उद्धव ठाकरे आणि फडणवीस यांच्यासोबत लिफ्टमध्ये अजितदादा गटाचा हा नेताही होता?; काय घडलं?
माजी मुख्यमंत्री उद्धव ठाकरे आणि उपमुख्यमंत्री देवेंद्र फडणवीस हे विधान भवनाच्या लिफ्टमध्ये एकत्र भेटले. यावेळी दोन्ही नेत्यांनी एकमेकांना जय महाराष्ट्र केला. दोन्ही नेत्यांनी एकमेकांची विचारपूसही केली. ही बातमी फुटल्यानंतर चर्चांना उधाण आलं. पण या दोन्ही नेत्यांसोबत एक तिसरा नेताही लिफ्टमध्ये होता. हा नेता अजितदादा गटाचा होता.
राज्याचे माजी मुख्यमंत्री उद्धव ठाकरे आणि उपमुख्यमंत्री देवेंद्र फडणवीस दोघांची आज विधानभवनात अचानक भेट झाली. विधानभवनाच्या लिफ्ट जवळ दोन्ही नेते भेटले. त्यानंतर या दोन्ही नेत्यांनी लिफ्टमधून प्रवासही केला. त्यामुळे राजकीय वर्तुळात जोरदार चर्चांना उधाण आलं आहे. ठाकरे आणि फडणवीस यांच्यात यावेळी काय चर्चा झाली? कुणी कुणाला डोळा मारला? लोकसभा निवडणुकीनंतर दोन्ही नेत्यांमध्ये संवादाच्या अभावाची कोंडी फुटली का? अशा चर्चा या भेटीनंतर होऊ लागल्या आहेत. तसेच लिफ्टमध्ये हे दोन नेते आणि मिलिंद नार्वेकर असे तिघेच होते, असं सांगितलं जात होतं. पण या लिफ्टमध्ये आणखी नेता असल्याचं समोर आलं आहे. हा नेता अजितदादा गटाचा असल्याचं उघड झालं आहे.
राज्याचं पावसाळी अधिवेशन आजपासून सुरू होत आहे. त्यामुळे उद्धव ठाकरे हे अधिवेशनासाठी विधानभवनात आले होते. पक्ष कार्यालयात जाण्यासाठी ते लिफ्ट जवळ आले. तिथे योगायोगाने देवेंद्र फडणवीसही आले. यावेळी दोन्ही नेत्यांनी एकमेकांना नमस्कार केला. यावेळी राष्ट्रवादीचे नेते छगन भुजबळही तिथे आले. या तिन्ही नेत्यांनी लिफ्टमधून एकत्र प्रवास केला. सोबत मिलिंद नार्वेकरही होते. या भेटीनंतर छगन भुजबळ यांनी मीडियाशी संवाद साधला. आम्ही लिफ्टमध्ये एकत्र होतो. आम्ही एकमेकांना जय महाराष्ट्र केला. तेवढ्यात पहिला मजला आला. मी सुद्धा दोघांना जय महाराष्ट्र करून बाहेर पडलो, असं छगन भुजबळ म्हणाले.
कुणाला डोळा मारला ते सांगा?
उद्धव ठाकरे यांनीही या भेटीवर प्रतिक्रिया व्यक्त केली आहे. लिफ्टच्या बाहेर राहिलेल्यांनी विचार करावा, असं उद्धव ठाकरे म्हणाले. मी कुणाला डोळा मारता ते सांगा ? मी डोळा मारला असं वाटतं तर मी उद्यापासून गॉगल लावून येतो, असं मिश्किल विधान त्यांनी केलं.
लॉबीत काय काय घडलं?
उद्धव ठाकरे हे विधानभवनात आल्यानंतर विधानभवनाच्या लॉबीत आले. पहिल्या मजल्यावर जाण्यासाठी ते लिफ्टजवळ येऊन उभे राहिले. त्यावेळी देवेंद्र फडणवीस आणि उद्धव ठाकरे यांची तीन मिनिटांची भेट झाली. लिफ्टची वाट पाहत असताना हे दोन्ही नेते समोरा समोर आले. यावेळी छगन भुजबळही उपस्थित होते. लिफ्ट येईपर्यंत या दोन्ही नेत्यांचा अडीच मिनिटं संवाद झाला. दोघेही नेते लिफ्टमधून जात असताना लिफ्टमध्ये उद्धव ठाकरे यांचे स्विय सहाय्यक मिलिंद नार्वेकर, प्रविण दरेकर आणि छगन भुजबळ उपस्थित होते.