्ते त्यांचा त्यासाठी गौरवही करण्यात आला होता.
नाशिकः मालेगाव उपमाहिती कार्यालयातील माहिती सहायक मनोहर पाटील यांचा अपघाती मृत्यू झालाय. मालेगावहून धुळ्याला जाताना देवारपाडे शिवारात त्यांच्या वाहनाचा अपघात झाला. यात त्यांचे निधन झाले. ते 45 वर्षांचे होते. त्यांच्या निधनाबद्दल हळहळ व्यक्त करण्यात येत असून, एका कर्तव्यदक्ष अधिकाऱ्याला मुकल्याची भावना व्यक्त होत आहे.
धुळ्यात होते स्थायिक
पाटील 2001 मध्ये माहिती व जनसंपर्क विभागात लिपिक म्हणून रुजू झाले होते. सुरुवातीला त्यांनी धुळे माहिती कार्यालयात काम केले. नंतर जळगाव, चाळीसगाव येथे काम केले. 1 एप्रिल 2020 मध्ये त्यांना बढती मिळाली. त्यानंतर ते मालेगाव उपविभागीय माहिती कार्यालयात माहिती सहायक म्हणून काम पाहिले. पाटील हे पारोळा तालुक्यातील करमाळ गावचे होते. त्यांचे वडील धुळे येथे राज्य परिवहन विभागात कार्यरत होते. त्यामुळे ते धुळे येथेच स्थायिक झाले. पाटील हे मालेगावहून धुळ्याला आपल्या घरी चालले होते. तेव्हा देवारपाडे शिवारात त्यांच्या वाहनाला अपघात झाला. यात ते गंभीर जखमी झाले. सुरुवातीला त्यांना मालेगाव येथील लीलावती रुग्णालयात दाखल करण्यात आले. मात्र, प्रकृती खालावल्याने त्यांना नाशिकला हलवण्यात आले. मात्र, उपचार सुरू असताना त्यांचे निधन झाले.
कोरोना काळात काम
मालेगावच्या कोरोना संकटात मनोहर पाटील यांनी खूप चांगले काम केले. जिल्ह्यातील माध्यम सृष्टीला सदैव संस्मरणात राहील, असेच त्यांचे काम होते. नुकताच राज्याचे माहिती जनसंपर्क सचिव यांच्या हस्ते त्यांचा त्यासाठी गौरवही करण्यात आला होता. मृदभाषी, दांडगा जनसंपर्क, वक्तशीर, अत्यंत सचोटीची कर्तव्यनिष्ठा आणि विनम्र असणाऱ्या मनोहर पाटील यांचा वृत्तांकनात, लेखनात हातखंडा होता. ज्यांना शासकीय जनसंपर्काची खरी नस समजली होती, अशा राज्याच्या माहिती संवर्गातील मोजक्या संवादकांपैकी ते एक होते. त्यांच्या निधनाने त्यांच्या कुटुंबीयांसोबतच शासकीय जनसंपर्क क्षेत्राची कधीही न भरून निघणारी हानी झाली आहे.
पालकमंत्र्यांकडून श्रद्धांजली
मालेगाव उपमाहिती कार्यालयातील माहिती सहाय्यक मनोहर पाटील यांच्या अपघाती निधनाने प्रसारमाध्यमे आणि शासन संवादातील दुवा हरपला असून, त्यामुळे जनसंपर्क क्षेत्राची मोठी हानी झाली आहे. परमेश्वर त्यांच्या कुटुंबियांना या संकटातून बाहेर पडण्याचे बळ देवो, अशा भावना राज्याचे अन्न, नागरी पुरवठा व ग्राहक संरक्षण मंत्री तथा जिल्ह्याचे पालकमंत्री छगन भुजबळ यांनी आपल्या शोक संदेशात व्यक्त केली आहे.
