पुणे, पिंपरी चिंचवडमध्ये भ्रष्टाचाराच्या चर्चांना पुन्हा जोर, आगामी महापालिका निवडणुकीत काय गणितं बदलणार?
पिंपरी चिंचवड महापालिकेच्या (Pimpri Chinchwad Municipal Corporation) स्थायी समितीचे अध्यक्ष नितीन लांडगे (Nitin Landge) यांच्यावर 9 लाखाच्या लाच प्रकरणात लाचलुचपत प्रतिबंधक विभागानं (ACB) कारवाई करत अटक केली आहे. या निमित्तानं पुणे आणि पिंपरी चिंचवड महानगरपालिकांमधल्या भ्रष्टाचाराचा मुद्दा पुन्हा चर्चेच्या अग्रभागी आला आहे.
पुणे : पिंपरी चिंचवड महापालिकेच्या (Pimpri Chinchwad Municipal Corporation) स्थायी समितीचे अध्यक्ष नितीन लांडगे (Nitin Landge) यांच्यावर 9 लाखाच्या लाच प्रकरणात लाचलुचपत प्रतिबंधक विभागानं (ACB) कारवाई करत अटक केली आहे. लांडगे यांना शनिवारपर्यंत पोलीस कोठडी (Police Custody) सुनावण्यात आली आहे. या अटकेनंतर पिंपरी चिंचवड आणि पुण्याच्या राजकीय वर्तुळात खळबळ उडाली. नितीन लांडगे यांना राजकीय हेतूने अडकवण्याचा प्रयत्न केला गेलाय असं भाजपकडून सांगण्यात येत आहे तर विरोधकांनी भ्रष्टाचाराच्या मुद्द्यावर आक्रमक पवित्रा घेतला. पण या निमित्तानं पुणे आणि पिंपरी चिंचवड महानगरपालिकांमधल्या भ्रष्टाचाराचा मुद्दा पुन्हा चर्चेच्या अग्रभागी आला आहे. (The issue of corruption is most discussed in Pune and Pimpri Chinchwad Municipal Corporations)
भाजपची सत्ता आल्यापासून ९ प्रकरणांमध्ये रंगेहाथ पकडलं
पिंपरी चिंचवडमध्ये लाचखोरीच्या या घटनेनंतर सत्ताधारी भाजपाची राजवट आणि महापालिकेचा कारभार चर्चेचा विषय बनला आहे. गेल्या १५ वर्षात महापालिकेत लाच प्रकरणाची २७ प्रकरणे उघडकीस आली आहेत. महापालिकेत भाजपची सत्ता आल्यापासून गेल्या साडेचार वर्षांत नऊ प्रकरणांमध्ये बारा जणांना पैसे घेताना रंगेहाथ पकडण्यात आलं आहे. महापालिकेत कसलंही काम असो, कोणत्याही फाईलवर सही करायची असो, त्यासाठी फाईलचं ‘वजन’ वाढवावंच लागतं, असा अलिखित नियमच झाल्याचं अनेकजण सांगतात.
२०१७ मध्ये पिंपरी चिंचवड महापालिकेचे तत्कालिन आयुक्त दिनेश वाघमारे यांच्या स्वीय सहाय्यकाला १२ लाख रुपयांची लाच घेताना पकडण्यात आलं होतं. त्यानंतर महापालिकेचे मुख्याध्यापक, सहाय्यक आरोग्य अधिकारी, लेखाधिकारी, आरोग्य कर्मचारी यांना लाच घेताना रंगेहाथ अटक केली होती. पालिकेतल्या आरोग्य, शिक्षण, लेखा, नगरसचिव विभागातल्या कर्मचाऱ्यांचा लाचखोरीत प्रमुख्याने समावेश आहे.
पुणे महापालिकेतल्या अधिकारी, कर्मचाऱ्यांवर सापळा रचून कारवाई
दुसरीकडे पुणे महापालिका प्रशासनातही लाचखोरीच्या अनेक घटना मागच्या काही वर्षांत उघडकीस आल्या आहेत. पुणे महापालिका प्रशासनातल्या अधिकारी कर्मचाऱ्यांवर अनेकदा सापळा लावून कारवाई करण्यात आली आहे. यावर्षी मे महिन्याच्या मध्यापर्यंत लाचलुचपत प्रतिबंधक विभागाने लाच मागणाऱ्या शासकीय अधिकारी आणि कर्मचाऱ्यांना पकडण्यासाठी एकूण २८१ सापळे रचले. त्यात काही खासगी व्यक्ती, दलालांसह ३८१ जणांना सुमारे ७० लाख रुपयांची लाच स्वीकारताना पकडण्यात आलं आहे. यामध्ये महसूल आणि पोलीस विभागातल्या अधिकारी, कर्मचाऱ्यांवर प्रत्येकी ५८ कारवाया झाल्या आहेत.
आगामी निवडणुकीत गाजणार भ्रष्टाचाराचा मुद्दा
२०२२ मध्ये पुणे आणि पिंपरी चिंचवड महानगरपालिकेची मुदत संपत आहे. त्यामुळे सगळे राजकीय पक्ष निवडणुकीच्या तयारीला लागलेत. सध्या कोरोनाचा प्रादुर्भावाचा निवडणुकीवर काय परिणाम होईल हे सांगता येत नसलं तरी, राजकीय पक्षांनी मोर्चेबांधणी सुरू केली आहे. त्यात हा भ्रष्टाचाराचा मुद्दा पुढे आल्यानं विरोधकांना आयतं कोलित मिळालं आहे. राष्ट्रवादीवर भ्रष्टाचाराचे आरोप करत भाजपनं महापालिकेत सत्ता मिळवली मात्र, आता थेट स्थायी समिती अध्यक्ष लाच प्रकरणात कोठडीत गेल्याने हा मुद्दा येत्या निवडणुकीत गाजणार यात शंका नाही.
संबंधित बातम्या :