Pune tree fall : कामावरून परतत असतानाच काळाचा घाला, चाकणमध्ये झाड कोसळून दुचारीस्वार ठार; तर दुसऱ्या घटनेत कारचा चक्काचूर
कामावरून परतत असताना या दुचाकीस्वरावर काळाने घाला घातल्याने परिसरात हळहळ व्यक्ती केली जात आहे. दुसऱ्या घटनेत चालत्या कारवर झाड कोसळले. त्यामुळे कारचे मोठे नुकसान झाल्याची घटना खेड तालुक्यातील चाकण झित्राई मळा येथे घडली आहे.
चाकण, पुणे : झाड कोसळून (Tree fall) नुकसान झाल्याच्या दोन घटना पुणे जिल्ह्यातल्या चाकण, खेड परिसरात घडल्या आहेत. यातील एका घटनेचा एकाचा बळीदेखील गेला आहे. पहिली घटना चाकण-तळेगाव रस्त्यावरील तर दुसरी घटना चाकण झित्राई मळा येथे घडली आहे. खराबवाडी गावातील जय मल्हार हॉटेलच्या समोर आणि एका कंपनीच्या जवळ एका दुचाकीवर रस्त्याच्या कडेचे झाड कोसळले. यात दुचाकीस्वराचा जागीच मृत्यू (Dead) झाला तर आहे. तर एक गंभीर जखमी झाल्याची धक्कादायक घटना घडली आहे. अनेक वेळा सार्वजनिक बांधकाम विभागाला रस्त्याच्या कडेची झाडे काढण्यासाठी कळवूनही सार्वजनिक बांधकाम विभाग (PWD) याकडे सपशेल कानाडोळा करत आहे. त्याचा परिणाम म्हणून अशा झाडांच्यामुळे निष्पाप व्यक्तींना आपला जीव गमवावा लागत आहे.
कामावरून परतत असतानाच घडली दुर्दैवी घटना
कामावरून परतत असताना या दुचाकीस्वरावर काळाने घाला घातल्याने परिसरात हळहळ व्यक्ती केली जात आहे. अपघातस्थळी महाळुंगे वाहतूक विभाग व महाळुंगे पोलीस चौकीचे कर्मचारी दाखल झाले. वाहतूक विभागाने वाहतूक सुरळीत केली. घटनास्थळी तत्काळ महाळुंगे पोलीस चौकीचे कर्मचारी विठ्ठल वडेकर, अभिजित भोर, प्रितम ढमढेरे, श्रीधर इचके तसेच वाहतूक विभागाचे विलास तळपे, प्रमोद भोजने, स्वप्निल दौंडकर उपस्थित होऊन जखमींना मदत करून रुग्णालयात दाखल केले. जखमीची प्रकृतीही चिंताजनक असल्याची प्राथमिक माहिती समोर आली आहे. पुढील तपास महाळुंगे पोलीस करत आहेत.
जीवितहानी नाही, मात्र कारचे नुकसान
दुसऱ्या घटनेत चालत्या कारवर झाड कोसळले. त्यामुळे कारचे मोठे नुकसान झाल्याची घटना खेड तालुक्यातील चाकण झित्राई मळा येथे घडली आहे. यामध्ये सुदैवाने कोणतीही जीवितहानी झाली नाही. मात्र कारचे मोठे नुकसान झाले आहे. घटनास्थळी चाकण नगरपरिषद, अग्निशामक दलाचे कर्मचारी दाखल झाले होते. कारवर पडलेले झाड बाजूला करून नंतर वाहतूक सुरळीत करण्यात आली. दरम्यान, पावसामुळे अनेक ठिकाणचे वृक्ष मोडकळीस आले आहेत. ते पडण्याच्या आधीच काढावीत, अशी मागणी होत आहे.
