Pune water supply : पुणेकरांनो, ‘हे’ चार दिवस ‘पाणीबाणी’ नाही, सुरळीत राहणार पाणीपुरवठा, वाचा सविस्तर…
आषाढी एकादशी आणि बकरी ईदच्या पार्श्वभूमीवर कोणतीही समस्या किंवा गैरसोय होवू नये, म्हणून महापालिकेने पाण्याचा पुरवठा सुरळीत करण्याचा निर्णय घेतला आहे.
पुणे : पुणेकरांसाठी महत्त्वाची बातमी… आषाढी एकादशी आणि बकरी ईदच्या पार्श्वभूमीवर शहरात तीन दिवस पाणीकपात (Water cut) रद्द करण्यात आली आहे. 8 ते 11 जुलै दरम्यान शहरात दररोज पाणीपुरवठा केला जाणार आहे. त्यानंतर धरणातील पाणीसाठा लक्षात घेऊन पाणीकपातीच्या संदर्भात पुढील निर्णय घेतला जाणार आहे, अशी माहिती पाणीपुरवठा विभागाचे मुख्य अभियंता अनिरुद्ध पावसकर यांनी दिली आहे. नुकताच पाणीकपात करण्याचा निर्णय महापालिकेने घेतला होता. धरणक्षेत्रात पावसाचे प्रमाण कमी असल्याने आगामी काळात पाण्याची टंचाई निर्माण होऊ नये, याकरिता हा निर्णय घेण्यात आला होता. आता 4 जुलैपासून ते 11 जुलैपर्यंतचे वेळापत्रकही महापालिकेने ठरवले होते. मात्र रविवारी (ता. 10) आषाढी एकादशी तसेच बकरी ईद असल्यामुळे शुक्रवार, शनिवार आणि रविवारी पाणीकपात होणार नाही.
पाण्याच्या समस्येने पुणेकर त्रस्त
यंदाच्या उन्हाळ्यात पुणेकरांना पाण्याच्या टंचाईने हैराण केले होते. महापालिकेच्या देखभाल, दुरुस्तीच्या कामांवरही संताप व्यक्त केला होता. दर आठवड्याला नेमकी कसली देखभाल आणि दुरुस्तीची कामे केली जातात, असा संताप पुणेकर व्यक्त करत होते. त्यात मान्सूननेही विलंब केला. त्यामुळे पाणीटंचाईत अधिकच भर पडली. तर महापालिकेने पाऊस कमी पडल्याचे कारण सांगून एक दिवसाआड पाणीपुरवठा करण्याचे जाहीर केले. अधिक पाऊस झाल्यानंतर या निर्णयात बदल करण्यात येणार होता. दोन दिवसांपूर्वी मोसमातला चांगला पाऊस पुण्यात झाला. त्यामुळे पाणीटंचाईचे संकट लवकरच दूर होईल, अशी पुणेकरांना अपेक्षा आहे.
नागरिकांची गैरसोय होऊ नये म्हणून…
आषाढी एकादशी आणि बकरी ईदच्या पार्श्वभूमीवर कोणतीही समस्या किंवा गैरसोय होवू नये, म्हणून महापालिकेने पाण्याचा पुरवठा सुरळीत करण्याचा निर्णय घेतला आहे. त्यानंतर म्हणजेच 11 जुलैपासून पाणीपुरवठ्याचे नवे वेळापत्रक जारी केले जाणार आहे. दरम्यान, कालच पुणे वेधशाळेने पुण्यासह पश्चिम महाराष्ट्रात मुसळधार ते अतिमुसळधार पावसाचा इशारा दिला आहे. साधारण 6 जुलै म्हणजे आज ते 8 जुलैदरम्यान हा मुसळधार पाऊस होणार आहे. त्यामुळे धरणांच्या पाणीसाठ्यात वाढ होण्याची महापालिकेला आशा आहे.
