आरोग्यमंत्र्यांवर गोळ्या घालणाऱ्या पोलीस अधिकाऱ्याने आधी घरी केला Video Call नंतर झाडल्या गोळ्या
एएसआय गोपाल दास हा मनोरुग्ण आहे. त्याच्यावर 7-8 वर्षांपासून उपचार सुरू आहेत. या आजारासाठी तो गेल्या 7-8 वर्षांपासून औषध घेत आहे. औषधे घेतल्यानंतर तो नेहमी सामान्य वागायचा.
भुवनेश्वर : ओडिशाचे आरोग्य मंत्री नाबा दास यांच्यावर (Odisha Health Minister Naba Das) रविवारी जीवघेणा हल्ला झाला होता. झारसुगुडा जिल्ह्यातील बृजराजनगर येथील एका कार्यक्रमात भाग घेण्यासाठी आले असताना त्यांच्यांवर हा हल्ला झाला. या हल्ल्यात नाबा दास यांचा मृत्यू झाला. एका पोलीस कर्मचाऱ्यानेच त्यांच्यावर गोळ्या घातल्या. प्रचंड सुरक्षा बंदोबस्त असतानाही हा हल्ला झाल्याने एकच खळबळ उडाली आहे.
ओडिशाचे आरोग्य मंत्री नाबा दास एका कार्यक्रमासाठी झारसुगुडा जिल्ह्यातील बृजराजनगरजवळ आले होते. त्यावेळी त्यांच्यांवर एकापाठोपाठ ५ राऊंड गोळीबार करण्यात आला. धक्कादायक बाब म्हणजे नबा दास यांच्यावर गोळीबार करणारा दुसरा कोणी नसून पोलीस अधिकारी आहे. ASI गोपाल दास त्याचे नाव आहे. तो झारसुगुडा जिल्ह्यातील बृजराजनगर येथील गांधी चौक पोलिस चौकीत तैनात होतो. गोपाल दासने आपल्या रिव्हॉल्वरने नबा दास यांच्यावर गोळीबार केला. आता गोपाल दास याच्या पत्नीने धक्कादायक माहिती दिली आहे.
पत्नीकडून धक्कादायक माहिती
एएसआय गोपाल दास यांच्या पत्नी जयंती दास यांनी माध्यमांना माहिती दिली. त्या म्हणाल्या, घटनेच्या आधी गोपालचे मुलीशी व्हिडिओ कॉलवर बोलणे झाले होते. तो त्यांचा शेवटचा कॉल होता. काय झाले हे मला माहीत नाही. मला बातमीवरून या घटनेची माहिती मिळाली. माझे त्या दिवशी गोपालशी बोलणे झाले नाही. यापुर्वी पाच महिन्यांपूर्वी तो घरी आला होता.
गोपालदास मनोरुग्ण
एएसआय गोपाल दास हा मनोरुग्ण आहे. त्याच्यावर 7-8 वर्षांपासून उपचार सुरू आहेत. या आजारासाठी तो गेल्या 7-8 वर्षांपासून औषध घेत आहे. औषधे घेतल्यानंतर तो नेहमी सामान्य वागायचा, असे जयंती दास यांनी सांगितले.
गोळीबार करुन फरार
प्रत्यक्षदर्शींनी सांगितले की, एका सार्वजनिक कार्यालयासाठी नबा दास प्रमुख पाहुणे म्हणून आले होते. त्यांच्या स्वागतासाठी घटनास्थळी मोठी गर्दी झाली होती. त्यावेळी जवळून गोळीबार करून एक पोलीस पळून जात असल्याचे लोकांनी पाहिले.
शनी शिंगणापूरला १ कोटींची देणगी
बिजू जनता दलाचे ज्येष्ठ नेते नबा दास महाराष्ट्रातही चर्चेत आले होते. त्यांनी शनी शिंगणापूर मंदिराला एक कोटी रुपयांहून अधिक किमतीचा सोन्याचा कलश दान केला होता. १.७ किलो सोने आणि ५ किलो चांदीचा हा कलश होता.
सर्वात श्रीमंत मंत्री
नबा दास हे ओडिशा सरकारमधील सर्वात श्रीमंत मंत्र्यांपैकी एक आहेत. त्यांच्याकडे संबलपूर, भुवनेश्वर आणि झारसुगुडा येथील विविध बँकांमध्ये 45 लाख रुपयांहून अधिक ठेवी आहेत. त्यांच्यांकडे सुमारे 15 कोटी रुपयांची 70 हून अधिक वाहने आहेत. ज्यामध्ये 1.14 कोटी किमतीची मर्सिडीज बेंझ देखील समाविष्ट आहे.