VIDEO : हवेत झेपावत विराट कोहलीची एक हाती शानदार कॅच, आदिल रशीद तंबूत
टीम इंडिया विरुद्ध इंग्लंड यांच्यात तिसरा एकदिवसीय सामना रंगतदार स्थितीत पोहचला आहे (Virat Kohli catch).
पुणे : टीम इंडिया विरुद्ध इंग्लंड यांच्यात तिसरा एकदिवसीय सामना रंगतदार स्थितीत पोहचला आहे. या अशा निर्णायक क्षणी कर्णधार विराट कोहलीने इंग्लंडच्या आदिल रशीदची हवेत झेपावत एकहाती भन्नाट कॅच घेतला आहे. रशीदच्या रुपात इंग्लंडला आठवा धक्का बसला आहे. विराटने घेतलेल्या या कॅचचा व्हिडीओ सोशल मीडियावर व्हायरल होत आहे.
सॅम करन आणि आदिल रशीदची जोडी डोकेदुखी ठरली
इंग्लंडने 200 धावसंख्येवर मोईन अलीच्या रुपात सातवी विकेट गमावली. टीम इंडियाच्या आशा पल्लवित झाल्या. मात्र मोक्याच्या क्षणी सॅम करन आणि आदिल रशीदने संयमी अर्धशतकी भागीदारी रचली. या दोघांमध्ये आठव्या विकेटसाठी 57 धावांची भागीदारी झाली होती. ही जोडी भारतासाठी डोकेदुखी ठरत होती.
विराटचा सुपर कॅच आणि रशीद आऊट
ही जोडी फोडणं टीम इंडिया समोरचं आव्हान होतं. सामन्यातील 40 वी ओव्हर विराटने शार्दुल ठाकूरला टाकायला दिली. शार्दुलने विराटचा विश्वास खरा ठरवला. या ओव्हरच्या दुसऱ्या चेंडूवर रशीदने फटका मारला. रशीदने मारलेला फटका विराटच्या दिशेने गेला. पण विराट आणि चेंडू यांच्यातील अंतर बरेच लांब होतं. पण विराट आपल्या नेहमीच्या शैलीत हवेत झेपावला. चेंडूवर अचूक नजर ठेवत कॅच पकडला. यासह इंग्लंडला आठवा धक्का बसला. रशीदने 22 चेंडूत 19 धावा केल्या.
विराटने कसा कॅच पकडला ? पाहा व्हिडीओ
— Sachin Patil (@Imsachinp) March 28, 2021
इंग्लंडच्या डावाची खराब सुरुवात
दरम्यान, भारताने दिलेल्या 330 धावांच्या आव्हानाचा पाठलाग करताना इंग्लंडच्या डावाची सुरुवात खराब झाली. सलामीवीर जेसन रॉयला भुवनेश्वर कुमारने त्रिफळाचीत केलं. जेसन रॉयने 6 चेंडूत 14 धावा केल्या. यामध्ये 3 चौकारांचा समावेश आहे. जेसन रॉय बाद झाल्यानंतर लगेच तिसऱ्या षटकात भुवनेश्वर कुमारने जॉनी बेयरस्टोला पायचीत केलं.
बेयरस्टो अवघ्या एक धावावर बाद झाला. त्यानंतर डेव्हिड मलान आणि जोस बटलर यांनी डाव सावरण्याचा प्रयत्न केला. मात्र, शार्दूल ठाकूरने त्यांचा हा प्रयत्न अयशस्वी ठरवला. त्याने जोस बटलरला पायचीत करत तंबूत परत पाठवले. बटलरने 18 चेंडूत 15 धावा केल्या. त्यानंतर मलान आणि लिविंग्स्टोन यांनी डाव सावरला. दोघांनी संयमी खेळी सुरु ठेवली. पण शार्दूल ठाकूरच्या चेंडूवर लिविंग्स्टोनही झेलबाद झाला. त्याने 31 चेडूत 36 धावा केल्या. यामध्ये 4 चौकार आणि 1 षटकाचा समावेश आहे.
लिविंग्स्टोन नंतर शार्दूलने मलानचा देखील बळी घेतला. मलानने 50 चेंडूत 50 धावा केल्या. यामध्ये सहा चौकारांचा समावेश आहे. त्यानंतर मोईन अलीने सॅम करनच्या मदतीने डाव सावरला. पण भुवनेश्वर कुमारच्या चेंडूवर तो झेलबाद झाला. हार्दिक पांड्याने एकदम अचूकपणे त्याचा झेल टिपल्याने तो बाद झाला. मोईनने 2 चौकार आणि 2 षटकाराच्या मदतीने 25 चेंडूत 29 धावा केल्या.
