गौतम गंभीरशी झालेल्या वादानंतर श्रीसंतच्या पत्नीने दिली वाईट रिॲक्शन, पतीच्या पाठिशी उभी राहात म्हणाली की…
गौतम गंभीर आणि एस श्रीसंत हे दोन्ही खेळाडू आक्रमक शैलीसाठी प्रसिद्ध आहेत. आता दोन्ही खेळाडूंचं आंतरराष्ट्रीय क्रिकेट कारकिर्द संपली आहे. पण या दोन्ही खेळाडूंचा आक्रमक पवित्रा काही केल्या संपत नाही. लेजेंट्स क्रिकेट लीगमध्ये याची प्रचिती आली. पण हा वाद मैदानाबाहेरही सुरुच आहे. या दोघांच्या भांडणात आता एस श्रीसंतच्या पत्नीने उडी घेतली आहे.
![गौतम गंभीरशी झालेल्या वादानंतर श्रीसंतच्या पत्नीने दिली वाईट रिॲक्शन, पतीच्या पाठिशी उभी राहात म्हणाली की... गौतम गंभीरशी झालेल्या वादानंतर श्रीसंतच्या पत्नीने दिली वाईट रिॲक्शन, पतीच्या पाठिशी उभी राहात म्हणाली की...](https://images.tv9marathi.com/wp-content/uploads/2023/12/Sreesant_Wife-1.jpg?w=1280)
मुंबई : क्रिकेट विश्वात अनेक घडामोडी घडत असतात. काही चांगल्या तर काही वाईट घडामोडी असतात. काही घडामोडी ऐकल्या की वाईट वाटतं. असाच एक प्रकार लेजेंड्स क्रिकेट लीगमध्ये घडला आहे. गौतम गंभीर आणि एस श्रीसंत यांच्यात भर मैदात तू तू मै मै झाली. हा वाद इतक्यावरच शमला नाही. मैदानाबाहेर सोशल मीडियावरही दोन्ही खेळाडू जुंपल्याचं दिसत आहे. मैदानातील वादावर एस श्रीसंत याने एक व्हिडीओ पोस्ट केला आहे. यात त्याने गौतम गंभीरवर धक्कादायक आरोप केले आहेत. “मी त्याला एकही वाईट शब्द वापरला नाही. तो मला वारंवार फिक्सर म्हणत राहिला.”, अशी प्रतिक्रिया एस श्रीसंत याने इन्स्टाग्राम व्हिडीओत केली आहे. “तुम्ही तुमच्या सहकाऱ्यांचा आदर करत नसाल तर लोकांचं प्रतिनिधित्व करू नका. लाईव्ह सामन्यातही जेव्हा विराटबद्दल विचारलं जातं तेव्हा त्याच्याबद्दल काहीच बोलत नाही. कायम दुसरंच काही बोलत असतो. मला अधिक खोलात जायचं नाही. मला याबाबत खूप दु:ख झालं आहे. यामुळे मी आणि कुटुंबिय खूप दुखावलो आहोत” असंही त्याने पुढे म्हंटलं आहे.
दुसरीकडे, गौतम गंभीर यानेही सोशल मीडियावर एक हसरा फोटो टाकत उपरोधिक कॅप्शन लिहिली आहे. “जेव्हा संपूर्ण जग लक्ष वेधण्यासाठी धावत आहे, तेव्हा आपण फक्त हसायचं असतं.”, असं त्याने लिहिलं आहे. आता हा वाद चिघळत असताना एस श्रीसंतच्या पत्नीने त्यात उडी घेतली आहे. “श्रीकडून असं सर्व ऐकल्यानंतर धक्का बसला आहे. एक खेळाडू ज्याने भारतासाठी अनेक वर्षे प्रतिनिधित्व केलं तो इतक्या खालच्या स्तरावर जाऊ शकतो, याची कल्पना करवत नाही. क्रिकेटमधून निवृत्ती घेतल्यानंतर इतक्या वर्षानंतरही तो असं करू शकतो. शेवटी कौटुंबिक संस्कार खूप महत्त्वाचे ठरतात. हे सर्व मैदानात तुम्ही कसे वागता यावरून सिद्ध होतं. हे खरंच खूप धक्कादायक आहे..खरंच”, असं श्रीसंतच्या पत्नीने म्हंटलं आहे.
लेजेंट्स लीग क्रिकेटमध्ये गौतम गंभीर इंडिया कॅपिटल्स, तर श्रीसंत गुजरात जायंट्सकडून खेळत आहे. बुधवारी या दोन्ही संघांमध्ये सामना रंगला. इंडिया कॅपिटल्सने 20 षटकात 7 गडी गमवून 223 धावा केल्या आणि विजयासाठी 224 धावांचं आव्हान दिलं. हे आव्हान गाठणं गुजरात जायंट्सला कठीण झालं. 20 षटकात 211 धावा करू शकला आणि 12 धावांनी पराभवाचं तोंड पाहावं लागलं.