जेवणाची पाकिट घेण्यासाठी थांबले, पण १५ जणांच्या आयुष्यातील शेवटचे जेवण ठरले
परतणाऱ्या लोकांसाठी मध्य प्रदेशातील सिधी येथील चुरहट-रीवा राष्ट्रीय महामार्गावर जेवणाच्या पाकिटांची व्यवस्था केली होती. तीन बसेस त्यासाठी थांबल्या होत्या.
भोपाळ : शबरी मातेच्या जयंतीनिमित्त मध्य प्रदेशातील सतनामध्ये कोल समाजाचा महाकुंभ 24 फेब्रुवारी रोजी (Kol Samaj Sammelan)आयोजित केला होता. या कार्यक्रमात केंद्रीय गृहमंत्री अमित शाह (Amit shah), मध्य प्रदेशचे मुख्यमंत्री शिवराजसिंह चौहान (shivraj singh chouhan) सहभागी झाले होते. या महाकुंभामध्ये सहभागी होण्यासाठी राज्यभरातून लोक आले होते. कार्यक्रम आटोपून अनेक जण आपल्या गावाकडे परत निघाले. परतणाऱ्या लोकांसाठी मध्य प्रदेशातील सिधी येथील चुरहट-रीवा राष्ट्रीय महामार्गावर जेवणाच्या पाकिटांची व्यवस्था केली होती. तीन बसेस त्यासाठी थांबल्या होत्या. परंतु ही जेवणाची पाकिटे त्यांच्या आयुष्यातील शेवटची ठरली.
ट्रकने धडक दिली तेव्हा काही प्रवाशी जेवणाची पाकिटे घेऊन बसमध्ये बसली होती. परंतु या तीन बसेसला ट्रकने धडक दिल्यामुळे पंधरा जणांचा मृत्यू झाला.
रीवा आणि सतना जिल्ह्यांच्या सीमेवर शुक्रवारी रात्री उभ्या असलेल्या या बसेसवर एका सिमेंटच्या ट्रक आदळला. त्या ट्रकने तीन बसेसला धडक दिली. या अपघातात 15 जणांचा मृ्त्यू झाला. अपघातातील दहा मृतांची ओळख पटली आहे. इतर पाच जणांची ओळख अजून पटलेली नाही.या अपघातात जखमी झालेल्यापैकी 10 जणांची प्रकृती गंभीर आहे. बरखडा गावाजवळील बोगद्याच्या बाहेर शुक्रवारी रात्री हा अपघात झाला आहे.
महाकुंभात गेले होते
सतना येथे आयोजित कोल समाजाच्या महाकुंभात सहभागी होऊन या बसेस परतत येत होत्या. या कार्यक्रमात केंद्रीय गृहमंत्री अमित शहा आणि मुख्यमंत्री शिवराज सिंह देखील सहभागी झाले होते. सीएम शिवराज सिधीमध्ये होते. माहिती मिळताच त्यांनी बडखरा गाव गाठले.
दोन बसेस दरीत कोसळल्या
रात्री ९ वाजता मोहनिया बोगद्यापासून काही अंतरावर हा अपघात झाल्याचे प्रत्यक्षदर्शींनी सांगितले. येथे भरधाव ट्रकने धडक दिल्याने दोन बस 10 फूट खोल दरीत कोसळल्या. महामार्गावरच एक बस उलटली. ट्रक सिमेंटने भरलेला होता, धडकेनंतर उलटला.
जिल्हाधिकारी आणि पोलिस अधीक्षकांसह सिधी आणि रीवा जिल्ह्याचे उच्च अधिकारी घटनास्थळी पोहोचले आहेत आणि दोन्ही बसमधील सर्व प्रवाशांना बाहेर काढण्यात आले आहे. मुख्यमंत्री शिवराज सिंह चौहान आणि भारतीय जनता पक्षाच्या मध्य प्रदेश युनिटचे अध्यक्ष विष्णू दत्त शर्मा हे देखील सतना येथून घटनास्थळी पोहोचले होते, असे अधिकाऱ्याने सांगितले.
