शरद पवारांची नाशिकमध्ये सर्वात मोठी खेळी, भुजबळांच्या पराभवासाठी अमृता पवार यांना मैदानात उतरवणार?

महाराष्ट्राच्या राजकारणात सध्याची परिस्थिती पाहता आगामी विधानसभा निवडणुकीत काहीही घडू शकतं हे वास्तव आहे. लोकसभा निवडणुकीत महाविकास आघाडीला चांगलं यश आलं. राष्ट्रवादी काँग्रेस शरदचंद्र पवार पक्षाचे तर 10 पैकी 8 उमेदवार जिंकून आले. साताऱ्याचा उमेदवार फार कमी फरकाने पराभवी झाला. त्यामुळे या पक्षाचे प्रमुख शरद पवार यांनी आखलेली रणनीती खरी ठरली हे स्पष्ट झालं. आता शरद पवार आगामी विधानसभा निवडणुकीत उपमुख्यमंत्री अजित पवार यांच्या पक्षाच्या बड्या नेत्यांना मोठा धक्का देण्याच्या तयारीत आहेत. यातील पहिला टार्गेट हा कदाचित मंत्री छगन भुजबळ हे आहेत, अशी चर्चा आहे. कारण छगन भुजबळ यांच्या मतदारसंघात शरद पवार भाजपच्या अमृता पवार यांना आपल्या पक्षात प्रवेश देऊ शकतात. तसेच त्यांना येवला विधानसभा मतदारसंघाचं तिकीटही देऊ शकतात, अशा चर्चा राजकीय वर्तुळात रंगल्या आहेत. या चर्चा रंगण्यामागील घटना आज नाशिकमध्ये उघडपणे बघायला मिळाली आहे.

येवल्यात भाजप नेत्या अमृता पवार यांनी राष्ट्रवादी काँग्रेस शरदचंद्र पवार पक्षाचे प्रमुख शरद पवार यांचं स्वागत केल्यामुळे अनेकांच्या भुवया उंचावल्या आहेत. अमृता पवार या येवला विधानसभा मतदारसंघातून निवडणूक लढण्यासाठी इच्छूक आहेत. त्यामुळे अमृता पवार शरद पवार गटात प्रवेश करतात का, आणि मंत्री छगन भुजबळ विरुद्ध अमृता पवार असा सामना आगामी निवडणुकीत रंगणार का? याकडे महाराष्ट्राच्या जनतेचं लक्ष आहे.

अमृता पवार कोण आहेत?

अमृता पवार या माजी खासदार वसंत पवार यांच्या कन्या आहेत. त्यांना येवला विधानसभा मतदारसंघातून निवडणूक लढवायची आहे. अमृता पवार या भाजपच्या नेत्या आहेत. पण त्यांना आता शरद पवार गटाकडून विधानसभेचं तिकीट हवं असल्याची चर्चा आहे. सध्या मंत्री छगन भुजबळ या मतदारसंघाचे आमदार आहेत. याच मतदारसंघात अमृता पवार या देखील निवडणुकीसाठी तयारी करत आहेत. असं असताना त्यांनी आज अचानक शरद पवार यांचं स्वागत केल्याने अनेकांच्या भुवया उंचावल्या आहेत.

हे सुद्धा वाचा

खान्देशाच्या राजकारणात सर्वात मोठा भूकंप, जयकुमार रावल यांच्या ‘सावली’ने साथ सोडली, कामराज निकम शरद पवार गटात जाणार

धक्कादायक! ‘या महिन्याच्या अखेरपर्यंत विकेट पाडणार’, वसंत मोरे यांना जीवे मारण्याची धमकी

पूजा खेडकर मोठ्या संकटात, दिल्लीत एफआयआर नोंदवला, पुढे काय होणार?

अमृता पवार काय म्हणाल्या?

“मला भाजप पक्षाने येवल्यात विधानसभा प्रमुख म्हणून जबाबदारी दिली होती. त्यामुळे मी येवला विधानसभा पिंजून काढलेलं आहे. पण शेवटी राजकारण आहे. काय होईल ते सांगता येत नाही”, अशी प्रतिक्रिया अमृता पवार यांनी दिली आहे. अमृता पवार यांनी शरद पवार यांचं स्वागत केल्यामुळे येवल्यात आगामी काळात काय-काय राजकीय घडामोडी घडतात, याबाबतची उत्सुकता वाढली आहे.