Pune crime : दारूच्या पार्टीत वाद, एकाचा गळा दाबून खून; पिंपरी चिंचवडच्या दिघी पोलिसांनी तिघांना ठोकल्या बेड्या

पिंपरी चिंचवड : पिंपरी-चिंचवड शहरातील दिघी (Dighi) परिसरात दारू पार्टीत वादाचे रुपांतर खून करण्यात झाले आहे. दारू पिण्याच्या वादातून एका 45 वर्षाच्या व्यक्तीची हत्या करण्यात आल्याचा धक्कादायक प्रकार घडला आहे. तीन जणांनी मिळून एकाचा खून केला आणि नदीत फेकून दिला आहे. देहू फाटा ते चाकण रोडवरील इंद्रायणी नदी घाटाजवळ मित्रांसोबत दारूची पार्टी सुरू असताना क्षुल्लक कारणावरून त्यांच्यात वाद झाला. तो टोकाला गेला. त्यातून दीपक या व्यक्तीची मित्रांनी त्याची हत्या केली. याप्रकरणी दिघी पोलिसांनी (Dighi police) बंट्या, शिंदे मामा आणि माधव या तीन जणांच्या विरोधात हत्येचा गुन्हा दाखल केला आहे. सोमवारी ही घटना उघडकीस आली. त्यानंतर पोलिसांत तक्रार दाखल करण्यात आली. पोलिसांना घटनास्थळाची पाहणी करून या तिघांविरोधात गुन्हा दाखल केला आहे आणि त्यांना अटक (Arrested) केली आहे.

तिघांना अटक

माधव अतरुषी साबळे (वय 30, मूळ रा. मु. पो. जांब अंध, ता. सेनगाव, जि. हिंगोली), सुधाकर उर्फ बंटी बबन वाघमारे (वय 30, मूळ रा. हिंगलजवाडी, जि. उस्मानाबाद), ज्ञानेश्वर पुंडलिक शिंदे (वय 56, मूळ रा. मु. पो. हाडुलकी, ता. अहमदपूर, जि. लातूर) अशी अटक केलेल्या आरोपींची नावे आहेत. पोलीस हवालदार गणेश कळंके यांनी सोमवारी दिघी पोलीस ठाण्यात याप्रकरणी फिर्याद दिली आहे.

गळा आवळून खून

पोलिसांनी दिलेल्या माहितीनुसार, रविवारी रात्री साडेनऊ ते सोमवापी सकाळी नऊदरम्यान इंद्रायणी घाटाजवळ आळंदी येथे एकजण बेशुद्ध अवस्थेत सापडला. त्याला पोलिसांनी उपचाराकरिता पिंपरी येथील यशवंतराव चव्हाण स्मृती रुग्णालयात (वायसीएम) दाखल केले. मात्र उपचारापूर्वीच त्याचा मृत्यू झाल्याचे डॉक्टरांनी घोषित केले. शवविच्छेदन अहवालामध्ये त्याचा गळा आवळून खून केल्याचे निष्पन्न झाले आहे. अधिक चौकशी केली असता मृताचे नाव दीपक असल्याचे समजते. दारू पिण्याच्या वादातून त्यांचे भांडण झाले. त्या भांडणातच तिघांनी मिळून दीपकचा गळा आवळून खून केल्याचे उघडकीस आले आहे. याप्रकरणी आरोपी खून करून फरार झाले होते. पोलिसांनी त्यांचा शोध घेत त्यांना अटक केली आहे. अधिक तपास दिघी पोलीस करीत आहेत.