कोरोना लस न घेतल्यास वेतन स्थगिती? पिंपरी चिंचवड महापालिकेचा कर्मचाऱ्यांना इशारा

कोरोना लसीकरण

पिंपरी चिंचवड : पिंपरी चिंचवड महापालिकेच्या (Pimpri Chinchwad) कर्मचाऱ्यांनी कोरोना प्रतिबंधात्मक लस घेतली नसेल, तर त्यांचे वेतन स्थगित होऊ शकते. त्या संबंधीचे परिपत्रक महापालिका आयुक्त राजेश पाटील यांनी काढलं आहे. किमान 20 जुलैपर्यंत कोरोना लसीचा पहिला डोस (Corona Vaccine) घेण्याची मुदत कर्मचाऱ्यांना देण्यात आली आहे. (Pimpri Chinchwad Municipal Commissioner warns salary cut of employees who did not take Corona Vaccine)

20 जुलैपर्यंत लस घेण्याची सूचना

सर्वसामान्य नागरिकांनी कोरोनावरील लस घ्यावी, अशी जनजागृती प्रशासन करत आहे. अशात महापालिकेचे कर्मचारी लसीअभावी मागे राहू नयेत, म्हणून थेट वेतन स्थगित करण्याचा इशारा आयुक्तांनी दिला आहे. कर्मचाऱ्यांनी 20 जुलैपर्यंत लस न घेतल्यास त्यांचं वेतन स्थगित होऊ शकतं, असं परिपत्रकाद्वारे आयुक्तांनी सूचित केलं आहे.

कोणाकोणाला पालिका आयुक्तांचे आदेश?

पिंपरी चिंचवड महापालिकेत एकूण 7 हजार 479 कर्मचारी आहेत. यात अधिकारी, कर्मचारी, सेवानिवृत्त झालेले पेन्शनधारक कर्मचारी, मानधनावरील तसेच ठेकेदार पद्धतीच्या कर्मचाऱ्यांचा समावेश आहे. यापैकी बहुतांश कर्मचाऱ्यांनी कोरोना लसीचे दोन्ही डोस घेतले आहेत, मात्र काही कर्मचाऱ्यांनी अद्यापही ही लस घेतलेली नाही.

सोलापुरात दुकानदारांनाही लसीकरण बंधनकारक

दुसरीकडे, सोलापूर शहरातील दुकानदारांनाही आता कोरोना प्रतिबंधक लसीकरण आणि चाचणी बंधनकारक करण्यात आली आहे.
सोलापूरचे महापालिका आयुक्त पी शिवशंकर यांनी त्यासंबंधी आदेश काढले आहेत. लसीकरण प्रमाणपत्र दुकानात ठेवणे सक्तीचे करण्यात आले आहे.

सोलापूर शहरातील दुकानदार, कारखानदार, उद्योजक यांना आपला व्यवसाय सुरु करण्यासाठी कोरोना चाचणी आणि लसीकरणाचे प्रमाणपत्र दुकानात ठेवणे बंधनकारक असेल. महानगरपालिकेच्या माध्यमातून कोरोना चाचणी केलेल्या छापील आयसीएमआर क्रमांक असलेला वैद्यकीय अधिकारी यांच्या स्वाक्षरीचा निगेटिव्ह रिपोर्ट सोबत बाळगणेही आवश्यक आहे. अन्यथा कारवाई करण्याचा इशारा पालिका आयुक्तांनी दिला आहे.

संबंधित बातम्या : 

कोरोना रोखण्यासाठी लस प्रभावी, मुंबईत दोन डोस घेतलेले फक्त 26 जण बाधित

कोव्हिशील्डच्या दोन डोसमधील 315 दिवसांचं अंतर अधिक प्रभावी, तिसऱ्या डोसने ‘इम्युनिटी’ आणखी वाढणार

(Pimpri Chinchwad Municipal Commissioner warns salary cut of employees who did not take Corona Vaccine)