एकाही अहवालात मराठा समाजाला मागास म्हटले नाही… बबनराव तायवाडे यांचा मनोज जरांगे यांच्यावर हल्ला

बबनराव तायवाडे

हिंगोली, दि. 26 नोव्हेंबर 2023 | आमची लायकी काढली जात आहे. आमची लायकी काढण्याचा अधिकार तुम्हाला कोणी दिला. आमची लायकी नाही असे म्हणतात तर आमच्या पंगती का येत आहे? असा प्रश्न राष्ट्रीय ओबीसी महासंघाचे नेते बबनराव तायवाडे यांनी मराठा आंदोलनाचे नेते मनोज जरांगे पाटील यांना केला. हिंगोलीतील ओबीसी एल्गार परिषदेतून त्यांनी मनोज जरांगे पाटील यांच्यावर जोरदार हल्ला केला. तसेच आमची लायकी काढण्याचा यापुढे प्रयत्न केल्यास तुमचे महाराष्ट्रात फिरणे बंद करु, असा इशारा दिला.  1967 पासून आजपर्यंत कुठेच मराठा समाजास मागास म्हटले गेले नाही. सर्वच अहवालात मराठा समाजाला प्रगत समाज म्हटले होते. तेच छगन भुजबळ आता सांगत आहेत. त्यामुळे तुम्ही आमच्यावर खोटे आरोप लावत आहात, असा हल्ला राष्ट्रीय ओबीसी महासंघाचे नेते बबनराव तायवाडे यांनी मनोज जरांगे पाटील यांनी केला.

सर्वच अहवालांनी मराठा समाजास प्रगत दाखवले

मंडल आयोगाने मराठा समाजास सुपरकास्ट म्हटले आहे.  मराठा समाजासंदर्भात १९९४ पासून आतापर्यंत सात आयोग नेमले गेले आहे. परंतु एकाही आयोगाने मराठा समाजास मागास म्हटले नाही. त्यानंतर हे आमच्यावर कसे आरोप लावू शकतात? असा प्रश्न बबनराव तायवाडे यांनी उपस्थित केला.

मनोज जरांगे यांचा धिक्कार करतो

आमचे नेते तुमच्याविषयी एखादा शब्द बोलत असतील तर त्यांना शिवीगाळ केली जाते. आमची लायकी काढली जाते. तुम्हाला हा अधिकार कोणी दिला. यामुळे आम्ही मनोज जरांगे यांचा धिक्कार करतो. त्यांचा निषेध करतो. यापुढे ओबीसीच्या विरोधात जर कोणी बोलण्याची हिंमत करु नका, असा इशारा त्यांनी दिला.

त्या नोंदी १५ लाखांपेक्षा जास्त नसतील

मनोज जरांगे म्हणाले महाराष्ट्रात 32 लाख कुणबी नोंदी सापडल्या. 32 लाख गुणीला 100 म्हणजे तेवढे नवीन मराठा या ओबीसीमध्ये आले. परंतु तुम्ही किती मूर्ख बनवत आहात. ज्या 32 लाख नोंदी सापडल्या त्या व्यवस्थित तपासल्या तर पंधरा लाखांच्या वर येणार नाही. यामुळे त्यांच्या भुलथापांना कोणी बळी पडू नका. आम्ही आमच्या संविधानिक अधिकाराचे रक्षण करणार म्हणजे करणार आहोत. आपल्या सर्वांना हिम्मत देण्यासाठी या ठिकाणी सर्व विचारांचे लोक एकत्र आलेले आहेत. भुजबळ साहेब एकटे नाही. आम्ही सर्व त्यांच्या सोबत आहोत, असे बनराव तायवाडे यांनी म्हटले.