पिंपरी-चिंचवड महानगरपालिकेचा नवा विक्रम, आतापर्यंतचा सर्वात मोठा उच्चांक गाठला
पिंपरी चिंचवड मनपाने मिळकत कराच्या माध्यमातून एक हजार कोटी रुपयांचं उद्दिष्ट आर्थिक वर्षासाठी ठेवले होते. परंतु या उद्दिष्टापर्यंत मनपा पोहचली नसली तरी पिंपरी चिंचवड महानगरपालिकेच्या कर संकलन विभागाने यंदा विक्रम केला आहे.
पिंपरी चिंचवड : पिंपरी चिंचवड महानगरपालिका देशातील सर्वात श्रीमंत मनपा म्हणून ओळखली जाते. पिंपरी-चिंचवड नगरपालिकेची स्थापना १९८२ मध्ये झाली. त्यानंतरच चारच वर्षांत म्हणजे १९८६ मध्ये नगरपालिकेचे रुपांतर महानगरपालिकेत झाले. आता या मनपाने नवीन विक्रम आपल्या नावावर केला आहे. मनपाच्या चार दशकांचा इतिहासात प्रथमच असा विक्रम झाला आहे. अर्थात त्याला पिंपरी-चिंचवडमधील नागरिकांची मिळालेली साथ आणि अधिकाऱ्यांनी केलेले काम महत्वाचे आहे. यामुळेच हा टप्पा गाठला गेला आहे.
काय केले मनपाने
पिंपरी चिंचवड मनपाने मिळकत कराच्या माध्यमातून एक हजार कोटी रुपयांचं उद्दिष्ट आर्थिक वर्षासाठी ठेवले होते. परंतु या उद्दिष्टापर्यंत मनपा पोहचली नसली तरी पिंपरी चिंचवड महानगरपालिकेच्या कर संकलन विभागाने यंदा विक्रम केला आहे. मनपाने कर संकलनातून 810 कोटी रुपये उत्पन्न मिळवले आहे.महापालिकेच्या इतिहासातील आत्तापर्यंतचे हे सर्वाधिक उत्पन्न आहे.
गेल्या वर्षीच्या तुलनेत मोठी वाढ
गेल्या वर्षी महापालिकेने मिळकत कराच्या माध्यमातून 628 कोटी रुपये उत्पन्न मिळवलं होतं. यंदा त्यामध्ये 35 टक्के वाढ होत हे उत्पन्न 810 कोटीवर पोहोचले. गेल्या वर्षीच्या तुलनेत तब्बल 182 कोटी रुपये अधिक उत्पन्न मिळवण्यात कर संकलन विभागाला यश आले. यावर्षी हजार कोटीचे उद्दिष्ट नक्की पूर्ण करू असा विश्वास कर संकलन विभागाने व्यक्त केला.
मनपा भरतीसाठी उद्या परीक्षा
पिंपरी चिंचवड पोलीस आयुक्तालयातील सन 2021 च्या भरती प्रक्रियेत लेखी परीक्षेमध्ये पात्र ठरलेल्या उमेदवारांची उद्या २ एप्रिल रोजी लेखी परीक्षा होणार आहे. सकाळी साडेआठ वाजता सुरू होणाऱ्या या परीक्षेसाठी उमेदवारांनी दोन तास आधी परीक्षा केंद्रावर पोहोचणे गरजेचे आहे परीक्षेसाठीचे हॉल तिकीट संकेतस्थळावरून डाऊनलोड करता येणार आहे. परीक्षेला येताना लेखी परीक्षेसाठी असलेले हॉल तिकीटही आणावे लागणार आहे.
नदीतील जलपर्णी काढण्यास सुरुवात
पिंपरी चिंचवड महानगरपालिकेच्या हद्दीतून जाणाऱ्या पवना इंद्रायणी नद्यांच्या पात्रात असलेला जलपर्णीचा विषय कायम चर्चेत असतो. या जलपर्णीमुळे नदीचे सौदर्यं बिघडले. यासंदर्भात नागरिकांकडून तक्रारी केल्यानंतर जलपर्णी काढण्यास सुरुवात झाली आहे. मोशी परिसरात महापालिकेकडून इंद्रायणी नदीतून जलपर्णी काढण्यास सुरुवात झालीय. यामुळे नागरिकांनी दिलासा मिळाला आहे.
पुणे, मुंबईकरांना शिंदे सरकारकडून मोठे गिफ्ट, काय होणार तुमचा फायदा…वाचा सविस्तर
