पुणेकरांचा प्रवास सुखकर होणार, काय असणार आहे नवीन पर्याय
100 इलेक्ट्रिक बसेसपैकी 20 इलेक्ट्रिक बस डबल डेकर आहेत. पुणे महापालिकेला 12 आणि पिंपरी-चिंचवड महापालिकेला 8 डबल डेकर बसेस देण्यात येणार आहेत.
पुणे : मुंबईनंतर आता पुणे शहरात (Pune) डबल डेकर बस सुरु होणार आहे. पुणे महानगर परिवहन महामंडळाने (pmpml)आता 300 नवीन बसेस खरेदी करण्यास मान्यता दिली आहे. यातील 200 बस सीएनजीवर तर 100 बस इलेक्ट्रिकवर (new buses) धावणार आहेत. तसेच 20 डबल डेकर बस खरेदी करण्यास परवानगी दिली आहे. परंतु पीएमपीने अद्याप डबल डेकर चालविण्यासाठी निश्चित केलेल्या मार्गांचे सर्वेक्षणच केलेले नाही. यामुळे महानगरपालिकेला आधी सर्वेक्षण करावे लागणार आहे.
300 नवीन बसेस खरेदी करण्यास मान्यता
मुंबईत अलीकडेच ई-डबल डेकर बसेस प्रवाशांच्या सेवेत दाखल झाल्या आहेत. त्यामुळे पुण्यात पुन्हा डबल डेकर बस धावण्याची चर्चा सुरू झाली होती. त्यानुसार पीएमपीच्या संचालक मंडळाच्या बैठकीत तीनशे नवीन बस खरेदीला मान्यता देण्यात आली आहे. यातील 200 बस सीएनजीवर तर 100 बस इलेक्ट्रिकवर धावणार आहेत.
20 इलेक्ट्रिक बस डबल डेकर
100 इलेक्ट्रिक बसेसपैकी 20 इलेक्ट्रिक बस डबल डेकर आहेत. पुणे महापालिकेला 12 आणि पिंपरी-चिंचवड महापालिकेला 8 डबल डेकर बसेस देण्यात येणार आहेत. निगडी भोसरी, कात्रज हडपसर बायपास, महापालिका ते हिंजवडी, कात्रज ते हिंजवडी या मार्गावर ही बस चालविण्याची माहिती पीएमपी प्रशासनाने दिली आहे, मात्र अद्याप यापैकी एकाही मार्गाचे सर्वेक्षण झालेले नाही.
पुणे महानगर परिवहन महामंडळाने डबल डेकर बस चालवण्याचा निर्णय घेतला आहे. परंतु त्यासंदर्भातील मार्ग निश्चित केला नाही. त्या मार्गावर उड्डाणपूल, मोठी झाडे, फांद्या, ओव्हरहेड वायर्स याची माहिती पीएमपी प्रशासनाकडे नाही. महापालिका ते हिंजवडी दरम्यान धावणारी डबल डेकर बस बाणेर मार्गावरून धावणार असल्याचे सांगण्यात आले आहे, मात्र या मार्गावरील रस्त्यालगतची झाडे, चौकातील सिग्नल, खांब, रस्त्यावर लोंबकळलेल्या विद्युत तारा, उड्डाणपूल आदींची माहिती घेण्यात आली आहे.
या मार्गांचा विस्तार
पुणे परिवहन मंडळाने हडपसर-थेऊर रस्ता वाघोली, भारती विद्यापीठ-स्वारगेट ते शनिवारवाडा, राजस सोसायटी-स्वारगेट ते शिवाजीनगर आणि निगडी-नवलख उंब्रे ते ग्रीन बेस कंपनीपर्यंत मार्ग विस्तारित करण्याचा निर्णय घेतला आहे. याआधी येवलेवाडीहून पुणे रेल्वे स्थानकावर जाण्यासाठी प्रवाशांना दोन बस बदलाव्या लागत होत्या, मात्र आता मार्गाचा विस्तार झाल्यानंतर प्रवाशांचा वेळ वाचणार असून त्यांचा प्रवासही सुकर होणार आहे. इतर मार्गांवरही अशीच सुविधा उपलब्ध होणार आहे.
उरुळी कांचन ते नांदूरगाव, गुजरात कॉलनी ते पुणे रेल्वे स्टेशन, आळंदी ते खराडी, येवलेवाडी ते पुणे रेल्वे स्टेशन, हडपसर ते पुणे रेल्वे स्टेशन, शेववाडी ते एनटी वाडी डेपो, आळंदी ते तळेगाव डेपो, घरकुल आहेत. याशिवाय वसाहत ते पिंपरी गाव, भोसरी ते चिखली, आणि भोसरी ते कोथरूड आगारासाठीही नवीन बससेवा सुरू होणार आहे.
