Satara Accident : देवदर्शनाला चाललेली ओमनी कार झाडावर आदळली, चार ठार तर पाच जखमी
बाळूमामाच्या मेंढराच्या देवस्थानी आठ जण दर्शनासाठी चालले होते. मात्र देवदर्शनाला पोहचण्याआधीच काळाने भाविकांवर घाला घातला.
सातारा / 10 ऑगस्ट 2023 : देवदर्शनाला चाललेली ओमनी कार झाडावर आदळून चार प्रवाशांचा मृत्यू झाला तर चार जण गंभीर जखमी झाले. जखमींना उपचारासाठी वडूज आणि सातारा येथील रुग्णालयात उपचारासाठी दाखल केले आहे. खटाव तालुक्यातील धोंडेवाडी येथील पेट्रोल पंपानजीक सूर्याचीवाडी हद्दीत ही घटना घडली. बाळू मामाच्या मेंढराचे एक देवस्थान लाकरेवाडी येथे आहे. तेथे देवदर्शनासाठी जात असताना हा अपघात झाला. अपघातातील मृत आणि जखमी हे बनपुरी, सिधेश्वर कुरोली येथील रहिवासी असल्याचे समजते. तिघांचा जागीच मृत्यू झाला तर एकाचा उपचारादरम्यान मृत्यू झाला. मृतांमध्ये एक पुरुष आणि दोन महिलांचा समावेश आहे.
देवदर्शनासाठी जात असताना घडला अपघात
खटाव तालुक्यातील बनपुरी आणि सिध्देश्वर कुरोली येथील एकूण आठ जण देवदर्शनासाठी निघाले होते. दहीवडी-मायणी रस्त्यावरील सुर्याचीवाडी येथे पहाटे सहा वाजता ओमनी कारवरील चालकाचे नियंत्रण सुटले. यामुळे कार झाडावर आदळून भीषण अपघात झाला. या अपघातात एक पुरुष आणि दोन महिला जागीच ठार झाल्या. तर एका महिलेचा उपचारादरम्यान मृत्यू झाला आहे. जखमींना वडूज आणि सातारा येथील रुग्णालयांमध्ये अधिक उपचारासाठी दाखल करण्यात आले आहे.
या अपघाताची माहिती वडूज पोलिसांना मिळताच पोलिसांनी घटनास्थळी धाव घेत जखमींना उपचारासाठी हलवले. अपघातग्रस्त वाहन घटनास्थळावरून हलवले असून, वडूज पोलीस ठाण्यात या अपघाताची नोंद करण्यात आली आहे.
