Rajyasabha Election 2022: विधानभवनात मतदानाला हजर रहा… शिवसेना आमदारांना पक्षाचा व्हिप जारी
Rajyasabha Election 2022: शिवसेनेतर्फे सर्व आमदारांना व्हिप जारी. राज्यसभेच्या मतदानाला हजर राहून पक्षादेशानुसार, मतदान करण्याचे आदेश
मुंबईः राज्यसभा निवडणुकीच्या (Rajyasabha Election) पार्श्वभूमीवर सर्वच राजकीय पक्ष खबरदारी घेत असून शिवसेनेनं आपल्या आमदारांना व्हिप (ShivSena Whip) जारी केला आहे. शिवसेनेचे मुख्य प्रतोद सुनिल प्रभू (Sunil Prabhu) यांनी व्हिप जारी केला आहे. व्हिप हा पक्षाचा आदेश असून यानुसार, शिवसेना आमदारांना मतदान करण्यास सांगण्यात आलं आहे. 10 जून रोजी राज्यसभेसाठी महाराष्ट्र विधान भवनात मतदान होणार आहे. याकरिता विधानभवनातील शिवसेना पक्ष कार्यालयात सकाळी आठ वाजता सर्व आमदारांनी हजर राहण्याच्या सूचना देण्यात आल्या आहेत. राज्यसभेच्या निवडणुकीत घोडेबाजार होऊ नये, याची खबरदारी शिवसेनेकडून घेतली जात असून कालच मुख्यमंत्री उद्धव ठाकरे यांनी मविआतील आमदारांची महत्त्वाची बैठक घेतली. त्यानंतर आज शिवसेनेतर्फे त्यांच्या आमदारांना व्हिप जारी करण्यात आला आहे.
शिवसेनेच्या (व्हिप) पक्षादेशात काय सूचना?
शिवसेनेनं जारी केलेल्या व्हिपमध्ये पुढील सूचना देण्यात आली आहे.- राज्यसभा निवडणुकीचे मतदान शुक्रवार दिनांक 10 जून 2022 रोजी सकाळी 9ते संध्याकाळी 4 वाजेपर्यंत मध्यवर्ती सभागृह, चौथा मजला, विधानभवन मुंबई येथे घेण्यात येणार आहे. या निवडणुकीत शिवसेनेच्या विधानसभा सदस्यांनी मतदानात सहभागी व्हायचे असून सदस्यांनी शुक्रवारी दिनांक 10 जून 2022 रोजी शिवसेना विधीमंडळ पक्ष कार्यालय, दुसरा मजला, कक्ष 214, विधानभवन मुंबई या दालनात मतदानाबाबतच्या सूचना घेण्याकरता सकाळी 8 वाजता उपस्थित रहावे. आपल्याला देण्यात येणाऱ्या निर्देश आणि सूचनेप्रमाणे मतदान करायचे आहे. अतः शिवसेनेच्या विधानसभा सदस्यांना कळवण्यात येते की, सदस्यांनी उपरोक्त दिवशी वेळेवर उपस्थित राहून पक्षाने दिलेल्या आदेशानुसार, मतदान करावे, असा पक्षादेश आहे.
व्हिप पाळला नाही तर…?
व्हिप हा संबंधित पक्षातील सदस्यांना पक्षाद्वारे दिलेला आदेश असतो. याद्वारे आमदारांवर नियंत्रण ठेवलं जातं. विधानसभेत एखाद्या महत्त्वाच्या मुद्द्यावर मतदान करायचं असेलस तर त्याबाबतचा आदेश व्हिपमार्फत जारी करण्यात येतो. कार्यकारी विधीमंडळात पक्षातील शिस्त सुनिश्चित करणे हा यामागील हेतू असतो. एखाद्या आमदाराने पक्षादेश धुडकावून लावत मतदान केले तर त्या व्यक्तीचे सभासदत्व धोक्यात येऊ शकते. अथवा तो अपात्र होण्याचा धोका असतो. त्याच्यावर पक्षाची शिस्त भंग केल्या प्रकरणी कारवाई होते, तसेच त्याला पदही गमवावे लागू शकते.
