मोबाईलच्या व्यसनाने हे काय केले, संतापाच्या भरात मुलाने केला आईचा खून
तस्लीम शेख हिने गळफास घेऊन आत्महत्या केल्याची माहिती पोलिसांना मिळाली होती. पोलिसांनी तस्लीम यांचा मृतदेह शवविच्छेदनासाठी ससून रुग्णालयात पाठवला. डॉक्टरांना संशय आला.
पुणे : आपल्या मुलांनी मोबाईलच्या (mobile addiction)आहारी जाण्यापुर्वीच पालकांनी सावध व्हायला हवे. अन्यथा मोबाईलचे हे व्यसन चांगलेच महागात पडू शकते. पुणे जिल्ह्यातील (pune crime news) या घटनेमुळे मोबाईलसंदर्भात मुलांचे लाड करणाऱ्या पालकांचे डोळे उघडले असतील. अभ्यास करताना मोबाईल पहात असलेल्या मुलाला आईने रागवले. त्यानंतर मुलाने आईला भिंतीवर ढकलून देऊन गळा दाबून तिचा खून केल्याची घटना घडली आहे. या प्रकरणी मुलाला लोणी काळभोर पोलिसांनी ताब्यात घेतले आहे.यासंदर्भात पोलिसांना आधी चुकीची माहिती दिली गेली. परंतु तपासानंतर वेगळाच प्रकार समोर आला.
नेमका काय आहे प्रकार
पुणे जवळील उरुळी कांचन ग्रामपंचायत हद्दीतील जय मल्हार रोड परिसरात तस्लीम जमीर शेख आपल्या पती व एका मुलासोबत राहत होत्या. तस्लीम शेख हिने गळफास घेऊन आत्महत्या केल्याची माहिती पोलिसांना मिळाली होती. पोलिसांनी तस्लीम यांचा मृतदेह शवविच्छेदनासाठी ससून रुग्णालयात पाठवला. डॉक्टरांना संशय आल्याने तीन डॉक्टरांच्या देखरेखीखाली शवविच्छेदन केले. त्यात गळा दाबून व डोक्याला जखम झाल्याचे स्पष्ट झाले.
पोलिसांनी खुनाच्या संशयाने सुरु केला तपास
पोलिसांनी या प्रकरणाचा तपास खून झाल्याच्या संशयातून करण्यास सुरुवात केली. यासंदर्भात कोणी माहिती देण्यास तयार नव्हते. ही तस्लीमचे पती जमीर आणि मुलगा जिशान यांच्याकडे चौकशी केली. त्यावेळी मुलाने घडलेली घटना सांगितली. जमीर शेख हे नमाज पठणासाठी गेले होते. जिशान हा बारावीला आहे. अभ्यास करताना मोबाईलवर पहात बसला होता. ते पाहून आई रागवली. जिशानच्या गालावर चापट मारली. त्यानंतर जिशानने तिला भिंतीवर ढकलले व तिचा गळा दाबला. त्यात तिचा मृत्यू झाला.
वडिलांना खोटे सांगितले
जिशानने ब्लेडने तस्लीमचे मनगट कापले. परंतु रक्त आले नाही. त्यामुळे तो घाबरला. त्याने वायर फॅनला अडकवली व आईने गळफास घेतल्याचा बनाव तयार केला. वडील घरी आल्यावर त्याने त्याला हिच माहिती दिली. त्यानंतर तस्लीम यांना जवळच्या रुग्णालयात नेले. तेथील डॉक्टरांना संशय आल्याने त्यांनी ससून रुग्णालयात पाठवले. शवविच्छेदनात खूनाचा प्रकार समोर आला. 15 फेब्रवारी रोजी ही घटना घडली होती. परंतु पोलिसांच्या तपासानंतर खून झाल्याचे स्पष्ट झाले.
या प्रकरणी जिशान जमीर शेख (वय १८) याला लोणी काळभोर पोलिसांनी ताब्यात घेतले आहे. याप्रकरणी लोणी काळभोर पोलीस ठाण्याचे पोलीस उपनिरीक्षक अमोल घोडके यांनी फिर्याद दिली आहे.
