CCTV Video: पुण्याच्या एटीएममध्ये ‘मुळशी पॅटर्नचा’ थरार, तलवारी, कोयत्याचा हल्ला सीसीटीव्हीत कैद

Crime-News

पुणे : पुण्यात भेकराई नगरमध्ये वर्चस्व वादातून एटीएम सेंटरमध्ये पैसे काढण्यासाठी गेलेल्या तरुणावर कोयत्याने हल्ला झाल्याची धक्कादायक घटना समोर आली आहे. या घटनेचा संपूर्ण थरार सीसीटीव्हीत कैद झाला आहे. रोहन काळूराम इंगळे असे हल्ल्यात जखमी झालेल्या तरुणाचे नाव आहे. आरोपींनी रोहनवर हल्ला केला त्यावेळी रोहन जीव वाचवण्यासाठी सैरावैरा पळत सुटला. सुदैवाने तो या हल्ल्यात बचावला. मात्र, या हल्ल्यात तो गंभीर जखमी झाला (Attack on youth in ATM center at Pune Bhekrai nagar).

नेमकं प्रकरण काय?

रोहन इंगळे या तरुणाला नवा मोबाईल घ्यायचा होता. मात्र, त्याच्याजवळ पूरेसे पैसे नव्हते. त्यामुळे त्याने आपल्या बँक खात्यातून पैसे काढण्याचा विचार केला. त्यानुसार तो बुधवारी (17 फेब्रुवारी) संध्याकाळी सहाच्या सुमारास भेकराई नगरमधील एटीएम सेंटरमध्ये पैसे काढायला गेला. यावेळी त्याच्याविरोधातील एक टोळी त्याचा पाठलाग करत होती. तो एटीएम सेंटरमध्ये पैसे काढण्यासाठी गेल्यानंतर त्याच्या विरोधातील टोळी एटीएम सेंटरच्या बाहेर असलेल्या पान टपरीवर दबा धरुन बसली.

रोहनवर टोळीचा हल्ला

काही क्षण वाट पाहिल्यानंतर त्यांच्या टीमचा एक म्होरक्या एटीएम सेंटरमध्ये कोयता घेऊन आत शिरला. त्याच्यासोबत त्याचे इतर मित्रही हातात तलवार घेऊन बाहेर उभे होते. त्याने रोहनवर धारधार शस्त्राने हल्ला करण्यास सुरुवात केली. यावेळी रोहन बाहेर येऊन सैरावैरा पळू लागला. तो एटीएम सेंटरच्या बाहेर येताच पानटपरीवर दबा धरुन बसलेल्या टोळीनेदेखील शिविगाळ करत त्याच्यावर हल्ला केला. यावेळी टोळीतील मुलांच्या हातात तलवारी होत्या. या हल्ल्यात रोहन गंभीर जखमी झाला.

चार जणांविरोधात गुन्हा दाखल

या घटनेमुळे संपूर्ण परिसरात खळबळ उडाली. पोलिसांना याबाबत माहिती मिळताच ते तातडीने घटनास्थळी दाखल झाले. रोहनवर सध्या उपचार सुरु असल्याची माहिती मिळत आहे. याप्रकरणी पोलिसांनी चार जणांविरोधात खूनाचा प्रयत्न केल्याचा गुन्हा दाखल केला आहे (Attack on youth in ATM center at Pune Bhekrai nagar).

हेही वाचा : पिंपरी-चिंचवडमधील घरगुती गॅसची चोरी करणाऱ्या टोळीला पोलिसांच्या बेड्या, तब्बल 22 आरोपी ताब्यात