हरियाणामध्ये स्थानिक तरुणांना खासगी नोकऱ्यांमध्ये 75 टक्के आरक्षण; 15 जानेवारीपासून होणार नव्या कायद्याची अंमलबजावणी

खासगी क्षेत्रात जॉब करू इच्छिनाऱ्या स्थानिकांसाठी हरियाणा सरकारने महत्त्वपूर्ण निर्णय घेतला आहे. नव्या निर्णयानुसार आता स्थानिक तरुणांना राज्यातील खासगी नोकऱ्यांमध्ये 75 टक्के आरक्षण मिळणार आहे. नवा कायदा येत्या 15 जानेवारी 2022 पासून लागू होणार आहे.

टीव्ही 9 मराठी डिजीटल टीम | Updated on: Nov 07, 2021 | 4:36 PM

नवी दिल्ली – खासगी क्षेत्रात जॉब करू इच्छिनाऱ्या स्थानिकांसाठी हरियाणा सरकारने महत्त्वपूर्ण निर्णय घेतला आहे. नव्या निर्णयानुसार आता स्थानिक तरुणांना राज्यातील खासगी नोकऱ्यांमध्ये 75 टक्के आरक्षण मिळणार आहे. नवा कायदा येत्या 15 जानेवारी 2022 पासून लागू होणार असून, याबाबत हरियाणा सरकारकडून माहिती देण्यात आली आहे. मुख्यमंत्री मनोहर लाल खट्टर यांनी म्हटले आहे की, राज्यातील तरुणांना मोठ्याप्रमाणात रोजगार कसा उपलब्ध होईल यासाठी सरकार प्रयत्नशील आहे. याच पार्श्वभूमीवर रोजगारासंबधीत नवा कायदा येत्या 15 जानेवारी 2022 पासून लागू होणार आहे. या कायद्यामुळे स्थानिकांना मोठ्याप्रमाणात रोजगार उपलब्ध होऊन, स्थलांतरणाला आळा बसेल.

राज्यपालांची विधेयकाला मंजुरी

या वर्षीच्या मार्च महिन्यामध्येच हरियाणाचे राज्यपाल बंडारू दत्तात्रेय यांनी संबंधित विधेयकाला मान्यता दिली होती. त्यामुळे आता 15 जानेवारी 2022 पासून खासगी क्षेत्रातील रोजगारासंबंधी नवा कायदा लागू होणार आहे. नव्या कायद्यानुसार जे लोक हरियानाचे रहिवासी असून खासगी क्षेत्रात काम करत आहेत आणि त्यांचे मासिक उत्पन्न हे 30 हजारांच्या खाली आहे, अशा लोकांना आता नोकरीमध्ये 75 टक्के आरक्षण दिले जाणार आहे.

…तर कंपन्यांवर होणार कारवाई

खट्टर यांनी म्हटले आहे की, हा नवा कर्मचारी कायदा खासगी क्षेत्रातील सर्व अस्थापना, कंपन्या आणि व्यवसायांना लागू होणार आहे. नियमानुसार कंपन्यांमध्ये 75 टक्के स्थानिक तरुणांची भरती करणे बंधनकारक असणार आहे. ज्या अस्थापनाचे कर्मचारी हे दहापेक्षा कमी आहेत, अशा व्यवसायांना या कायद्यामधून सूट देण्यात आल्याची माहिती त्यांनी दिली. या सर्वांची राज्य सरकारकडे नोंद राहाणार असून, नियमांचे उल्लंघन करणाऱ्या कंपन्यांवर कारवाईचा इशारा मुख्यमंत्र्यांकडून देण्यात आला आहे.

उपमुख्यमंत्र्यांकडून कायद्याचे स्वागत

उपमुख्यमंत्री दुष्यंत चौटाला यांनी देखील या कायद्याचे कौतुक केले असून, नव्या कायद्यामुळे रोजगारासंबंधीत स्थानिक तरुणांवर होणारा अन्याय दूर होईल अशी अपेक्षा त्यांनी व्यक्ती केली आहे. नव्या कायद्यामुळे स्थानिक तरुणांना खासगी क्षेत्रातीत नोकऱ्यांमध्ये 75 टक्के आरक्ष मिळणार असून, ज्या कंपन्या नियमांचे उल्लंघन करतील त्यांच्यावर दंडात्मक कारवाई करण्यात येणार असल्याचे चौटाला यांनी सांगितले.

हरियाणा में 75% नौकरियां सूबे के लोगों के लिए ‘आरक्षित’: जानें- क्या कहता है रोजगार ऐक्ट, जो 15 जनवरी से आएगा अमल में https://t.co/4ok7YSEtOt

— DPR Haryana (@DiprHaryana) November 6, 2021