समंथाच्या पूर्व पतीच्या साखरपुड्याचे फोटो समोर; होणाऱ्या सुनेबद्दल नागार्जुन म्हणाले..
प्रसिद्ध दाक्षिणात्य अभिनेता नाग चैतन्यने गर्लफ्रेंड सोभिता धुलिपालाशी साखरपुडा केला आहे. या साखरपुड्याचे पहिले फोटो त्याचे वडील नागार्जुन यांनी सोशल मीडियावर पोस्ट केले आहेत. नाग चैतन्य आणि सोभिता हे दोघं गेल्या काही वर्षांपासून एकमेकांना डेट करत होते.
रिलेशनशिपबाबतच्या बऱ्याच चर्चांनंतर अखेर दाक्षिणात्य अभिनेता नाग चैतन्य आणि सोभिता धुलिपाला यांनी साखरपुडा केला आहे. नाग चैतन्यचे वडील आणि प्रसिद्ध अभिनेते नागार्जुन यांनी सोशल मीडियावर या साखरपुड्याचे पहिले फोटो पोस्ट केले आहेत.
'नाग चैतन्य आणि सोभिता धुलिपाला यांचा साखरपुडा आज सकाळी 9.42 वाजता पार पडला. आमच्या कुटुंबात तिचं स्वागत करण्यासाठी आम्ही फारच उत्सुक आहोत. या आनंदी जोडप्याला खूप शुभेच्छा. त्यांना आयुष्यभराचं प्रेम आणि आनंद मिळो', अशा शब्दांत नागार्जुन यांनी भावना व्यक्त केल्या आहेत.
नागार्जुन यांनी या पोस्टमध्ये साखरपुड्याच्या तारखेचं महत्त्वही सांगितलं आहे. '8.8.8 अनंत प्रेमाची सुरुवात', असं त्यांनी पुढे लिहिलंय. 8 तारीख, आठवा महिना आणि 2024 या वर्षाची बेरीजसुद्धा 8 येत असल्याने आजचा दिवस अत्यंत खास असल्याचं मानलं जात आहे.
नाग चैतन्यने याआधी 2017 मध्ये अभिनेत्री समंथा रुथ प्रभूशी लग्न केलं होतं. मात्र लग्नाच्या चार वर्षांतच हे दोघं विभक्त झाले. 2021 मध्ये सोशल मीडियावर पोस्ट लिहित दोघांनी घटस्फोट घेत असल्याचं जाहीर केलं होतं. त्यानंतर नाग चैतन्यचं नाव सोभितासोबत जोडलं गेलं होतं.
सोभिता ही प्रसिद्ध मॉडेल आणि अभिनेत्री आहे. तिने 2013 मध्ये 'फेमिना मिस इंडिया अर्थ'चा किताब पटकावला होता. सोभिताने हिंदी आणि तेलुगू चित्रपटांमध्ये काम केलंय. 2023 मध्ये तिने हॉलिवूडच्या 'मंकी मॅन'मध्येही भूमिका साकारली होती.