प्रभासच्या ‘बाहुबली’मधील दृश्यामुळे ‘या’ ठिकाणाला मिळालं नाव; इथल्या निसर्गसौंदर्यात जाल हरवून!
एखाद्या ठिकाणी फिरायला गेलात तर तिथल्या ऑफ-बीट स्थळांना भेट देण्याचा अनुभव वेगळाच असतो. 'बाहुबली हिल्स' ही अशीच एक ऑफ-बीट जागा असून सोशल मीडियामुळे त्याला लोकप्रियता मिळत आहे. इथल्या सुर्योदयाचं दृश्य कायम मनाच्या एका कोपऱ्यात साठवण्याइतकं सुंदर आहे.
सोशल मीडियाद्वारे हे ठिकाण जसजसं लोकप्रिय होऊ लागलं, तसतसं याठिकाणी प्री-वेडिंग शूट करणाऱ्यांची गर्दी वाढत जातेय. मात्र इथलं निसर्गसौंदर्य आणि शांतता पर्यटकांना एक वेगळाच अनुभव देऊन जातो.
बाहुबली हिल्सचं सुंदर दृश्य पाहण्यासाठी तुम्हाला 10 मिनिटं ट्रेक करावं लागेल. वर चढल्यानंतर तिथे चहा-कॉफी आणि मॅगीचे दोन-तीन स्टॉल्ससुद्धा आहेत. इथला सुर्योदय पाहण्यासाठी पहाटे 5 वाजल्यापासून लोक वर चढू लागतात. सुर्योदय आणि बडी लेकमधील त्याचं अप्रतिम प्रतिबिंब तुमच्या मनावर कायमचं कोरलं जाईल.
इथले स्थानिक याला 'बडी हिल्स' असंच म्हणतात. मात्र पर्यटकांची ये-जा वाढल्यानंतर त्याला 'बाहुबली हिल्स' हे नाव कसं पडलं, याचं उत्तर अद्याप कोणालाच माहीत नाही. साऊथ सुपरस्टार प्रभासच्या 'बाहुबली' या चित्रपटात दाखवलेल्या दृश्यासारखं हे ठिकाण असल्याने त्याला 'बाहुबली हिल्स' नाव पडल्याचंही म्हटलं जातं.
उदयपूर शहरापासून अवघ्या 12 किलोमीटर अंतरावर हे सुंदर ठिकाण आहे. इथे जाताना लागणं बडी लेक हे 'लेक पिचोला' किंवा 'लेक फतेह सागर'इतकं लोकप्रिय नाही, पण तरीसुद्धा हळूहळू हे ठिकाण लोकांचं लक्ष वेधत चाललं आहे. या बडी लेकपासून एक किलोमीटर अंतरावर 'बाहुबली हिल्स' किंवा 'बडी हिल्स' हे ठिकाण आहे.
उदयपूर म्हटलं की आपल्याला शाही पॅलेस, विविध तलाव, महाल हेच चित्र डोळ्यांसमोर येतं. इथला राजेशाही पाहुणाचार पर्यटकांना या शहराच्या प्रेमात पाडतं. पण उदयपूरमध्ये असं एक ठिकाण आहे, जिथलं नैसर्गिक पाहून तुम्ही वारंवार तिथे जाण्याची इच्छा व्यक्त कराल.