इमारतीवरील स्लॅबचे तुकडे अंगावर पडू लागले, येथील मुख्याध्यापकांना घ्यावा लागला वर्गाबाहेर शिकवण्याचा निर्णय
या इमारतीतून विद्यार्थ्यांना अन्यत्र हलवण्याशिवाय मुख्याध्यापकांसमोर कुठलाही पर्याय उरलेला नाही. त्यामुळे चंद्रपूरचा असह्य उन्हाळा झेलत विद्यार्थी शाळा परिसरातील झाडाखाली ज्ञानार्जन करत आहेत.
चंद्रपूर : शाळेच्या सुस्थितीत असलेल्या प्रवेशद्वारावर लिहिले आहे, यावे ज्ञानासाठी निघावे सेवेसाठी. मात्र ही म्हण सार्थ ठरविण्यासाठी आवश्यक असलेल्या मूलभूत सुविधांची चंद्रपूर जिल्ह्यातील सिंदेवाही तालुक्यातल्या पेंढरी- कोके या जिल्हा परिषद उच्च प्राथमिक शाळेतील इमारतीत वानवा आहे. या शाळेत वर्ग एक ते सातचे सुमारे विद्यार्थी आहेत. शाळेत एक कौलारू इमारत असून ती गळकी आहे. त्यामुळे तिथले विद्यार्थी या आधीच स्लॅबच्या इमारतीत हलविले होते. मात्र आता स्लॅबची इमारत देखील जीर्ण झाली आहे. त्यातून स्लॅबचे तुकडे खाली पडू लागले. त्यात एक विद्यार्थी जखमी झाला.
झाडाखाली ज्ञानार्जन
या इमारतीतून विद्यार्थ्यांना अन्यत्र हलवण्याशिवाय मुख्याध्यापकांसमोर कुठलाही पर्याय उरलेला नाही. त्यामुळे चंद्रपूरचा असह्य उन्हाळा झेलत विद्यार्थी शाळा परिसरातील झाडाखाली ज्ञानार्जन करत आहेत. किशोर बावणे आणि सावी रामटेके यांनी आपल्या शाळेची व्यथा सांगितली.
नव्या इमारतीसाठी गावकरी आक्रमक
जिल्हा परिषद उच्च प्राथमिक शाळा पेंढरी- कोके येथील शाळा इमारती निर्लेखीत करून नव्याने बांधण्याचा प्रस्ताव ग्रामपंचायत आणि शिक्षण विभागाने जिल्हा परिषद प्रशासनाला पाठवलाय. मात्र अजूनही या प्रस्तावाला मंजुरी मिळालेली नाही. परिणामी धोका टाळण्यासाठी शिक्षकांनी झाडाखाली शिक्षण देण्यास सुरुवात केली आहे. वारंवार पाठपुरावा करूनही नवी इमारत उभी होत नसल्याने ग्रामस्थ संतापले आहेत.
प्रशासनाने घ्यावी तातडीने दखल
शिक्षण क्षेत्रावर कोट्यवधी रुपयांचा खर्च केला जात असल्याचा देखावा वारंवार प्रशासनातर्फे केला जातो. मात्र इमारती गुणवत्तापूर्ण बांधणे आणि जीर्ण झालेल्या इमारती तातडीने निर्लेखित करून विद्यार्थ्यांना उत्तम सुविधा देणे याकडे मात्र दुर्लक्ष होत आहे. पेंढरी-कोके येथील जिल्हा परिषद शाळेबाबत घडलेला प्रकार जिल्हा परिषद प्रशासनाने तातडीने दखल देत मार्गी लावावा अशीच अपेक्षा ग्रामस्थ करत आहेत.
सिंदेवाही तालुक्यातल्या पेंढरी-कोके येथील सुमारे 200 विद्यार्थी दिवाळीपासून झाडाखाली शिक्षण घेत आहेत. शाळा इमारत जीर्ण झाली आहे. अंगावर स्लॅबचे तुकडे पडू लागल्याने मुख्याध्यापकांनी हा निर्णय घेतलाय. मात्र अजूनही जिल्हा परिषद प्रशासनाला प्रस्ताव मंजूर करण्यासाठी वेळ मिळाला नाही.
